Mateus 23

Gbalo ye sariya karanmɔɔilu ni Farisiilu yɛ

1 Wo kɔ rɔ, Isa kumara jama ni a la karandenilu yɛ. A ka a fɔ ko: 2 «Ka mɔɔilu karan Musa la sariya la, se wo karifani Sariya karanmɔɔilu ni Farisiilu le la. 3 Wo rɔ, ii wa mɛn fɔ ai yɛ, ai ye wo labato. Kɔni ii jɛrɛ ye kɛwali mɛnilu kɛla, ai kana woilu ɲɔɔn kɛ de, baa ii ye mɛn fɔla, ii tɛ wo kɛla. 4 Ii ye donin gbilinilu sidila ka woilu sii mɔɔilu kun. Ii jɛrɛ don ti sɔn ka mɔɔ woilu dɛmɛn hali dɔɔni. 5 Wo rɔ, ii ye ko bɛɛ kɛla kosa mɔɔilu ye ii yen. Ka a masɔrɔn, ii ye Kitabu kumailu sɛbɛla, ii ye ii sidila ii tindailu la a ni ii boloilu la haan a bonyara ka dan natamin, ka ii la durukiilu masidini julu denni janilu la. 6 Sii diya ɲumaɲumailu le duman ii yɛ dɔɔnninba diya. Mɔɔbailu la sii diyailu duman ii yɛ salibonilu la. 7 Ii ye a fɛ mɔɔilu ye ii kɔndɔn jamama yɔrɔilu rɔ. Ii ye a fɛ fanan mɔɔilu ye a fɔ ii ma ko ‹Rabi›*23.7 Rabi kɔrɔ ye Karanmɔɔ. 8 Kɔni ai kana sɔn mɔɔilu ye a fɔ ai ma ko ‹Rabi›, baa karanmɔɔ kelen de ye ai la. Ai tɔilu ye badenmailu le ri. 9 Ai kana a fɔ mɔɔ si ma duukolo kan yan ko n fa*23.9 A ti fɔla i sɔrɔn fa ma, kɔni a ye a fɔla karanmɔɔ wala duutii wala mɔɔ gbɛrɛ, baa Fa kelen de ye ai la, ni a ye Alla ri, mɛn ye sankolo rɔ. 10 Ai kana sɔn mɔɔilu ye a fɔ ai ma ko ‹karanmɔɔ›, baa karanmɔɔ kelen de ye ai bolo, ni a ye Ɲenematɔmɔnin di. 11 Mɔɔ mɛn ka bon tɔilu ri ai tɛma, wo ye tɔilu la baaraden di. 12 Mɔɔ mɔɔ wa a jɛrɛ bonya, Alla ri wo majii. Kɔni mɔɔ mɔɔ wa a jɛrɛ fanmajii, Alla ri wo bonya.

13,14 «Gbalo ye ai sariya karanmɔɔilu ni Farisiilu yɛ! Ai jɛrɛmayuwailu! Baa ai ra harijeene mansaya da tuun mɔɔilu ɲɛrɔ. Ai jɛrɛ tɛ don a rɔ, mɛnilu fanan ye a fɛ ka don, ai ti sɔn woilu ye don.*23.13-14 Do ye a sɛbɛla ko «Gbalo ye ai sariya karanmɔɔilu ni Farisiilu yɛ! Ai filanfilanteilu! Baa ai ye cɛsamusoilu bolofenilu bɛɛ dɔɔnna, ka ban ka mɛn Alla tarala sa mɔɔilu ri ai yen. Wo le kosɔn, Alla ri kiti labe ai kan, mɛn di juuya mɔɔ tɔilu ta ri.» Kɔni wo tɛ sɛbɛni kɔrɔman na

15 «Gbalo ye ai sariya karanmɔɔilu ni Farisiilu yɛ! Ai jɛrɛmayuwailu! Baa ai ye wala fan bɛɛ rɔ duukolo kan, ai ye kɔɔji fanan tɛɛla, sa ai ri mɔɔ ɲinin, mɔɔ mɛn di sɔn ka don ai la dina rɔ. Kɔni ai wa a ladon, ai ye a kɛla jahanamaden di ka tamin ai jɛrɛ kan fɔɔ siɲa fila.

16 «Gbalo ye ai ɲa funyenilu yɛ mɛn ye ɲa funyen gbeleke mirala. Ai ka a fɔ ko ni mɔɔ do ka a kali Alla batobonba la, ko kalili wo tɛ foyi ri. Ko kɔni ni mɔɔ do ka a kali Alla batobonba kɔndɔ sanin na, ko fɔɔ wo tii ye kalilikan wo dafa. 17 Ai nalonmailu ni ɲa funyenilu! Ɲuman de ka bon? Sanin de ka bon wa, wa Alla batobonba, wo mɛn ye sanin wo kɛla sanin sɛniman di? 18 Ai kan fanan ko ni mɔɔ ka a kali saraka bɔ diya la, ko wo tɛ foyi ri. Kɔni saraka mɛn ye saraka bɔ diya kan, ni mɔɔ ka a kali wo la, ko fɔɔ wo tii ye kalilikan wo dafa. 19 Ai ɲa funyenilu! Ɲuman de ka bon? Saraka le ka bon wa, wala saraka bɔ diya, wo mɛn ye saraka wo kɛla saraka sɛniman di? 20 Ni mɔɔ ka a kali saraka bɔ diya la, fen fen ye a kan, wo tii ra a kali wo bɛɛ fanan na. 21 Ni mɔɔ ka a kali Alla batobonba la, wo tii ra a kali Alla batobonba la, a ni bontii Alla fanan na, mɛn siini bon na ye. 22 Ni mɔɔ ka a kali sankolo la, wo tii ra a kali Alla la mansaya siifen na, a ni Alla jɛrɛ le la, mɛn siini a rɔ.

