Atos 12

Mansa Herodi ka lemɛniya mɔɔilu tɔrɔ

1 Wo tuma, mansa Herodi wulira ka lemɛniya jama doilu mira ka ii ɲakankatan. 2 A ka Yuhana kɔrɔcɛ Yakuba faa fanmuru la. 3 Mansa Herodi ra yen ko Yakuba faa diyara Judiyailu yɛ tuma mɛn na, a ka Piyɛri fanan mira. Wo kɛra Judiyailu la Buru Fununbali Sali waati le rɔ. 4 Nba, a ka Piyɛri mira ka a bila kaso la, ka a don tɛsidi mɔɔ tan ni wɔɔrɔ bolo ko ii ye ii janto a rɔ. A lɔɔ tɛrɛ ye Herodi la ko ni Taminkunna Sali taminda, ko a ri a la kititɛɛ mɔɔilu bɛɛ ɲana. 5 Wo rɔ, Piyɛri lamarara kaso la ye. Kɔni lemɛniya jama mɔɔilu ka ii raja Alla matarala a yɛ kosɛbɛ.

Piyɛri bɔra kaso la ɲa mɛn ma

6 A lɔɔ tɛrɛ ye Herodi la ka Piyɛri kiti sini ɲɔɔn. Wo su jɛrɛ rɔ, Piyɛri lanin tora sunɔɔ rɔ tɛsidi fila tɛma. Jɔlɔkɔ fila bilanin a bolo fila la. Kandanninna doilu fanan lɔnin da la ka ii janto a rɔ. 7 Wo yɔrɔni rɔ i kɔrɔ, Maari la mɛlɛka do bɔra gbɛ rɔ kasobon kɔndɔ. Kɛnɛya mɛlɛnda bon kɔndɔ. Mɛlɛka ka Piyɛri magbasi a kanbankun ma, ka a lakunun ko: «I kaliya, i wuli.» Jɔlɔkɔilu bɔra a bolo fila la ka be duu ma. 8 Mɛlɛka ka a fɔ ko: «I tɛsidi ka sanbara don i sen dɔ.» Piyɛri ka wo bɛɛ kɛ. Mɛlɛka ka a fɔ ko: «I la faanin bila i kan na ka i bila n kɔ.» 9 Piyɛri bilara a kɔ ka bɔ kaso la. A tun ma a lɔn ko mɛn kɛni mɛlɛka bolo, ko wo ye tuɲa le ri. Mɛlɛka ye ko mɛn kɛla wo kɛra a ɲana sibo le ri. A ye a kɔndɔ ko wo tɛ foyi ri fo sibo. 10 Ii taminda kasobon kɔnɔgbɛnna kuru fɔlɔ la, ka tamin kuru filana fanan na. Wo rɔ, ii sera so donda ba ma. Nɛɛkun de tɛrɛ wo ri. Ii seni ye, da wo lakara a jɛrɛ ma. Ii donda so kɔndɔ ka sila do mira. Ii ye wo taamanna tuma mɛn na, mɛlɛka bɔra Piyɛri kɔfɛ kelen di ka tunun a ma.

11 Mɛlɛka wani kɔ, Piyɛri hankili sɛra a ma. A ka a fɔ ko: «N da a lɔn sisɛn ko Maari le ka a la mɛlɛka lana n ma. A ra n bɔ Herodi bolo, ka n kisi kojuu bɛɛ ma, Judiyailu tɛrɛ ye a fɛ ka mɛn kɛ n na kɔnin.»

12 Piyɛri ka wo ɲayen tuma mɛn na, a wara Yuhana na Mariyamu wara. Mɔɔilu ye a fɔla Yuhana mɛn ma ko Marika. Mɔɔ siyaman nadɛnnin tɛrɛ Mariyamu wara ye ka Alla matara. 13 Piyɛri sera ye ka lu da makɔnkɔn. Baaraden muso mɛn tɔɔ ko Roda, wo nara da la, ka lakɔrɔsili kɛ. 14 A ka Piyɛri kan mɛn tuma mɛn na, a sɛwara kojuuya, a ɲinara da laka ko rɔ. A ka i bori ka wa a fɔ mɔɔ bɛɛ yɛ ko Piyɛri lɔni da la kɛnɛ ma. 15 Roda ka Piyɛri na ko fɔ tuma mɛn na, ye mɔɔilu ka a jabi: «Fatɔ le i ri wa?» Kɔni Roda ka a fɔ ka a magbɛlɛnya ko: «Ale le jɔ!» Ii ka a fɔ ko: «Ale tɛ. A la mɛlɛka le.» 16 Kɔni Piyɛri tɛrɛ ye da makɔnkɔnna kosɛbɛ. Ii wara da laka tuma mɛn na, ii ka Piyɛri yen ka kabannakoya kojuuya.

17 Piyɛri ka a bolo lawuli ko ii ye ii sabari. Maari ka a labɔ kaso la ɲa mɛn ma, a ka wo lase ii ma. Ko ii ye wo bɛɛ fɔ Yakuba ni ii badenmailu yɛ. Wo kɔ rɔ, a bɔra ye ka wa yɔrɔ gbɛrɛ rɔ.

18 Nba, wo duu sa gbɛ, Piyɛri tunun ko ka tɛsidiilu kɔndafili kosɛbɛ. 19 Herodi ka a ɲinin fan bɛɛ rɔ, kɔni a ma a yen. Wo rɔ Herodi ka kasobon kɔnɔgbɛnnailu kili ka woilu fɛsɛfɛsɛ, ka ban ka ii mira ka ii faa.

Nba, Herodi bɔra Jude ka wa tele dɔndɔ kɛ Sesare.

Herodi faara ɲa mɛn ma

20 Herodi mɔnɛni tɛrɛ kojuuya Tirikailu ni Sidɔnkailu kanma. A lɔɔ tɛrɛ ye ii la ka kɛlɛ wo ban, ka a masɔrɔn ii la jamana balo ye bɔla mansa Herodi la jamana le rɔ. Wo rɔ, ii ka i ɲɔɔn yen ka mɔɔilu lɔ Herodi madiyala. Kɔni ii ka teriya don ii ni Bilasitusi tɛma fɔlɔ. Bilasitusi wo le Herodi la ɲɛmɔɔba ri. Wo bolo ma, ii wara Herodi tɛrɛn, ka a madiya ko a ye kɛlɛ ban.

21 Lon mɛn fɔni Herodi bolo, ii bɛɛ ka ii ladɛn. Herodi ka a la mansaya duruki bila a kan na, ka i sii a la kititɛɛ siifen dɔ, ka kuma ii bɛɛ ɲana. 22 Jama bɛɛ ka ii kan nabɔ kosɛbɛ ko: «Mɔɔ kan tɛ ɲin di. Maari do le kan ye ɲin di!» 23 Maari la mɛlɛka ka jankarɔ bila Herodi la i kɔrɔ, ka a masɔrɔn a ma bonya di Alla ma fɔɔ jɛrɛ. Tunbu donda a fari rɔ ka a dɔɔn. A faara wo rɔ.

24 Nba, mɔɔ mɛnilu ka Alla la kuma mɛn ka lemɛniya a ma, woilu tɛrɛ ye siyayala kosɛbɛ kosɛbɛ.

25 Barinabasi ni Sawuli banda ii la baara la tuma mɛn na, ii ka Yuhana ta ka ii kɔsɛ Jerusalɛmu. Mɔɔilu ye a fɔla Yuhana wo ma ko Marika.