Marcos 4

Kuma kɔrɔlama Sifoyila ma

1 Nba, Isa ka mɔɔilu karan damira ikɔ tuun dala dala. Mɔɔ siyaman ba nara ii ladɛn a tɔrɔfɛ. Wo rɔ, a donda kulun do kɔndɔ ka a sii, ka ii mabɔ gbelema la dɔɔnin. Jama bɛɛ tora gbelema. 2 A ka ii karan ko siyaman na kuma kɔrɔlamailu rɔ. Ka a to ii karanna, a ka a fɔ ii yɛ ko: 3 «Ai ye ai tolo malɔ kosɛbɛ. Sɛnɛkɛla do bɔra ka wa si foyi diya a la sɛnɛ rɔ. 4 Si foyitɔla, si doilu bera sila dala. Kɔnɔilu nara wo bɛɛ dɔɔn. 5 Si doilu bera farama yɔrɔ kan, banku ma siya yɔrɔ mɛn. Si woilu fɛrɛnda jonna, baa banku tɛrɛ ma siya. 6 Tele bɔra tuma mɛn na, ii mɔrɔmɔrɔra. Ii jara, baa ii lulu ma jii duu rɔ bakɛ. 7 Si doilu bera nɔnbɔwɔninma yɔrɔ rɔ. Sumanilu wulira mɛn kɛ, wɔninilu fanan wulira ka ii dɔɔn, fɔɔ ii ma se ii denna. 8 Nba, si doilu fanan bera duu duman dɔ. Suman woilu sɔnda kosɛbɛ. Si doilu ka ii ɲɔɔn bisawa (30) kɛ, doilu ka ii ɲɔɔn biwɔɔrɔ (60) kɛ, doilu ka ii ɲɔɔn kɛmɛ (100) kɛ.»

9 Isa bannin wo fɔla, a ka a fɔ ii yɛ ko: «Kuma mɛn tolo ye mɔɔ mɛn ma, wo ye a tolo malɔ kuma wo la.»

Isa ka kuma kɔrɔlamailu fɔ kun mɛn na

10 A kelen tɛrɛ ye waati mɛn na a ni a lamininni tɛrɛ mɛnilu la a ni karanden tan ni fila ka ii masɛ jama la ii ka a maɲininka a la kuma kɔrɔlama kɔrɔ ma. 11 A ka a fɔ ii yɛ ko: «Alla la mansaya ko mɛn doonnin tɛrɛ, wo lɔnnin da di aile ma. Kɔni ko bɛɛ ye fɔla mɔɔ tɔilu yɛ kuma kɔrɔlamailu le rɔ, 12 kosa,

«‹Ii ri ragbɛli kɛ tuma bɛɛ, kɔni ii tɛ foyi yen.

Ii ri kuma lamɛn tuma bɛɛ, kɔni ii tɛ foyi famun.

Ni wo tɛ, ii tun di ii kɔsɛ Alla ma, a tun di yafa ii ma.›»

Isa ka sifoyila la kuma kɔrɔlama kɔrɔ fɔ

13 Isa ka a fɔ ii yɛ ikɔ tuun ko: «Ai ma kuma kɔrɔlama ɲin famun wa? Ai don di kuma kɔrɔlama tɔilu famun di?

14 «Sifoyila ye le ikomin mɔɔ mɛn ye Alla la kuma lasela. 15 Si mɛnilu bera sila dala. Yɔrɔ wo ye mɔɔ doilu le munuɲa ri. Mɔɔ woilu wa Alla la kuma lamɛn, Setana ri na i kɔrɔ ka kuma wo bɔ ii jusukun dɔ. 16 Si mɛnilu bera farama yɔrɔ kan. Yɔrɔ wo fanan ye mɔɔ doilu le munuɲa ri. Mɔɔ woilu wa Alla la kuma lamɛn, ii ri a mira ka sɛwa. 17 Kɔni kuma wo ti sabati ii jusukun dɔ bɛrɛ bɛrɛ kɛ. Ii tɛ mɛn bakɛ lemɛniya sila kan. Baa ni gbɛlɛnya ka ii sɔrɔn, wala ni mɔɔilu ka ii tɔrɔ Alla la kuma kosɔn, ii ri sila bila i kɔrɔ. 18 Awa, si mɛnilu bera nɔnbɔwɔninma yɔrɔ rɔ. Yɔrɔ wo fanan ye mɔɔ doilu le munuɲa ri. Mɔɔ woilu ka Alla la kuma lamɛn. 19 Kɔni dunuɲa koilu hamin di don ii jusukun dɔ. Nanfulu lɔɔ ri ii mira ka ii magbɛrɛn kɛ. Fenilu nata ri gba ii la. Ko woilu bɛɛ kosɔn, Alla la kuma ri mabali ii jusukun dɔ, ka kɛ ikomin sɛnɛrɔfen denbali, mɛn ma den kɛ a la. 20 Nba, si mɛnilu fanan bera duu duman dɔ. Yɔrɔ wo ye mɔɔ doilu le munuɲa ri. Mɔɔ woilu ye Alla la kuma lamɛnna ka sɔn a ma. Kuma wo ri sabati ii jusukun dɔ. Wo rɔ, ii ye le ikomin suman si, mɛn ye ɲala ka a ɲɔɔn bisawa (30) kɛ, wala a ɲɔɔn biwɔɔrɔ (60) wala a ɲɔɔn kɛmɛ (100).»

