1 A siɲa sawana de ten n ye nala ai wara. A sɛbɛnin Kitabu kɔndɔ ko, «Ko bɛɛ ye ɲabɔla sereya fila wala sawa kumakan de ma.»* 2 N tɛrɛ ra ai lalɔn n na filana rɔ ai tɔrɔfɛ. Baa n tɛ ai tɔrɔfɛ ten, n ye a fɔ wo mɔɔilu yɛ ikɔ tuun mɛnilu tɛrɛ ra julumun kɛ a damira a ni doilu bɛɛ, n ka a fɔ ko, n wa na ai tɔrɔfɛ butun, n ti nala ai kun mafɔla ai julumunilu la ko rɔ, 3 baa ai ye ɲininkali kɛla diyagboya la ko ka sereyailu yiraka ai la ko Ɲenematɔmɔnin ye kumala nde le rɔ. Ale fanka dɔɔyanin tɛ ai la ko rɔ, kɔni fankama le ale ri ai tɛma. 4 Baa a gbɔngbɔnda le jiri kan fankatanya rɔ, adon a ɲenema le Alla la fanka baraka rɔ. An fanan da kɛ fankatanilu ri ale rɔ, adon an ni a ɲenema le Alla fanka baraka rɔ, ka baara ai yɛ.

5 Ai ye ai jɛrɛ lakɔrɔsi, kosa ai ye a lɔn ni ai lemɛniyanin. Ai ye ai jɛrɛ fɛsɛfɛsɛ. Ai ma a lɔn wa ko Isa Ɲenematɔmɔnin ye ai rɔ? Fɔɔ ka a tɛrɛn de, ai ra bɔnɔ fɛsɛfɛsɛli rɔ. 6 N jii lanin a rɔ, ai ri a lɔn ko an ma bɔnɔ fɛsɛfɛsɛli rɔ. 7 An ye Alla matarala ko ai ti nala kojuu si kɛla. An tɛ wo fɛ kosa jama ye a lɔn ko an da fanka sɔrɔn fɛsɛfɛsɛli rɔ, kɔni kosa ai ye koɲuma kɛ, hali a kɛnin ikomin an tun da bɔnɔ fɛsɛfɛsɛli rɔ. 8 Baa an ti se foyi kɛla Alla la tuɲa kanma, kɔni an di tuɲa kɛ dɔrɔn. 9 An sɛwanin fanka tɛ an na, kɔni fanka ye aile la; a ni an ye Alla matarala le ko ai ye dafa. 10 Wo le rɔ, n ye ko ɲinilu sɛbɛla ai ma, n tɛ ai tɔrɔfɛ tuma mɛn na, kosa n wa na ai tɔrɔfɛ, n kana ai mira a gbɛlɛnman na n na sebaya rɔ, Maari ka sebaya mɛn don n bolo ai lawakali ko la yani a ye ai halaki.

11 Tɔɔ la, n badenmailu, ai ye sɛwa. Ai ye karan ka dafa, ka ai ɲɔɔn nalemɛniya, ka to hankili kelen ni jususuma rɔ. Kaninteya tii ni jususuma tii Alla ri to ai fɛ.

12 Ai ye ai ɲɔɔn tuwa badenmaya tuwali sunbuli rɔ. Jama sɛniman bɛɛ ye ai tuwala.

13 Maari Isa Ɲenematɔmɔnin na hina ni Alla la kaninteya ni Alla la Nii Sɛniman bɛn ye to ai bɛɛ fɛ.