NUMBERS 21

Piyu Israel nra gelgad ngak yu Kanaan

1 Pilung nu Arad, ni be’ u Kanaan ni i par ko ley ni yimuch e nam nu Kanaan, e fa’ani rung’ag ni be yib piyu Israel u Atharim, me m’ag e mael ngorad nge kol boch i yad. 2 Me micheg piyu Israel bbugithin ngak SOMOL ni lungurad, "Fa’an ga ra pi’ e pi girdi’ ney nga pa’mad ma ri gamad ra gathey e pi binaw rorad." 3 Me rung’ag SOMOL e meybil rorad me ayuwegrad ngar gelgad ngak piyu Kanaan. Me thang yu Israel owcherad miyad kirebnag e pi binaw rorad, miyad tunguy yu Hormah*21:3 HORMAH: Fan e re ngachal ney ni Hebrew e "mogothgoth." ko gin’em.

Fare Porchoyog nni ngongliy ko bronze

4 Me chuw piyu Israel ko burey ni Hor ngranod ko fare pa’ i kanawo’ ni yan ko fa gi day ni Red Sea, ni fan e ngar liyeggad u wuru’ yu Edom. Ma nap’an ni yad be yan ma dakiyag ni ngar gum’an niged yad, 5 miyad non nib togopluw ngak Got nge Moses ni lungurad, "Mangfan ni mfekmad u Egypt ni nggu m’ad u roy u daken e re gi ted ney ndariy e ggan nge ran riy? Ya kar gu dabuyed e tiney e ggan ni gamad be kay!" 6 Me pi’ SOMOL e porchoyog ni bay e yub u l’ugunrad ngarbad nga fithik’ piyu Israel, me k’ad e porchoyog bo’or i yad ngarm’ad. 7 Me yib e girdi’ ngak Moses me lungurad, "Kug denengad ya kug nonod nib togopluw ngak SOMOL nge gur. Mu meybil nagmad ngak SOMOL nge chuweg e pi porchoyog ney romad." Ma aram me meybil Moses ni fan ko fapi girdi’. 8 Me yog SOMOL ngak Moses ni nge ngongliy ba porchoyog ni wasey nge tay nga p’ebgul ba ley i gek’iy ni fan e nge k’ad e porchoyog be’ ni yan i changar ko re porchoyog ni wasey nem ma dabki yim’. 9 Me ngongliy Moses ba porchoyog ko wasey ni bronze nge tay nga p’ebgul ba ley i gek’iy nge suweg ngalang. Mra k’ad e porchoyog be’ me yan i sap ko re porchoyog ni bronze nem ma dabki yim’.

Milekag i yan nga Moab

10 I yan piyu Israel ngranod ra n’ufed e Tent rorad nga Oboth. 11 Tomuren nra chuwgad u Oboth, mranod ra pired nga Abarim ni bang i daken e ted ni bay ngalan e ngek ko binaw nu Moab. 12 Miyad chuw u rom ngranod ra pired ngalan e loway u Zered. 13 Mu ku ra chuwgad u rom ngranod ra pired nga ba’ ni lel’och e Lul’ nu Arnon, ni bang i n’en ni go’ garger nib wub ngalan e binaw nu Amor. (Arnon e mathil u thilin yu Moa ngu Amor.) 14 Iraram fan ni Fare Babyoren e Mael rok SOMOL e ga’ar riy ". . . fare binaw nu Waheb u lan yu Sufah, nge fapi loway; fare Lul’ nu Arnon, 15 nge yungi n’en nib log ngalan e yupa’ i loway nib wub i yib ko binaw nu Ar me yan u rom ko mathil nu Moab."

16 Mu ku ra chuwgad u rom ngranod ngabang i n’en ni yima yog yu Wells ngay, ni aram e gin ni ga’ar SOMOL riy ngak Moses, "Mu kunuy e girdi’ nga ta’bang, ma bay gu pi’ e ran ngorad." 17 Aram e ngiyal’ ni yin’ e girdi’ nu Israel e re tang ni ba’aray:

"Luwed mu pi’ e ran;

Ma bay gun’ed tangin —

18 Fare luwed ni fu’og e pumo’on ni fak e pilung,

Nge pi’in yad ma yog e thin,

Nni ker ngab sog ko pilung

Nge pi sog rorad."

