NUMBERS 23

1 Me ga’ar ngak Balak, "Mu ubung medlip i altar u roy, ma ga fek medlip e garbaw ni pumo’on nge medlip e saf ni pumo’on i yib ngog."

2 Me rin’ Balak ni bod ni kanog ngak, ra reb fapi altar miyow pi Balaam e maligach u daken ni reb e garbaw ni pumo’on nge reb e saf ni pumo’on. 3 Me ga’ar Balaam ngak Balak, "Mpar u roy u to’oben e maligach rom ni mo’oruf, mu gu wan ngug guy ko ra yib SOMOL ni nggu mada’gow fa dabi yib. Bay gu weliy ngom e tin bayi yog ngog." Me yan ni go’ ir nga daken p’ebgul bochi burey, 4 me yib Got ngar mada’gow. Me ga’ar Balaam ngak, "Medlip e altar ni kug ubung nra reb ma kug maligachnag u daken reb e garbaw ni pumo’on nge reb e saf ni pumo’on."

5 Me yog SOMOL ngak Balaam e n’en ni nge yog me l’oeg nge sul ngak Balak ni nge yog e thin rok ngak. 6 Ma aram me sul me pir’eg Balak ni kab sak’iy u charen e maligach rok ni mo’oruf ni yad urngin e pi tayugang’ nu Moab.

7 Me weliy Balaam e re yi’iy ni ba’aray ngak:

"Balak ni Pilung nu Moab e ke fekeg

u Syria, ko fapi burey ni bay ko ngek

ni be ga’ar, ‘Moy ngam weliy e yi’iy,

ngam bucheg wa’athan e girdi’ nu Israel.’

8 Uw rogon ni nggu bucheg wa’athan be’ ndawori bucheg Got wa’athan,

fa nggu weliy murung’agen e gechig ni fa’anra dawori yog Got?

9 Kug par u p’ebugul e war kug guyrad;

kug par u daken e burey kug yaliyrad.

Yad girdi’en ba nam ni yad be par ni go’ yad;

yad manang nike fal’eg Got wa’athrad nib thil nga yugu boch e nam.

10 Pi’in owchen yu Israel e yad bod e fiyath,

yad pire’ ndabiyag i the’egrad.

Mu pag nggu museg e pi rran rog ni bod reb e girdi’ rok Got;

Mu pag nggum’ u fithik’ e gapas ni bod rogon e pi’in yad mmat’aw."

11 Me ga’ar Balak ngak Balaam, "Be mang e biney ni kam rin’ ngog? Kug piningem ngaray ni fan e ngam yibil ngam bucheg wa’athan e pi to’ogor rog, ma n’en ni kam rin’ e kam fal’eg wa’athrad."

12 Me fulweg Balaam ni ga’ar, "Kemus ni thin nike yog SOMOL ngog e rayag ni gog."

Bin l’agruw e yi’iy rok Balaam

13 Me ga’ar Balak ngak Balaam, "Mu un ngog ngdarow ngabang ni ga ra par riy ma kemus ni boch piyu Israel e ga ra guyrad. U rom e ngam yibil riy ngam bucheg wa’athrad." 14 Me fek ngranow nga daken bangi flang u Zofim ni bay u p’ebgul e Burey ni Pisgah. Miki ubung medlip e altar u rom, mra reb fapi altar miki maligachnag reb e garbaw ni pumo’on nge reb e saf ni pumo’on u daken.

15 Me ga’ar Balaam ngak Balak, "Mu sak’iy u to’oben e maligach rom ni mo’oruf, mu gu wan aram nggu mada’gow Got."

16 Me yib SOMOL ngak Balaam me yog ngak e n’en ni nge yog, me l’oeg nge sul ngak Balak ni nge weliy e thin rok ngak. 17 Me sul me pir’eg Balak ni kab sak’iy u to’oben e maligach rok ni mo’oruf ni yad fapi tayugang’ nu Moab. Me fith Balak ngak e n’en nike yog SOMOL, 18 me weliy Balaam e re yi’iy ni ba’aray ngak:

"Balak ni fak Zippor, moy

ngam telim ko n’en ni nggog.

19 Got e gathi bod e girdi’, nma ban;

Gathi ba girdi’ nma thiliyeg laniyan’.

Tin nma micheg ni nge rin’ e ma rin’;

Ra non ma kem’ay i ngongliy.

20 Keyog Got ngog ni nggu fal’eg wa’athay,

Ma nap’an nra fal’eg Got wa’athay, ma dabkiyag ni nggu rin’ ban’en ngay.

21 Kug guy ndariy e buch wa’athan ara kireb ni nge yib ngak yu Israel.

I SOMOL ni Got rorad e bay rorad;

yad be tolulnag ni Ir e pilung rorad.

22 I Got e ke fekrad nga wuru’ yu Egypt;

Ma cham ni pa’rad ni bod rogon ba garbaw ni pumo’on nib damumuw.

23 Dariy ba mmotokan ara bmit e pig,

Nra yib angin ko nam nu Israel.

Chiney e bayi yog e girdi’ murung’agen yu Israel ni bayi lungurad,

‘Mu sapgad ko tin nike rin’ Got!’

24 Yu Israel e bod ba layon nib gel:

Ni dabi toffan nge mada’ ko ngiyal’ nike popof ke longuy

Ma ke unum racha’en e pi’in nike li’ kem’."

25 Ma aram me ga’ar Balak ngak Balaam, "Kam siyeg ni ngam yibil nge buch wa’athan e girdi’ nu Israel, machane ku da mfal’eg wa’athrad!"

26 Me fulweg Balaam ni ga’ar, "Gathi gog ngom faram nthingar gu rin’ urngin e tin keyog SOMOL ngog?"

Bin dalip e yi’iy rok Balaam

27 Me ga’ar Balak, "Moy, ngdarow nga yug bang, ya sana ra fel’ u wan’ Got ni nge pagem ngam yibil ngam bucheg wa’athrad u rom ni fan ngog." 28 Me fek Balak Balaam nga p’ebugul e burey ni Peor, ni yira par riy ma yibe guy daken e ted ni desert. 29 Me ga’ar Balaam ngak, "Mu ubung medlip e altar u roy, ma ga fek medlip e garbaw nge medlip e saf i yib ngog." 30 Me rin’ Balak ni bod nike yog ngak, mra reb e e pi altar nem me maligachnag reb e garbaw ni pumo’on nge reb e saf ni pumo’on u daken.