1 Dawudaa bɛtina, bɛti baane kuntigin xa.

2 Alatala xa i yabi

i tɔrɔni waxatin naxan yi.

Yaxubaa Ala xa i ratanga.

3 Ala xa a maliin nagodo i ma

keli a yire sariɲanxini,

a xa i mali keli Siyon Geyaan fari.

4 Ala xa i ya kiseene birin nasuxu,

a mɔn yi sɛwa i ya saraxa gan daxine birin na.

Bɛti xuini te.

5 Ala xa i bɔɲɛn waxɔn feene so i yii,

a mɔn yi i ya fe yitɔnxine birin nasabati.

6 Nanara, nxu sɔnxɔɛ sɛwani i ya nɔ sɔtɔna fe ra.

En yi en gbee taxamaseri dugine rate Ala xinli.

Alatala xa tin i ya maxandin birin ma.

7 N na a kolon yati,

Alatalaa muxu sugandixin nakisima nɛn.

A a yabima nɛn

keli a ariyanna sariɲanxini,

a yi a rakisi a sɛnbɛn na.

8 Ndee yigin sama e yɛngɛ so wontoroni,

bonne yi e yigin sa e soone yi,

koni en tan yigin saxi Alatala xinla nin,

en ma Ala.

9 Na kanne tantanma nɛn e bira,

koni en tan kelima nɛn, en ti ken!

10 Alatala xa mangan nakisi!

I xa nxu yabi,

nxu na i maxandi waxatin naxan yi!