23 «Gbalo ye ai sariya karanmɔɔilu ni Farisiilu yɛ! Ai jɛrɛmayuwailu! Ai ye ai la nakɔ firamɛsɛnilu kelen kelenna bɛɛ jaa bɔla, ka Alla la sariya bonbailu to ye, ni ii ye telenbaya ko ni kininkinin ko ni lemɛniya ko ri. Ai ka kan ka woilu le fɔlɔ kɛ, ka a tɔilu la woilu kan. 24 Ai ɲa funyenilu yɛ mɛn ye ɲa funyen gbeleke mirala. Ai ye ai la minji sɛnsɛnna ka hali wolowolonin bɔ a rɔ, ka a tɛrɛn ai ye ɲɔɔmɛ lakununna.

25 «Gbalo ye ai sariya karanmɔɔilu ni ai Farisiilu yɛ! Ai jɛrɛmayuwailu! Ai ye jilafɛilu ni tasailu kɔkanna makola ka ii gbɛ. Kɔni woilu fani fen mɛnilu la, ai ka woilu sɔrɔn suɲali ni natabaya le rɔ. 26 Farisi funyen! I ye jilafɛ ni tasa kɔndɔ le fɔlɔ ko. Wo rɔ, kɔkanna fanan di daha.

27 «Gbalo ye ai sariya karanmɔɔilu ni Farisiilu yɛ! Ai jɛrɛmayuwailu! Ai ye ikomin kaburu mɛn kɔkanna ra bɔrangbɛ ka keɲa, ka a tɛrɛn a kɔnɔ fanin mɔɔ koloilu ni nɔɔ su bɛɛ la. 28 Nba, ai fanan ye ten de. Ai wa kɛ mɔɔilu ɲakɔrɔ, ai kɛnin ikomin mɔɔ telenninilu. Kɔni ai kɔndɔ fanin jɛrɛmayuwaya ni kojuu la.

29 «Gbalo ye ai sariya karanmɔɔilu ni ai Farisiilu yɛ! Ai jɛrɛmayuwailu! Ai ye kelalaselailu kaburuilu lɔla. Alla la telenba mɛnilu sani, ai ye woilu kaburuilu masidila ka ii lakeɲa. 30 Ai ye a fɔla ko: ‹Ni an tɛrɛ ye ye an benbailu la waati rɔ, an tun tɛ ii dɛmɛn kelalaselailu faala.› 31 Ai ye a yirakala wo le fɛ ko ai le kelalaselailu faabailu denilu ri. 32 Nba, ai benbailu ka baara mɛn damira, ai ye wo dafa fasayi! 33 Ai duuma sailu! Ai, fɔnfɔnni la munuɲailu! Alla ri kiti labe ai kan ka ai lafili jahanama kɔndɔ! Ai ri bɔ kiti wo kɔrɔ di? 34 Wo le kosɔn, n di kelalaselailu kelaya ai ma, a ni mɔɔ famunyaniilu ni sariya karanmɔɔilu. Ai ri doilu gbɔngbɔn jiri kan ka ii faa. Ai ri doilu gbasi gbiɲɛ la ai la salibonilu kɔndɔ. Ii wa bori ka bɔ so do la ka wa so gbɛrɛ la, ai ri ii kɔsaran. 35 N di woilu kelaya ai ma sa telenbailu bɛɛ faa kunko ri be ai kan, telenba mɛnilu bɛɛ faara mɔɔilu bolo duukolo kan. Abila, mɛn telenba, a fɔlɔ faara. A laban, Berekiya dencɛ Sakariya faara. Ai ka wo le faa Alla batobonba ni saraka bɔ diya tɛma. 36 N di tuɲa fɔ ai yɛ: mɔɔ woilu bɛɛ faa kunko ri be bi mɔɔilu kan.

Isa jusukasira Jerusalɛmu kosɔn

37 «Ee Jerusalɛmukailu, Jerusalɛmukailu. Ai ye kelalaselailu faala. Alla wa mɛnilu lɔ ai kawandila, ai ye woilu bonna kaba la ka ii faa. Siɲa siyaman, n tɛrɛ ye a fɛ ka ai ladɛn ikomin sisɛ ye a denilu ladɛnna ɲa mɛn ma ka ii dokon a kanban kɔrɔ. Kɔni ai ma sɔn. 38 Sisɛn, ai la bon dakolon di to ai bolo, 39 baa n di a fɔ ai yɛ ko ai ɲa ti nala lala n kan butun fɔɔ ni ai ka a fɔ lon mɛn na ko:

‹Mɛn ye nala Maari tɔɔ rɔ ten,

Alla ra ɲumaya kɛ wo yɛ.›»