Salmos 86

Ala maxandina malina fe ra

1 Dawudaa Ala maxandina.

Alatala, i tuli mati n na,

i yi n yabi.

Amasɔtɔ yiigelitɔɔn nun tɔrɔ muxun nan n na.

2 N niin natanga,

amasɔtɔ n tɔgɔndiyaxi i ma.

I tan n ma Ala, i ya walikɛɛn nakisi,

naxan a yigi saxi i tan yi.

3 N Marigina, kininkinin n ma!

N fɛriɲɛnma i tan nan maxandɛ.

4 Marigina, i ya walikɛɛn nasɛwa,

amasɔtɔ n na n niin taxuxi i tan nan na.

5 Marigina, i tan fan! I diɲa!

Naxan na i maxandi,

i hinanma nɛn na ra han!

6 Alatala, i tuli mati n ma maxandi xuiin na,

n ma mawuga xuiin namɛ.

7 N nɛma tɔrɔni,

n yi i maxandi,

amasɔtɔ i yabin tima.

8 Marigina, ala yo mi luxi alo i tan.

I ya wanle ɲɔxɔn mi na.

9 Marigina, i siyaan naxanye birin daxi,

ne fama nɛn,

e yi e xinbi sin i yɛtagi,

e yi i xinla binya.

10 Amasɔtɔ i tan gbo,

i kabanako feene rabama.

I tan keden peen nan Ala ra.

11 Alatala, i ya kiraan yita n na

alogo n xa sigan ti i ya ɲɔndini.

Na fe keden peen sa n bɔɲɛni,

alogo n xa i xinla binya.

12 Marigina, n ma Ala,

n ni i tantunma nɛn n bɔɲɛn ma feu!

N yi i xinla binya habadan!

13 I bata hinan n na han!

I yi n niin natanga sayaan ma.

14 Ala, wasodene bata keli n xili ma,

gbalotɔ ganla waxi n faxa feni,

e miriya yo mi sigama i tan ma.

15 Koni Marigina, i tan nan Ala ra

naxan kininkinin,

i diɲa, i mi xɔlɔn xulɛn,

i ya hinanna nun i ya lannayaan gbo.

16 I yɛɛ rafindi n ma,

i yi hinan n na.

Sɛnbɛn fi n ma, n tan i ya walikɛna.

N nakisi, n tan i ya walikɛ ɲaxanla diina.

17 A yita n na, a i fan,

alogo naxanye n naɲaxuxi,

ne xa a to, e yagi.

Amasɔtɔ i tan Alatala bata n mali,

i yi n madɛndɛn.