1 Asafi a bɛtina.

Ala, siya gbɛtɛne bata i ya bɔxɔn yɛngɛ,

e so.

E bata i Batu Banxi Sariɲanxin naharamu.

E bata Yerusalɛn findi taa xɔnna ra.

2 E bata i ya walikɛne binbine so xɔline yii

e yi e don.

I ya muxu tɔgɔndiyaxine binbine bata lu burunna subene bun.

3 E bata e wunla ramini Yerusalɛn birin yi

alo igen bɔxɔnma.

Muxu yo mi luxi

naxan faxa muxune maluxunɲɛ.

4 Nxu rabilinna siyane fala ɲaxin tima nxu ma,

e nxu makonbi, e nxu magele.

5 Alatala, i luma xɔlɔxi nxu ma nɛn

han waxatin mundun?

I ya xɔlɔn luma nɛn alo tɛɛna

han waxatin mundun yi?

6 I ya xɔlɔn nagodo siyane ma

naxanye mi i batuma,

e nun yamanan naxanye mi i xinla binyama.

7 Amasɔtɔ e bata Yaxuba bɔnsɔnna nɔ,

e a bɔxɔn kala.

8 I nama nxu tɔrɔ nxu benbane hakɛne fe ra.

I ya kininkininna xa nxu ralan iki sa!

Amasɔtɔ nxu makona a ma han!

9 Ala, nxu rakisi muxuna,

nxu mali i xinla binya feen na!

Nxu xunba,

i yi nxu mafelu nxu yulubine ra

i xinla a fe ra.

10 Nanfera siyane maxɔdinna tima,

e naxa, "E Ala minɛn?"

A yita siyane ra nxu yɛɛ xɔri

a i ya walikɛne faxa feen ɲɔxɔma nɛn.

11 I tuli mati suxu muxune kutun xuiin na.

Naxanye yalagin bun,

ne ratanga i sɛnbɛ gbeen na.

12 Na siyane konbin naxanye ti i ma Marigina,

ne saranna fi na ra dɔxɔ solofere.

13 Nanara, nxu tan i ya yamana,

i naxan kantanma

alo i ya xuruse kuruna,

nxu i tantunɲɛ na yi habadan,

nxu i matɔxɔ waxati famatɔne birin yi.