NUMBERS 16

Togopluw ni tay Korah, nge Dathan, nge Abiram

1,2 I Korah nib mo’on ni fak Izhar, ni be’ ko genong ni Levi ko fare ke girdi’ rok Kohath e togopluw nga rogon ni be gafaliyrad Moses. Me un dalip i girdi’en e ganong ni Ruben ngak ni aram Dathan, nge Abiram, nl’agruw i pumo’on ni fak Eliab, nge On nib mo’on ni fak Peleth, nge 250 e tayugang’ nu Israel ni go’ yimnangrad nike mel’egrad gubin e girdi’. 3 Ra mo’olunggad nga p’eowchen Moses nge Aron me lungurad ngorow, "Kaygi pagrogon e n’en ni kam rin’ew! Gubin e girdi’ nu Israel nib mil farad ngak SOMOL, ma bay SOMOL rodad ni gadad gubin. Moses, ere mangfan ni kam tolang nigem ngalang rok ga’ngin yu Israel ni girdi’en SOMOL?"

4 Nap’an ni rung’ag Moses e ren’ey me pag ir nga daken e but’ nge meybil. 5 Ma aram me ga’ar ngak Korah nge pi’in kar manged ngak, "Gabul ni kadbul e bayi dag SOMOL ngodad ko mini’ e en nib milfan ngak; ir e ra pag e cha’an nib milfan ngak ni aram e cha’ nike mel’eg, ni nge yan ngak nga altar. 6,7 Gabul ni kadbul me gur nge pi’in ni kar manged ngom e ngam feked yu raba’ i fen e fek nifiy ngam afed e nifiy nge incense nga langgin mi gimed fek i yan nga altar. Ma aram ma gadad guy ko mini’ e arodad nike mel’eg SOMOL. Gimed e pi Levite e kaygi pag rogon e n’en ni kam rin’ed!"

8 Miki ul ul Moses ko thin rok ngak Korah. "Mmotoyilgad gimed e pi Levite! 9 Mogned, gimed be leamnag ma yug de ga’fan nike faelmed e Got rok yu Israel nga bang u fithik’ piyu Israel ni bochan e nge yag ni ngu’um chugurgad ngak, ma gimed be rin’ e maruwel romed u lan fare Tent rok SOMOL, ma gimed be sak’iy u mit yu Israel ngu’um machibgad mi gimed be pigpig ngorad? 10 Ke taymed nge urngin e tin kabay e Levite nike ga’ famed — ma chiney e ki gimed be guy rogon ni ngkum feked fare liw ko prist! 11 Ere nap’an ni gimed ra gun’gun’nag Aron, ma rriyul’ ni SOMOL e gimed be togopluw ngak, gur nge pi’in yad be un ngom ko togopluw."

12 Me l’oeg Moses e pong nge yan ngak Dathan nge Abiram, machane me lungrow, "Dab gu bow! 13 Mog dawori fel’ u wun’um ni kam fekmad nga wuru’ yu Egypt nib nam nib yong’ol e but’ riy ngamub mu thangmad ngaray u lan e gi ted ney? Ere gur e ngkum par nib ga’ lungum romad? 14 Ya gathi kam fekmad i yib ngabang i but’ nib yong’ol ara kam pi’ yuyang e flang ngomad nge woldug ni grape ni nggu fi’iyed. Ere mog, chiney e kag be guy rogon ni ngam ban nagmad? Dab gu bow!"

15 Mri damumuw Moses me ga’ar ngak SOMOL, "Dab kum fanay e pi maligach ni be pi’ e pi pumo’on ney ngom. Dawor gu bucheg ban’en rok bagyad; mus nga ta’ab dongki ma dawor gu fek rorad."

16 Me ga’ar Moses ngak Korah, "Gabul e dabisiy ni ngambad fa 250 i girdi’ ni gimed ngabang ko fare Tent u p’eowchen SOMOL; ma ku bay yib Aron ngaram. 17 Ma ra bigimed ma nge fek e ba’ rok e fen e fek nifiy nge tay e incense ngay, ma aram me pi’ u altar." 18 Ere gubin fapi pumo’on nra feked e yu raba’ i fen e fek nifiy rorad ngar afed e nifiy nga langgin miyad tay e incense nga daken, miyad sak’iy nga langan e mab ko fare Tent ni yad Moses nge Aron. 19 Ma aram me kunuy Korah gubin e girdi’ nu Israel nga ta’bang, ngar sak’iygad ni yad ba sap ngak Moses nge Aron ni yow bay u langan e mab ko fare Tent. Miyad gin ma ke mat muluplup’en SOMOL nga dakenrad ni yad gubin, 20 me ga’ar SOMOL ngak Moses nge Aron, 21 "Mpaloggow rok e pi girdi’ney, ya nggu thang e pogofan rorad e chiney."

22 Machane me ragbug Moses nge Aron nga but’ nge math peri’ row ko but’ me lungurow, "Got, I gur e ga ma pi’ e yafos. Ere mog, nap’an nra denen ta’abe’ ma aram e ngam damumuw ngak urngin e girdi’ u lan fare binaw ni ga’ngin?"

23 Me ga’ar SOMOL ngak Moses, 24 "Mog ngak fapi girdi’ ngar paloggad u to’oben fapi Tent rok Korah, nge Dathan, nge Abiram."

25 Ma aram me un fapi tayugang’ nu Israel ngak Moses, ngranod ngak Dathan nge Abiram. 26 Me ga’ar Moses ngak fapi girdi’ ni gubin, "Mpaloggad ko pi Tent rok e pi pumo’on ney ni yad ba kireb, ma dab kum mathgad nga ban’en ni ferad. Ya ra dangay, ma yira dachuguymed ngorad ngan thang e pogofan romed ni fan ko denen rorad." 27 Ma aram mra paloggad ko fapi Tent rok Korah nge Dathan, nge Abiram.

