Salmos 77

Madɛndɛnna tɔrɔ waxatini

1 Asafi a bɛtina, bɛti baane kuntigin xa, Yedutun xa.

2 N bata n xuini te Ala ma.

N bata n ma mawuga xuini te,

a xa n xuiin namɛ.

3 N yi tɔrɔni waxatin naxan yi,

n Marigin maxandi nɛn.

Kɔɛɛn birin na, n yi n yiini te Ala ma,

koni n mi madɛndɛn.

4 Alaa fe to rabira n ma, n kutun.

N to n miri a ma, n xaxinla yi yifu.

Bɛti xuini te.

5 N yi xi n yɛɛ ra yi.

N xaminxi, n mi fala tima.

6 Nayi, n yi n miri waxati danguxine ma

e nun ɲɛɛ xunkuyene.

7 Bɛtine yi rabira n ma kɔɛɛn na.

N yi n miri n bɔɲɛni,

n maxɔdinna ti n xaxinli iki:

8 "Marigina a mɛma nxu ra nɛn ba,

han habadan?

Nxu mi fa a kɛnɛnma ba?

9 Marigina hinanna bata ɲan ba,

han habadan?

A tulisaan bata ɲan ba,

han habadan?

10 Ala bata ɲinan hinanna xɔn ma ba?

Ala bata a kininkininna ɲan a xɔlɔni ba?"

Bɛti xuini te.

11 N yi a fala, n naxa,

"Naxan n tɔrɔma, na ni ito ra:

Kore Xɔnna Ala mi fa a fangan yitama

alo a fɔlɔni."

12 Alatala,

n xa i ya kɛwanle rabira n yɛtɛ ma.

I ya kabanako fe fonne yi rabira n ma.

13 N xa n miri i ya wanle ma.

N yi n xaxili lu i ya wali gbeene xɔn ma.

14 Ala, i ya kiraan sariɲan.

Batu se yo mi gbo alo Ala.

15 Ala nan i tan na

naxan kabanako wanle kɛma.

I bata i sɛnbɛn mayita siyane tagi.

16 I bata i ya yamaan xunba i sɛnbɛni,

Yaxuba nun Yusufu bɔnsɔnne.

Bɛti xuini te.

17 Ala, igene to i to,

e yi xuruxurun.

Tilinne yi xuruxurun.

18 Tulen yi godo keli kore.

Galanna yi a xuiin namini kore.

Kuyen yi a ɲinna masɔxɔn yiren birin yi.

19 I ya kuye sarinna xuiin yi gbo ayi.

I ya kuyena ɲin masɔxɔnna yi dunuɲa birin yiyalan.

Bɔxɔn yi xuruxurun, a yi yimaxa.

20 I ya kiraan yi fɔxɔ igeni.

I gidi baa tilinxini, i san fɔxɔne mi toɛ.

21 I yi Nabi Musa nun Haruna ti i ya yamaan yɛɛ ra

alo xuruse rabaan tima yɛxɛɛ kurun yɛɛ ra kii naxan yi.