Salmos 13

Ala maxandina malina fe ra

1 Dawudaa bɛtina, bɛti baane kuntigin xa.

2 Alatala, han waxatin mundun yi?

I ɲinanɲɛ n xɔn han habadan?

I yɛtagin luxunɲɛ n ma han waxatin mundun yi?

3 N niin xa tɔrɔ,

n bɔɲɛn yi fɛriɲɛn sunuxi

han waxatin mundun yi?

N yaxuna n fari

han waxatin mundun yi?

4 Alatala n ma Ala,

n mato, i n yabi.

N fangan xun masa,

xa na mi a ra, n faxama nɛn.

5 N yaxun yi a fala,

a naxa, "N bata a nɔ."

N yaxune sɛwama nɛn

n na bira waxatin naxan yi.

6 N tan n yigin saxi i ya hinanna nin,

sɛwana n bɔɲɛni i ya kisina fe ra.

Alatala, n bɛtin bama i xa nɛn

amasɔtɔ i bata fe faɲin liga n xa.