Ma ke yib Dathan nge Abiram nga wean ni yow be sak’iy u mit e Tent rorow ni yad gal le’engirow nge pifakrow. 28 Me ga’ar Moses ngak fapi girdi’, "Irera’ rogon mi gimed nang ni SOMOL e ke pi’eg ni ngu’ug rin’ e pi maruwel n’ey, gathigag e kug turguy rog ni ngu’ug rin’ ni gubin. 29 Fa’anra yim’ e pichaney nrogon nma yim’ e girdi’, nde pi’ Got e gechig rorad, ma aram e gathi SOMOL e ke loeg’eg. 30 Machane fa’anra rin’ SOMOL ban’en ndawor ni rung’ag, ni nge mab e but’ nge ful’ e gali cha’ney nib mu’un urngin e tin nib milfan ngorow ban’en ngranod nga’ar ni kayad bfos nga tafen e yam’, ma aram e kam nanged ni picha’ ney e kar pi’ed keru’rad ngak SOMOL."

31 Ma yug nap’an ni mu’ Moses ko numon, me say e but’ u tan Dathan nge Abiram 32 nge ful’ row nge chon e tabnaw rorow, nib mu’un urngin e pi’in yad Korah ngabang nge urngin e chugum rorad. 33 Ma aram mranod nga tan e but’ nga tafen e yam’, nib mu’un e chugum rorad ngorad. Me sul e but’ nga ta’bang nge par nrogon, ma kar m’aygad ngabang. 34 Ma urngin e girdi’ nu Israel ni urmed u rom e ra milgad nnap’an nrung’aged lungun fapi girdi’ nra yorgad. Me tolul piyu Israel ni be lungurad, "Da milgad! Ya richey miki ful’dad e but’!"

35 Me pi’ SOMOL ba nifiy ni be dramram nge urfiy fa 250 i pumo’on ni kar pi’ed e incense.

Fa yu raba’ i fen e fek nifiy

36 Ma aram me ga’ar SOMOL ngak Moses, 37 "Mog ngak Eleazar nib mo’on ni fak Aron ni prist nge chuweg fa yu raba’ i fen e fek nifiy ni bronze nge chuw u fithik’ i awatan fapi pumo’on ni kar mo’orufgad. Nifiy ko fa yu raba’ i fen e fek nifiy e ngan wereg nga bang ya ba thothup fa yu raba’ i fen e nifiy. 38 Ke thothup nnap’an e ni pi’ u daken e altar rok SOMOL. Ere mfek fa yu raba’ i fen e nifiy rok fapi pumo’on ni kan thang e pogofan rorad ni bochan e denen rorad. Ngan pirdi’iy e yu raba’ i fen e nifiy nem nge yan i bod yu raba’ i plet nib gilgith, min ngongliy nge mang upongen fare altar. Re upong ney e nge mang ba puguran ngak e girdi’ nu Israel. 39 Aram me fek Eleazar ni prist fa yu raba’ i fen e nifiy ngan pirdi’iy nge yan i bod e plet nib gilgith, nge mang upongen fare altar. 40 Re upong n’ey e ngi i puguran ngak piyu Israel ni yug be’ ni gathi reb i owchen Aron e dabiyag ni nge yib ko fare altar nge urufiy riy fapi incense ni yima pi’ ngak SOMOL. Mra rin’ be’ ma yira thang e pogofan rok ni bod Korah nge pi’in yad ngabang. Urngin e pin’ey nrin’ ni bod rogon ni yog SOMOL ngak Moses ni nge rin’ Eleazar.

I Aron ni Ayuweg e Pogofan Rok e Girdi’

41 Me reb e rran riy me tabab yu Israel i gun’gun’nag Moses nge Aron ni be lungurad, "Kam thangew e pogofan rok boch e girdi’ rok SOMOL." 42 Ma nap’an ni mu’ulung yu Israel ni ga’ngin ni ngar togopluwgad ngak Moses nge Aron, miyad cheal u but’ ngar sapgad ko fare Tent mar guyed fare gi manileng nike ing fare Tent ma be mat ram’en SOMOL riy ni be maluplup’. 43 Me yan Moses nge Aron ra sak’iygow nga mit fare Tent, 44 me ga’ar SOMOL ngak Moses, 45 "Mchuwgow u to’oben e pi girdi’ ney, ya nggu thang e pogofan rorad ni kachingiyal’ ney!"

Miyow siro’ ngak SOMOL nge math peri’row nga but’, 46 me ga’ar Moses ngak Aron, "Mu fek fa raba’ i n’en rom ni fen e fek nifiy ngam af e nifiy u daken e altar nga langgin, ma ga af boch e incense nga langgin. Ma ga papey nigem ngam fek i yan ngak e pi girdi’ nem ngam fal’eg bangbengin e machalbog ni fan ngorad. Mu pay nigem! Ya ke pu’og SOMOL e damumuw rok ke tabab e liliy ni yibe yim’ riy." 47 Me fol Aron riy me fek fa raba’ i fen e fek nifiy rok nge mil i yan nga fithik’ fapi girdi’. Me guy nike tabab e m’ar ngak fapi girdi’, me tay fapi incense nga daken e nifiy rok me fal’eg bangbengin e machalbog ni fen fapi girdi’. 48 Me tal fare liliy, me magay Aron nib sak’iy u thilin e pi’in kabfos nge pi’in karm’ad. 49 Urngin e girdi’ u gubin nra m’ad e yad 14,700, da ni uneg ngay e tin ni yim’ nnap’an e togopluw ni tay Korah. 50 Ma nap’an ni tal fare liliy me sul Aron ngak Moses nga langan e mab ko fare Tent.