Kuma kɔrɔlama Fitinna la ko rɔ

21 Isa ka a fɔ ii yɛ ikɔ tuun ko: «A ye di? Mɔɔ ri na fitinna lamɛlɛnnin di ka a bila see kɔrɔ wa, wala lafen kɔrɔ? A tɛ a sii fitinnasiifen kan wa? 22 Nba, ko ko doonnin, wo bɛɛ ri lɛnkɛnɛmaya. Gbundu ko si tɛ ye, mɛn tɛ bɔ gbɛ ma. 23 Kuma mɛn tolo ye mɔɔ mɛn ma, wo ye a tolo malɔ kuma wo la.»

24 Isa ka a fɔ ii yɛ ikɔ tuun ko: «Nba, ai ye kuma mɛnilu lamɛnna, ai ye ai miri woilu ma kosɛbɛ. Baa Alla ri ai sɔ ka a bɛn ai la kuma lamɛn kɛ ɲa ma. A ri do fanan la wo kan. 25 Baa fen ye mɛn bolo, do ri la wo tii ta kan. Kɔni fen tɛ mɛn bolo, hali fitini mɛn ye a bolo, wo ri mira a la.»

Alla la mansaya ye ikomin suman si

26 Isa ka a fɔ ikɔ tuun ko: «Alla la mansaya ye ɲa mɛn ma, ale le ɲin di. A ye le ikomin cɛɛ mɛn ka suman si foyi a la sɛnɛ rɔ. 27 Wo kɔ rɔ, cɛɛ wo wa to sunɔɔla su rɔ, ka wuli sɔɔma. Su ni tele suman si wo ye fɛrɛnna ka wuli. Kɔni a tii ma a lɔn wo ye kɛla ɲa mɛn ma. 28 Baa duukolo ri suman nafɛrɛn a jɛrɛ ma. Suman di wuli ka kɛ kala ri fɔlɔ, ka ban ka a tɔnsɔn nabɔ. Wo kɔ rɔ, a kisɛilu ri kɛ a tɔnsɔn na. 29 Ni kisɛ woilu mɔra tuma mɛn na, a tii ri wɔrɔtɔ ta ka a ka damira. Baa sumanka waati ra se.»

Kuma kɔrɔlama Bɔrɔn fira kisɛ la ko rɔ

30 Isa ka a fɔ ikɔ tuun ko: «An di se Alla la mansaya lala nfen ma? A ye ɲa mɛn ma, an di kuma kɔrɔlama ɲuman fɔ ka wo yiraka? 31 A ye ikomin bɔrɔn fira kisɛ, an wa mɛn lan duu rɔ, hali a dɔɔman ka tamin duukolo kan kisɛ bɛɛ la, 32 kɔni ni mɔɔilu wa a lan, a ri wuli ka bonya ka tamin nakɔfen bɛɛ la. A ri bolon bailu labɔ, fɔɔ sankolo kɔnɔilu ri se ii ɲaan lala a bolon lulen na.»

33 Isa tɛrɛ ye Alla la kuma lasela ii ma kuma kɔrɔlama ɲin ɲɔɔn siyaman de rɔ. Mɔɔilu ri se ko ɲayenna ɲa mɛn ma, a ka ii karan wo ɲa le ma. 34 A ma kuma si fɔ ii yɛ ni a ma kuma kɔrɔlama fɔ ii yɛ. Kɔni a ni a la karandenilu wa kɛ ii dan na, a ri kuma kɔrɔlama bɛɛ kɔrɔ fɔ ii yɛ.

Isa ka fɔɲɔ ba lalɔ

35 Nba, wo lon jɛrɛ wura dafɛ, Isa ka a fɔ a la karandenilu yɛ ko: «An ye wa dala kɔma.» 36 Wo rɔ, karandenilu ka jama to ye ka don kulun kɔndɔ, Isa siinin mɛn kɔndɔ. Ii wara a ri ji kan kulun wo kɔndɔ. Kulun gbɛrɛilu bilanin tɛrɛ ii kɔfɛ fanan. 37 Ka ii to ji kan, fɔɲɔ ba do tɛɛra. Jikuru bailu wulira ka don kulun kɔndɔ, fɔɔ kulun fatɔ le tɛrɛ ji la. 38 Kɔni Isa lanin tɛrɛ sunɔɔ rɔ kulun jula, a kun lanin tɛrɛ kunkɔrɔla do kan. Karandenilu ka a lakunun, ka a fɔ a yɛ ko: «Karanmɔɔ, an satɔ le. Wo tɛ i ɲana foyi ri wa?»

39 Isa kununda ka fɔɲɔ makuma. A ka a fɔ dala ji yɛ ko: «I sabari, i makun.» Fɔɲɔ lɔra ka jilimalɔ bakɛ. 40 Isa ka a fɔ a la karandenilu yɛ ko: «Nfenna ai ye silanna ten? Ai ma lemɛniya fɔlɔ wa?» 41 Ii silanda kojuuya. Ii tɛrɛ a fɔla i ɲɔɔn yɛ ko: «Ɛɛ! Cɛɛ ɲin ye mɔɔ su ɲuman di? Hali fɔɲɔ ni dala ji ye a kan mirala.»