1 Tɔrɔ muxuna Ala maxandina sɔxɔlɛni, a a mawuga Alatala xa.

2 Alatala, i tuli mati n ma maxandin na.

I n ma mawuga xuiin namɛ!

3 I nama i yɛtagin luxun n ma

n nɛma tɔrɔni waxatin naxan yi!

I tuli mati n na.

N na i xili,

n yabi mafurɛn!

4 Amasɔtɔ, n siin ɲanmatɔɔn ni i ra

alo tutina.

N fatin ganma alo tɛɛ wolonna.

5 N bɔɲɛn xaraxi alo sɛxɛna.

Donse xɔli mi fa n na sɔnɔn.

6 Kutunna bata n doyen.

7 N bata liga

alo toxorona tonbonni,

alo kutunxunban taa xɔnni.

8 N mi xima.

N bata lu yɛɛ radunduni

alo xɔliin banxin fari.

9 N yaxune n konbima fɛriɲɛn gbɛn,

e fala xɔlɛn ti n ma,

e n xinla findi danga ti seen na.

10 N xube fuɲin nan donma.

N yɛɛgen bata basan n min igen na.

11 Amasɔtɔ i ya xɔlɔna fe ra,

i bata n tongo i yi n woli ayi.

12 N siin ɲanmatɔɔn ni i ra

alo nininna ɲinbanna ra.

N bata liga alo sɛxɛ xarena.

13 Koni Alatala,

i tan nan mangan na habadan!

Mayixɛtɛne nun mayixɛtɛne i ya fe falama nɛn.

14 I kelima nɛn i kininkinin Siyon taan ma.

I diɲa waxatin bata a li a ma.

Waxati saxi yɛtɛɛn ni ito ra.

15 Hali taani ito gɛmɛne rafan nxu tan i ya walikɛne ma.

A gbangbanna yɛtɛɛn kininkininna nxu ma.

16 Siyane birin gaxuma Alatala yɛɛ ra nɛn.

Dunuɲa mangane birin yi gaxu i ya binyen yɛɛ ra.

17 Alatala mɔn na Siyon ti waxatin naxan yi,

a yi a yɛtɛ makɛnɛn a binyeni.

18 A a yɛɛ ra findi muxu ramɛxine ma,

a yi a tuli mati e maxandi xuiin na.

19 Na xa sɛbɛ mayixɛtɛ famatɔne xa,

alogo yama famatɔɔn xa Alatala matɔxɔ.

20 Alatala bata a yɛɛ ragodo

keli a yire sariɲanxini kore xɔnna ma.

A bata a yɛɛ ragodo dunuɲa ma

keli ariyanna yi.

21 Muxun naxanye kasoon na

a bata ne kutun xuine mɛ.

A bata na muxu yalagixine xɔrɔya,

22 alogo e xa Alatala xinla fala Siyon yi,

e yi a tantun Yerusalɛn taani,

23 siyane nun yamanane birin na e malan waxatin naxan yi Alatala batudeni.

24 Marigin bata n sɛnbɛn ɲan n ma siimayani,

a yi n siin ɲan.

25 N yi a fala, n naxa,

"N ma Ala, i nama n faxa.

N munma fori. I tan luma nɛn habadan!

26 I bɔxɔ xɔnna da nɛn,

xabu a fɔlɔni.

I yii fɔxɔn nan kore xɔnna ra.

27 Ne birin danguma nɛn,

koni i tan luma nɛn na.

Ne birin forima nɛn,

e kala alo dugina,

i yi e masara.

28 Koni i tan luma nɛn i kiini waxatin birin.

I ya siimayaan mi ɲanɲɛ mumɛ!

29 Nxu tan i ya walikɛne diine luma nɛn i fɛma,

e yixɛtɛne fan yi sabati i yɛtagi."