NUMBERS 27

Pi ppin ni fak Zelofehad

1 I Mahlah, Noah, Hoglah, Milkah nge Tirzah e bogi ppin ni fak Zelofehad nib mo’on ni fak Hefer nib mo’on ni fak Gilead nib mo’on ni fak Makir nib mo’on ni fak Manasseh nib mo’on ni fak Josef. 2 Fapi ppin e ra bad ra sak’iygad nga p’eowchen Moses, nge Eleazar ni prist, nge pilal’ nge urngin e girdi’ ni yad bay u langan e mab ko fare Tent u p’eowchen SOMOL, ngar ga’argad, 3 "Chitmangimad e ke yim’ u daken e ted, ma dariy fak ni pumo’on. De cheg ngak pi chongin Korah, ni fa’anra togopluwgad ngak SOMOL; denen rok e ir e yim’ ni bochan. 4 Mangfan ni nge chuw fithingan e chitmangimad u fithik’ e girdi’ nu Israel, bochan e dariy e pagel ni fak? Mu pi’ed e gin nge milfan ngomad ko binaw rok girdi’en e chitamangimad."

5 Me fek Moses e n’en nike yog fapi ppin i yan ngak SOMOL, 6 me ga’ar SOMOL ngak, 7 "Ba mat’aw e n’en keyog fapi ppin ni fak Zelofehad; mu pi’ ngorad e binaw ni nge milsuwon ngorad ulan tafen girdi’en e chitamangirad. Mu pag e gayog rok e chitamangirad nge yan ngorad. 8 Mog ko girdi’ nu Israel nra yim’ be nib mo’on, ndariy e pagel ni fak, ma ppin ni fak e nge tafnay tafen. 9 Ma fa’anra dariy e bpin ni fak ma walagen ni pumo’on e nge tafnay tafen. 10 Ma fa’anra dariy e pagel ni walagen ma walagen e chitamngin ni pumo’on e nge tafnay tafen. 11 Ma fa’anra dariy e pumo’on ni walagen e chitamngin, ma be’ ni girdi’en ni th’abi chugur ngak e nge tafnay tafen. Nge par u pa’ nri tafen. Motochiyel rog e ray, thangri fol piyu Israel riy."

Joshua nni duwgiliy ni nge yan nga luwan Moses

12 Me ga’ar SOMOL ngak Moses, "Mman nga daken e burey ni Abarim ngam sap nga daken fare nam ni bay gu pi’ ngak yu Israel.✝27:12 Deu 3:23–27; 32:48–52 13 Ga ra guy nge mu’ ma ga yim’ ni bod Aron ni walagem, 14 ya gimew l’agruw nda mfolgow ko tin gog u daken e ted u Zin. Fa ngiyal’nem ni i gun’gun’ yu Israel nib togopluw ngog u Meribah mi gimew siyeg ni ngam dagew u p’eowcherad nib pagan’mew nga gelngig nib thothup." (Meribah e fare alublub ni bay u Kadesh u daken e ted nu Zin.)

15 Me meybil Moses ni ga’ar, 16 "SOMOL ni Got, ni gur e bay e pogofan rok urngin e girdi’ u pa’am, wenig ngom, mu turguy reb e pumo’on nrayag rok ni ngi i gagiyegnag piyu Israel, 17 me yog ngorad e n’en ni ngu’ur rin’ed u fithik’ e mael, ya nge dabi par e tirom e girdi’ ni bod e saf ndariy be’ ni be gafaliyrad."

18 Me ga’ar SOMOL ngak Moses, "Mu fek Joshua ni fak Nun, ya rayag rok, ma ga tay pa’am nga daken lolugen ngam yibilay ngog.✝27:18 Exo 24:13 19 Ngam fek nga p’eowchen Eleazar ni prist nge yu Israel, mu rom u p’eowcherad ni yad gubin e ngamog riy nike yan nga luwam. 20 Ma ga tay nge un ngom ko gagiyeg, ya ngi i fol urngin e girdi’ nu Israel rok. 21 Bay i toer ngak Eleazar ni prist, mi Eleazar e bay i maruwel ko fare Urim nge Thummim. Ara’ rogon ni bay i pow’iy Eleazar Joshua nge urngin e girdi’ nu Israel u urngin e tin bay ur rin’ed." 22 Me rin’ Moses ni bod rogon nike yog SOMOL ngak. Me fek Joshua i yib nga p’eowchen Eleazar ni prist nge urngin e girdi’ nu Israel, 23 me tay pa’ nga daken lolugen me yog nike yan Joshua nga luwan ni bod ni yog SOMOL.