1 Ai ye dɛmɛnnin mɛn kɛla ka bɛn jama sɛniman ma, a tɔnɔ tɛ ye ka bataki sɛbɛ ai ma ka bɛn wo ma. 2 Baa, n ka a lɔn ko ai ɲɛnikɛ ka ɲin. N ye tola ai matɔɔla Masedonikailu yɛ, n ka a fɔ ko, «Kɛbi sɛrun, Akayakailu rabɛnnin dɛmɛnnin ko rɔ.» Ai ra mɔɔ siyaman nakunfan ai la wakali rɔ. 3 Kɔni, n ye badenma doilu lawala ai ma kosa an ka ai matɔɔ ɲa mɛn ma, wo kana kɛ ko fuu ri. Kɔni a ye tɛrɛn ai rabɛnnin ikomin n ka a fɔ ɲa mɛn ma. 4 Ni Masedonika do nara n kɔfɛ ai tɔrɔfɛ, ii ye a tɛrɛn ai rabɛnnin tɛ, an tun di maloya wo rɔ baa an da la ai la, kɔni katara aile ma. 5 Wo le rɔ, n da a miri ko, a bɛnnin n ye badenma doilu madiya, ka wa ai tɔrɔfɛ n ɲɛrɔ, ai ye wo fonesereya sɔlifen dabɛn, ai tun da lahidi mɛn na kosa a ye di fonesereya rɔ yani a ye kɛ diyagboya ri.

6 Ai ye ai hankili to ɲin dɔ: mɛn wa si dɔɔnin foyi, wo ye dɔɔnin de kala. Kɔni mɛn wa si ba foyi, wo ri siyaman ka. 7 Bɛɛ ye sɔli kɛ ikomin a ra a latɛɛ a jusu rɔ ɲa mɛn ma. A kana kɛ nimisa ri wala diyagboya. Mɛn ye sɔli kɛla sɛwa rɔ, wo tii duman Alla yɛ. 8 Alla ri se ai sɔla a la hina dafanin dɔ kosa a ye ai makoilu ɲa ko bɛɛ rɔ waati bɛɛ, ka do fanan to ai bolo baara ɲumailu bɛɛ kɛ diya. 9 A sɛbɛnin Kitabu kɔndɔ ko,

«A ra bolokolonilu sɔ fonesereya rɔ.

A la telenbaya ye tola le habadan!»*

10 Nba, Alla mɛn ye si dila sɛnɛkɛla ma a ni dɔɔnnifen, wo ri si di ai ma, ka a lasiyaya, ka ai la telenbaya baara nɔilu lawara. 11 Ai ri kɛ fen tiilu ri ɲa bɛɛ ma, kosa ai ye to fonesereya rɔ waati bɛɛ. Wo rɔ, mɔɔ siyaman di baraka bila Alla yɛ, an wa ta ai la dinmalifenilu ri ii ma. 12 Baa ai ye baara mɛn kɛla ɲin di, wo tɛ jama sɛniman makoilu le gbansan ɲala, kɔni a fanan di kɛ sababu ri mɔɔ siyaman di baraka bila Alla yɛ. 13 Mɔɔ siyaman di Alla gbiliya ten ai la baara ɲin tɔnɔ fɛ, baa ai ra sɔn Ɲenematɔmɔnin na kibaro ɲuma rɔ ka wo sila taama a ɲa ma. Ii ri Alla gbiliya ai la fonesereya la ko rɔ baa ai ye ii sɔla ai la fenilu rɔ a ni mɔɔ bɛɛ. 14 Wo le rɔ, ii ri Alla matara ai yɛ kaninteya rɔ Alla la hina ba la ko rɔ a ka mɛn di ai ma. 15 An ye baraka bila Alla yɛ a la dinmalifen na ko rɔ mɛn ɲɔɔn tɛ ye!