Mateus 9

Yesu lò Wánù zū wàhu zédì dàgba

1 Yesu kà kɔ̀ ma kyānú kàsɛ̄ ya’a Kapernaum gándō’a. 2 Wánù wándó wànati lò wánù zū wàhu zédì be yí’u, ná yiibe shō. Waa Yesu wya byɛ̀ waa wa bā lá, u zɛ̀ yí ndó wàhu zédì lá la, <<Ngōnwú ngo, wa lò wúwàbɛbɛ’o gbā’ozyɔ̀.>>

3 Waa áwándó tà Dɔ̀ Musa fá mamá lá, wa zɛ̀ yí diwa la, <<Apà lá magbɔ̄ wa Shidɔ!>>

4 Yesu lò zyíhwɛ̀wàgàgà’wa yìkyà lá, u zɛ̀ la, <<Áyɛ̄ sá waa ni hwoi gàzyíhwɛ̀ bɛbɛ mamá ní? 5 Wàni kàdì yɔ̀ ní? Wàzɛ̀ la, <Wa lò wúwàbɛbɛ’o gbā’ozyɔ̀, kwɛɛ wàzɛ̀ la, dàdɔ mazyi ó kyēkyū lá ní>? 6 Yimamala m ngyi tà’ni la, Ángo Panku bā gbā yii bēèmyɛ̄ wàgbāzyɔ̀ wúwàbɛbɛ.>> Yiibeli u zɛ̀ yí ándó wàhu zédì lá la, <<Dàdɔ, lò shō’o pè mazyi ó ya ndō!>>

7 Yiibeli, ápà lá dàdɔ ma ya’a ndō. 8 Waa panku ndàbè wya wú li mamá lá, ázī lò’wa pà, wa ngyā Shidɔ, wàyi yí panku ágba mamá lá.

Yesu bá Matu ndɛ̀

9 Dédēwaa Yesu me beli ní ma kyēkyū yi ya lá, u wya ndópàgbā, àzyì’a zyī la, Matu, shí yii futá kolo’a wàpà gbā. Yesu zɛ̀ yí’u la, <<Be’m ní,>> Matu dàdɔ ma lò bē’u ní.

10 Waa Yesu yi zyī wúzyī wànyizɔ̄ yii ndō Matu lá, áwándó pà gbā ndàbè, wa áwándó sá wúwàbɛbɛ bē shí wa Yesu wa áwátu’a yiibe wúzyī. 11 Waa Áwáfaris wya wúli mamá lá, wa mbyē áwátu’a shé la, <<ishina yɛ̄ waa ándótàwú’ni lá yi zyī wúzyī wa áwándó pà gbā wa áwándó sá wúwàbɛbɛ ní?>>

12 Yesu fá zyí’wa ma zɛ̀ la, <<Áwándó wàhwoi tòwú yɔ̀ lá, hwoi hwāzú ándósáfyī yɔ̀, dedee ákèké wándó wàhwoi tòwú lá, gbaa hwoi hwāzú ní. 13 Tàma ni ya fyé átɛ́ zyí Shidɔ wàtāàtā zɛ̀ la, <Azúshīshī waa m ngyi fú ní, gba yi wúpyō wàgé ma pyāndɛ̀ yɔ̀. Dizyi m gbā bē ishina wàbá wándó wàhwoi sá wúwàsàsà lá yɔ̀, dedee m bē ishina wándó wàhwoi sá wú wàbɛbɛ lá.>>

Ashé Wàmbyēèmbyē ishina Nūwàsèsè

14 Yiibeli áwátu Yohana wàyi sá batisma lá bē mbyē Yesu shé la, <<Mamánī waa áwi’i wa Áwáfaris hwoi sènū, waa áwátu’u hwoi sènū yɔ̀ ní?>>

15 Yesu zɛ̀’wandɛ̀ ní la, <<O yi wya sáyìna áwápàkyù wàhwoi bé dùdù wàsèbā lá hwoi bɛ̄nwú kwāwaa ànùwàpyoo wa’wa hwoi dùdù lá? Yi byɛ̀, wa hwoi bɛ̄nwú yɔ̀! Dedee ányunu yi bē waa wa lò nùwàpyoo yi lòdɔ me’wa ní má, wa pi hwoi sènū ní.

