1 Tantun bɛtina, bɛti baane kuntigin xa. A xa ba kondenne ra. Sigi sariɲanxina.

2 Ala xa kininkinin en ma,

Ala xa en baraka.

Ala nɔrɔn xa godo en ma.

Bɛti xuini te.

3 Nanara, dunuɲa birin i ya kiraan kolonɲɛ,

siyane birin yi i ya marakisin kolon.

4 Siyane xa i tantun Ala,

siyane birin xa i tantun!

5 Muxune xa ɲaxan,

e bɛtin ba sɛwani,

amasɔtɔ i siyane makitima tinxinna nin.

I tixi dunuɲa muxune birin yɛɛ ra.

Bɛti xuini te.

6 Siyane xa i tantun Ala,

siyane birin xa i tantun!

7 Nayi, bɔxɔn donse gbegbe fima.

Ala, en ma Ala en barakama nɛn.

8 Ala en barakama nɛn,

bɔxɔn danna muxun birin yi gaxu a yɛɛ ra.