1 Wo kɔ rɔ, Farisi doilu ni sariya karanmɔɔ doilu bɔra Jerusalɛmu ka na Isa tɛrɛn. 2 Ii ka a maɲininka ko: «Nfenna i la karandenilu ye an benbailu la namun tiɲanna? Ii ye dɔɔnnin kɛla ka a tɛrɛn ii ma ii bolo lako fɔlɔ.» 3 Isa ka a fɔ ii yɛ ko: «Ai don? Nfenna ai ye ai la namunilu bonyala ka Alla la sariya tiɲan? 4 Baa Alla ka a fɔ ko: ‹I ye i na ni i fa bonya.› Ko: ‹Ni mɔɔ mɛn ka a fa wala a na danka, wo tii ka kan ka faa le.› 5 Kɔni ai ka a fɔ ko mɔɔ ri se a fɔla a fa wala a na yɛ ko: ‹I ka kan ka dɛmɛnfen mɛn sɔrɔn n bolo, n da wo bila a dan na Alla yɛ.› 6 Ai ka a fɔ ko ni a ka a fɔ ten, a diyagboyanin tɛ butun ka a fa bonya niilifen na. Wo rɔ, ai ra Alla la kuma to ye, ka ai la namunilu bila a nɔ rɔ. 7 Ai jɛrɛmayuwailu, Esayi ka mɛn fɔ ai la ko rɔ fɔlɔfɔlɔ, wo bɛnnin kosɛbɛ. A ka a fɔ ko:

8 ‹Mɔɔ ɲinilu ye n bonyala ii da le la,

kɔni ii jusukun ma senin n na muumɛ!

9 Ii ye n batola fuu.

Ii ye mɔɔilu karanna mɛnilu la,

woilu tɛ foyi ri fɔɔ adamadenilu la jamariliilu.›»

10 Wo kɔ rɔ, Isa ka jama kili, ka a fɔ ii yɛ ko: «Ai bɛɛ ye ai tolo malɔ n na kuma la ka a famun. 11 Mɔɔ ye fen fen donna a da rɔ ka a dɔɔn, wo si ti se mɔɔ nɔɔla. Kɔni mɛnilu ye bɔla mɔɔ da rɔ, wo le ye mɔɔ nɔɔla.»

12 A la karandenilu ka ii madon a la, ka a fɔ a yɛ ko: «I ma a lɔn ko i la kuma gbara Farisiilu la wa?» 13 Isa ka a fɔ ko: «N Fa mɛn ye sankolo rɔ, ni wo jɛrɛ ma lannifen mɛn lan, woilu ri bɔ ka faa. 14 Ai ye Farisiilu to ye. Ii ye ɲa funyenilu le ri, ii jɛrɛ le ye i ɲɔɔn na gbeleke mirabailu ri. Ni ɲa funyen don ka ɲa funyen do la gbeleke mira, ii fila bɛɛ ri be denka rɔ.»

15 Piyɛri ka a fɔ Isa yɛ ko: «Kuma kɔrɔlama wo kɔrɔ fɔ an yɛ.» 16 Isa ka a fɔ ko: «A ye di? Ai fanan ma se ko ɲayenna wa? 17 Ai ma a ɲayen wa ko fen mɛn ye donna mɔɔ da rɔ, wo ye wala a kɔnɔ le rɔ? Wo kɔrɔ, fen wo ri bɔ. 18 Kɔni kuma mɛnilu ye bɔla mɔɔ da rɔ, woilu ye bɔla a jusukun de rɔ. Woilu le ye mɔɔ nɔɔla, 19 baa ko kɔrɔn mɛn ye bɔla mɔɔ jusukun dɔ, woilu le ɲin di: miriya juu, mɔɔfaa, kaninkɛla, jatɔya su bɛɛ, suɲali, sereya juu bɔ, a ni mɔɔ tɔɔ tiɲan. 20 Ko woilu le ye mɔɔ nɔɔla. Kɔni ka dɔɔnnin kɛ bolo lakobali la, wo tɛ mɔɔ nɔɔla.»