16 <<Apazukponu lò túkpá wàpyoo yi kwà bē bé wúkɛ̀ wàkwɔ̄ wàyàyà lá yɔ̀, dizyi túkpá wàpyoo lá, lò yi vyì ma lò wúkɛ̀ wàkwɔ lá yi yà kāgbá wàndii lá. 17 Kwɛɛ mazyi pazu u pi lò zyàbā wàpyoo wè fu kwɛ̀ wàkwɔ̄ yɔ̀. Wa ma sá mamá, àkwɛ̀ lò yi tábwà, àzyàbā lò yi nyámbyɛ́, àkwɛ̀ lò yi sábɛ̄. Wa ma lò zyàbā wàpyoo wè fu kwɛ̀ wàpyoo, àkwɛ̀ wa zyàbā hwoi sá wúzu yɔ̀. >>

Angu wáwà wàlò hu wa wà wà fá vyā yɔ̀

18 Yesu kà yiifu zyí wàzɛ̀zɛ̀’a, ádóshī tá wànyɛnyɛ be kàli yii pyɛ̀’a ma yi zɛ̀ la,<< angu’m lò hu tama yiinì. Dedee be gwà’uvo yii dì, u lò yi dà>> 19 Yesu lò dàdɔ ma wa’u dóbá, wa áwátu’a.

20 Yiibeli kin àwàzu wà dazyɛ̀ dɛ idezepyɛ̀ lá zu niki’a ma be gwà’uvo yii nū túkpá’a. 21 U zɛ̀ wa di’a la, <<Nyunu waa m ma gwà’uvo yii nū túkpá’a kɛ̀ló, áwútòtò’m lò yi kɛ̀.>>

22 Yesu vekà zu ma wya’u ma zɛ̀ la, <<Lò nwú gba, ango, ázyíbyɛ̀’o lò’o tɛ.>> Yiibebeli wútòtò àwàlá lò kɛ̀.

23 Dédēwaa Yesu lò fè ndō dóshī ma wya wándó nwɛ̄ tufɛ̀lɛ́ wa bè panku hwoi shèki lá, 24 u zɛ̀ la, <<Ni dàdɔ yii maa, anguwáwà lá hu yɔ̀, u yi náná.>> Wa vye’uvyū. 25 Wa lò bè panku ká ya myɛ bwā lá, u kà fu ma pà nguwáwà li vo, u dàdɔ. 26 Ashévyā lá kà zyokuli sásá .

27 Yesu me beli ni, Àbòzú ápà ipyɛ̀ lò be’uni, wa kito la, <<Wya shishi’i, Ango wu Dawuda!>>

28 Yesu lò kà ndō zu, Àbòzú hwoila be dò’u, u mbyē’wa shé la, << Ni zɛ̀ndɛ̀ la, m bā gba wàyi dàgba ni kà?>>Wa zɛ̀ yí’u la,

<<Eba, Adandō,>>

29 Yiibeli Yesu gwà’wa vo yii zú ma zɛ̀ la, <<Yiishina byɛ̀ ni lá ázú’ni ú lò pò>>; 30 Ázú’wa lò pò. Yesu bwà’wa vo, kà bwà’wa vo la, wa ká zɛ̀ yí pazukponu yɔ̀ 31 Dedee wa ya zɛ̀ zyí’a yii zyokuli sásá.

32 Dédēwaa Yesu wa áwátu’a hwoi zumyɛ lá, wa lò wánù zu wàbā zyɔ̀ yi zɛ̀ zyí yɔ̀ be dò Yesu. 33 Dédēwaa Yesu lò zyɔ̀ ká yii dì pàli wàyi zɛ̀ zyí yɔ̀ lá, u dà zyí zɛ̀zɛ̀. Agbashu lò àbè panku pà wa hwoi zɛ̀ la, <<I wya wúzu mamá yii Isrela nyunzu ló yɔ̀>>

34 Dedee Áwáfaris zɛ̀ la, <<Aku wu zyɔ̀ gbaa yí’u gba wà ká zyɔ̀ ni.>>

Yesu Wyashishi panku

35 Yesu dà kyū vekà gáwàshuwɔ̀ wa gáwàti, u yi tà wa wú yii táwàkwāshī 'wa, u yi dádɔ̀ zyí Shidɔ wàsàsà àwu chɔ̀ wàyii dɔ lá, ma dàgba wútòtò kɛ-kɛkɛ wa wándó wàfá vyā yɔ̀ lá. 36 Dédēwaa u wya bè panku lò kādɔ lá, ázúshishi’wa lò’u pà, dizyi wa wya fyì ma dò pà wàsázá’wa ní yɔ̀, sáyìna dɛ̀ wàbā ndó wàyi pyō yɔ̀. 37 Yiibeli Yesu zɛ̀ yí áwátu’a la, <<Áwúzyī wàbēèbē buu, áwándó sá kolo buu yɔ̀. 38 Yimamala ni vá Adandō wàyi be wúzyī lá mazyi u sù wándó kolo kà fu dā’a mazyi wa lò wúzyī bē.>>