1 U lan e tafelf’el’ u Moab, u cheren e Jordan ni ba’ yu Jeriko nga barba’ riy, e ga’ar SOMOL riy ngak Moses,✝ 2 "Mog ngak piyu Israel ni binaw rorad ni kan pi’ e ngar pi’ed boch e binaw riy ko pi Levite ngar pired riy nge yu yang u to’oben ni ngu’ur chugliyed e gamanman rorad riy. 3 Pi binaw ney e nge tafnay e Levite ni ngar pired riy. Ma binaw ni nge par e gamanman riy e fan ko garbaw nge gubin e tin kabay e gamanman rorad. 4 Binaw ni nge par e gamanman riy e tabab ko yoror ko binaw nge yan nga wuru’ e binaw ni lal-mir’ay e yard nga orel u gubin raba, 5 nge yan i par ni bang i ban’en ni ta’reb folen u gubin raba’ ni aram e bbiyu’ e yard u gubin raba’, ma lulukngun e yibe par riy. 6 Ngam pi’ed ko pi Levite n’el e binaw ni nge tafnay e pi’in ni kar milgad ni bochan e kar li’ed be’ ni gathi leam rorad. Mu kum pi’ed aningeg i ragag nge l’agruw e binaw ngar pired riy 7 nib mu’un e binaw ni tagil’ e chugol gamanman ngay me yan i gaman aningeg i ragag nge meruk u gubin. 8 Urngin e binaw ni nge tafnay e pi Levite ni nge pi’ reb e ganong nge reb e be yan u rogon ga’ngin e binaw rok reb e ganong nge reb."

9 I yog SOMOL ngak Moses 10 ni nge ga’ar ko girdi nu Israel: "Nap’an ni gimed ra th’ab fare Lul’ nu Jordan nga daken e but’ nu Kanaan, 11 ma gimed e ngam mel’egged e yung i binaw nrayag ni nge mil be’ ngay ni nge ayweg e pogofan rok ni fa’anra ke li’ be’ keyim’ ni kal riy. 12 Ma girdi’en fare mo’on nike yim’ e dabyag ni ngar falbiy gad ngar li’ed fare mo’on u rom. Be’ ni kan oloboch ngak nike fek reb e pogofan e dab ni li’ ngem’ ni dawor ni pufthinnag u mit e girdi’ ni yo’or. 13 Mu mel’eged nel’ e binaw, 14 ni dalip riy e bay ko ngek u Jordan ma dalip e bay u lan e binaw nu Kanaan. 15 Pi binaw nem e nge par ni tafen e ayuw rok demturug be’ nma par u Israel ni kal nge li’ be’ nge yim’.

16-18 "Fa’anra fek be’ talin e cham ni wasey fa malang fa ba ley i ren nge li’ be’ nge yim’, mab buch e rok ya ke thang reb e pogofan ma yira li’ nge yim’. 19 Ma en girdi’en nriyow ba chugur fa’anem nike yim’ e ir e nge milfan ngak nge thang e fan rok fa en ke cham. Ma nap’an nra pir’eg fa’anem ma nge li’ nge yim’.

20 "Fa’anra be’ ni be fananikay be’ me thang e fan rok ni thuruy nga but’ fa pag ban’en ngak 21 ara tuguy, ma bbuch e rok ko mathang pogofan nike rin’ ma ir e yira thang e fan rok. Ma be’ ni girdi’en facha’ nike yim’ ni en thabi chugchur ngak e ir e nge milfan ngak nge thang e fan rok facha’ nike thang e fan. Nap’an nra pir’eg facha’ me li’ nge yim’.

22 Machane fa’anra kal be’ nge thang e fan rok be’ nde fananikay, ni demturug ko thuruy nga but’ ara pag ban’en ngak. 23 Fa kal riy nge yin’ ba malang ni derguy facha’ me aw ngak nge yim’, ni gathi leamnag ni nge kal ngak ma ku gathi be’ ni yow ba tathil. 24 Ra buch ban’en ni arrogon ma girdi’ ko fare binaw e ngar turguyed ni bfel’ e rok fa’anem ni ir tapgin e yam’ ni tay facha’ ma dab ra folgad nga girdi’en fare yam’ ni karbad ni ngar filed biyen. 25 Girdi’ ko fare binaw e ngar ayuweged e cha’ nike thang e pogofan u pa’ e girdi’ rok facha’ nike yim’. Miyad pi’ facha’ nge par u reb fapi binaw ni tagil e ayuw. Me par u rom nge mada ko ngiyal nike yim’ fare Prist ni Th’abi Ga’. 26 Ma fa’anra chuw fa’anem, nike cham, ko fare binaw ni tagil’ e ayuw 27 ma fa’anra pir’eg be’ ni girdi’en fare yam’ fa’anem nge li’ nge yim’, ma dab ni gechignag fa en ke cham. 28 Thangri par fa en ke cham u lan fare binaw nge mada’ ko ngiyal’ nike yim’ fare Prist ni Th’abi Ga’; kemus e ngiyal’ nrayag ni sul riy nga tafen. 29 Tiney e yalen e ngam folgad riy nge pi’in owchenmed ni demturug bang ni gimed ra par riy.

30 Be’ ni kan oloboch ngak nike li’ be’ ke yim’ e rayag ni ngan duwgiliy nib buch e rok min li’ nge yim’ ni kemus fa’anra micheg l’agruw fa dalip e girdi’; ma dab ni fanay ni fa’anra ta’abe’ e nge micheg nib buch e rok fa en ke cham. 31 Cha’ nra li’ be’ ngem’ e thingar ni thang e iip pogofan rok. Dabiyag ni nge thay ko gechig ni fa’anra salpiy e nge pi’ ni puluwon. 32 Fa’anra mil be’ ngalan fare binaw ni tagil’ e ayuw ma dab ni pag nge pi’ puluwon ni nge sul nga tafen ni dawor i yim’ fare Prist ni Th’abi Ga’. 33 Dab mu ta’ay niged e binaw ni gimed be par riy; ya racha’ e ma ta’aynag e binaw, dabyag i labgiy puluwon e binaw, ni fan e rache’ nni pu’og u daken, kemus ni rachaen fa en ni pu’og e racha’ e ra labgiy. 34 Dab mu ta’ay niged e binaw ni gimed be par riy, ni ku aram e gin ni gu ma par riy; ya Gag SOMOL e gu ma par u fithik’ piyu Israel."