21 Wo kɔ rɔ, Isa bɔra yɔrɔ wo rɔ ka wa Tiri ni Sidɔn mara rɔ. 22 Ye muso do nara Isa tɛrɛn. Kanaanka le tɛrɛ a ri. A tɛrɛ ye a kule kan nabɔla ko: «Maari, Dawuda dencɛ, i ye hina n na. Jena do ye n denmuso tɔrɔla kojuuya!» 23 Kɔni Isa ma foyi fɔ. A la karandenilu ka ii madon a la, ka a madiya ko: «Muso ɲin gbɛn, baa a bilanin an kɔfɛ ka a kule kan nabɔ kojuuya.» 24 Isa ka a fɔ ko: «Alla ma n kelaya mɔɔ gbɛrɛ si ma ni Isirayɛlikailu tɛ, woilu mɛnilu ye ikomin saa tununninilu.» 25 Kɔni muso wo nara a be Isa sen kɔrɔ, ka a fɔ a yɛ ko: «Maari, i ye n dɛmɛn.» 26 Isa ka a fɔ ko: «Ka denninilu la dɔɔnnin fen ta ka a lafili wuluilu kɔrɔ, wo ti bɛn.» 27 Muso ka a jabi: «Maari, tuɲa le wo ri. Kɔni wuluilu ye dɔɔnnin buruburu dɔɔnna, mɛn ye bela duu ma ii tiilu la tabali kɔrɔ.» 28 Isa ka a jabi: «Aa, muso. I la lemɛniya ka bon! I ka mɛn ɲinin, a ye kɛ i yɛ.» A denmuso kɛndɛyara wo waati kelen.

29 Isa bɔra yɔrɔ wo rɔ, ka wa Kalile Dala da la. A yɛlɛra koyinkɛ do kan ka a sii ye. 30 Jama ba nara a tɛrɛn. Ii nara nambarailu ri, a ni ɲa funyenilu ni bolokelenilu ni boboilu ni jankarɔtɔ siyaman gbɛrɛilu. Ii nara woilu bɛɛ ri, ka ii lala Isa kɔrɔ. A ka ii bɛɛ lakɛndɛya. 31 Ii ka ii yen tuma mɛn na ko boboilu ra kuma damira, bolokelenilu ra kɛndɛya, nambarailu ra ii taama, a ni ɲa funyenilu ɲa ra laka; jama kabannakoyara. Ii bɛɛ ka Isirayɛlikailu la Maari Alla tando.

32 Isa ka a la karandenilu kili, ka a fɔ ii yɛ ko: «Jama ɲin kininkinin ye n na. Ii ra tele sawa le kɛ n dafɛ yan. Dɔɔnnifen si tɛ ii bolo. N tɛ a fɛ ka sila di ii kɔnkɔtɔ ma ten. Ni wo tɛ, ii ri kirɔn la sila la.» 33 Karandenilu ka Isa jabi: «An di buru sɔrɔn min wula kɔndɔ yan, mɛn di jama ba ɲin ɲɔɔn bɔ?» 34 Isa ka a fɔ ii yɛ ko: «Burukala yɛli ye ai bolo?» Ii ka a fɔ ko: «Burukala wɔrɔnwula, a ni jɛɛ mɛsɛnni dɔndɔ»

35 Isa ka a fɔ jama yɛ ko ii ye ii sii duu ma. 36 A ka burukala wɔrɔnwula ni jɛɛ woilu ta, ka baraka bila Alla yɛ, ka ii rakadikadi, ka ii di karandenilu ma. Karandenilu ka woilu ta ka ii ratalanna jama tɛma. 37 Jama bɛɛ ka dɔɔnnin kɛ ka ii fa. Buru kunkundun ni jɛɛ tɔ mɛn tonin, Isa la karandenilu ka see wɔrɔnwula lafa wo rɔ. 38 Cɛɛ mɔɔ waa naanin (4,000) ka dɔɔnnin kɛ. Musoilu ni denninilu ma jate. 39 A ka sila di jama ma, Isa donda kulun do kɔndɔ ka wa Makadan mara rɔ.