Miyad chuw u daken e ted ngranod nga Mattanah, 19 miyad chuw u rom ngranod nga Nahaliel, mranod u Nahaliel nga Bamoth, 20 miyad yan u Bamoth nga loway ko binaw nu Moab, u to’oben p’ebgul e Burey nu Pisgah, ni yira guy riy daken e ted.

Pilung Sihon nge Pilung ni Og e ra Waergow

21 Me pi’ yu Israel e thin ngak Sihon ni Pilung nu Amor nra ga’argad: 22 "Mu pagmad nggu warod u lan tafnam; dab gu thum’gad nga daken e flang rom fa milay’ rom; ma dab gu unumed e ran ko luwed rom; nggu warod u Kanawo’ ko Pilung, nge taw ko ngiyal’ ni kug thumurgad u daken tafnam." 23 Machane Sihon e de pag yu Israel ni nga ranod u lan tafen. I kunuy e pi salthaw rok nga ranod ngak piyu Israel nga daken bang i ted, rabad nga Jahaz ngar chamgad ngak yu Israel. 24 Ma piyu Israel e rli’ed bayo’or e salthaw ko mael ngar koled e binaw rorad ni tabab ko Lul’ nu Arnon nge yan u rom nga Jabbok, nge mus ko Ammon, ni bochan e mathil nu Ammon e bfel’ rogon ni yima matanagiy. 25 Ma aram me kol e girdi’ nu Israel urngin e binaw rok piyu Amon, nib mu’un yu Heshbon ngay nge urngin e yochi binaw nib liyeg, ngar pired riy. 26 Heshbon e tafen e pilung ko Amorite ni aram Sihon ni Pilung, ni fa’ani cham ko fabin ni immoy e pilung u Moab nge kol urngin e binaw rok ni ga’ngin ni yan nge mda ko Lul’ nu Arnon. 27 Aramfan ni yon’ fapi girdi’ nma tung tang e tang ni ga’ar,

"Moy nga Heshbon, ko binaw rok Sihon ni Pilung!

Gamad ba’adag ni ngan fal’eg bayay ngki sul nga rogon.

28 Immoy bingyal’ ni re binaw nem nu Heshbon

e yan e salthaw rok Sihon riy nga m’on ni gowa ba nifiy;

I gathay fare binaw nu Ar u lan yu Moab

Me ful’ e yochi burey ni bay nga talang u Arnon.

29 Gafgow gimed e girdi’ nu Moab; gimed e pi’in gimed be tayfan Kemosh e kam awgad nga fithik’ e kireb!

Fare got romed e ke pag e pumo’on kar malethaygad,

ma pi’in ni ppin e kar manged kalbus ko pilung nu Amor.

30 Ma chiney e kan thang mit e pi’in owcharad,

Ni mus u Heshbon nge yan nga Dibon,

me yan u rom nga Nashim nge yan nga Nofah, u charen yu Medeba."

31 Ma aram me dumow yu Israel u daken e binaw nu Amor ngar pired riy, 32 me l’oeg Moses boch e pumo’on ni nga ranod ngar gayed e re kanawo’ ni bfel’ ni ngar chamgad ko fare binaw nu Jazer. Ma aram me kol yu Israel yu Jazer ngar thabay niged e pi yochi binaw u langgin ngar tulfed e pi Amor ni yad ma par u rom.

33 Ma aram me cheal yu Israel ngranod ko kanawo’ i yan nga Bashan, ma Og ni Pilung nu Bashan e rabad e salthaw rok ni ngar chamgad ngorad u Edrei. 34 Me ga’ar SOMOL ngak Moses, "Dab mu tamdag ngak. Ya kug pi’ ngom ni ngam gel ngak, nge urngin e girdi’ rok, nge binaw rok; mu rin’ ngak e n’en nim rin’ ngak Sihon, ni fare pilung ko Amor ni i gagiyeg u Heshbon." 35 Ere thang yu Israel e fan rok Og, nge pifak ni pumo’on, nge urngin e girdi’ rok, nde aw bagyad, ma aram miyad tafnay fare binaw rok.