Salmos 29

Alatala Sɛnbɛn Birin Kanna

1 Dawudaa bɛtina.

Ɛ tan malekane,

ɛ fa Alatala tantun,

ɛ a tantun a binyen nun a sɛnbɛna fe ra.

2 Ɛ binyen fi Alatala ma a xinla fe ra,

ɛ Alatala batu a nɔrɔ sariɲanxini.

3 Alatala xuiin mɛma fɔxɔ igene yi,

Ala binye kanna sarinma,

Alatala a xuiin nasigama ige gbeene xun ma.

4 Alatala xuiin sɛnbɛn gbo,

Alatala xuiin nɔrɔxi.

5 Alatala xuiin suman binle yigirama,

hali suman wudin naxanye Liban yamanani.

6 Ala Liban geyane ratuganma

alo ɲinge diina,

e nun Siriyon geyana

alo burunna ɲingena.

7 Alatala xuiin sigama ayi

alo kuye sarinna.

8 Alatala xuiin tonbon yirene yimaxama,

a Kadesi tonbonni maxa.

9 Xɛnle diin xalima Alatala xuiin ma,

a mɔn yi warine dɛɛne rayolon,

yamaan birin sɔnxɔma a Batu Banxini,

e naxa, "Binyen xa fi a ma!"

10 Alatala dɔxi fufane xun na.

A mangayaan na habadan!

11 Alatala nan sɛnbɛn fima a yamaan ma,

a bɔɲɛ xunbeli barakan sa e yi.