Mateus 26

Janfa donda Isa ma

1 Isa banda kuma wo bɛɛ fɔla tuma mɛn na, a ka a fɔ a la karandenilu yɛ ko: 2 «Ai ka a lɔn ko a ra to tele fila ma, Taminkunna Sali ri kɛ. Ni wo lon sera, Mɔɔ Dencɛ ri mira ka a gbɔngbɔn jiri kan ka a faa.»

3 Wo tuma, sarakalasela kuntiiilu ni Judiya la mɔɔbakɔrɔilu wara ladɛn diya sarakalasela kuntiiba la bon na. Wo tɔɔ ko Kayifasi. 4 Ii ka i ɲɔɔn yen ka Isa mira ɲa ɲinin kewuya rɔ a faa ko rɔ. 5 Kɔni ii ka a fɔ ko: «an kana a mira sali waati la. Ko ni wo tɛ, mɔɔilu ri wuli ka murunti.»

Muso do ka tulu sumaduman kɛ Isa kun dɔ

6 Awa, Isa wara cɛɛ do wara Betani so kɔndɔ, cɛɛ mɛn tɔɔ ko Simɔn Kunatɔ. 7 Ka Isa siini to dɔɔnnin diya, muso do wulira ka na daa alabasitari ri, mɛn fani latikɔlɔn tulu dagbɛlɛn na. Muso wo ka latikɔlɔn tulu wo burundun Isa kun na. 8 Karandenilu ka wo yen tuma mɛn na, ii mɔnɛra ka a fɔ ko: «Tiɲanni ɲin kun ye nfen di? 9 Tulu ɲin tun di se feerela wodi ba la, ka wodi wo kɛ fantanilu dɛmɛnfen di.» 10 Kɔni Isa ka wo mɛn ka a fɔ ii yɛ ko: «Nfenna ai ye muso tɔrɔla? A ra koɲuma kɛ n yɛ, 11 baa fantanilu ye ai fɛ waati bɛɛ. Kɔni n ti nala tola ai fɛ yan haan waati bɛɛ de. 12 Muso ɲin ka latikɔlɔn tulu burundun n fari kan ka a rabɛn n su don kanma. 13 N di tuɲa fɔ ai yɛ: kibaro ɲuma ɲin wa lase mɔɔilu ma yɔrɔ yɔrɔ dunuɲa rɔ yan, muso ka mɛn kɛ ɲin, wo fanan di fɔ ye, sa mɔɔilu hankili ri to ale rɔ.»

Judasi ka Isa don a juuilu bolo

14 Wo kɔ rɔ, Isa la karanden mɛn tɔɔ ko Judasi Sikariyɔti, wo wara sarakalasela kuntiiilu tɛrɛn ye. Judasi tɛrɛ ye Isa la karanden tan ni fila do le ri. 15 Judasi ka a fɔ sarakalasela kuntiiilu yɛ ko: «Ni n ka Isa don ai bolo, ai ri nfen di n ma?» Ii ka wodigbɛ gbanan bisawa (30) di a ma. 16 Ka bɔ lon wo ma, Judasi ka fɛrɛ ɲinin ka Isa don ii bolo.

Isa ni a la karandenilu ka Taminkunna Sali kɛ

17 Nba, Buru Fununbali Sali lon fɔlɔ rɔ, Isa la karandenilu ka ii madon a la ka a maɲininka ko: «I ye a fɛ an ye Taminkunna Sali dɔɔnnin fen dabɛn i yɛ min?» 18 Isa ka a fɔ ii yɛ ko: «Ai ye wa fakarisa tɛrɛn so kɔndɔ. Ai ye a fɔ a yɛ ko: ‹Karanmɔɔ ka a fɔ ko: «N na waati ra sudunya. Ko n ni n na karandenilu ri Taminkunna Sali kɛ i wara.»›» 19 Isa ka mɛn fɔ, karandenilu ka a kɛ ten. Ii wara Taminkunna Sali dɔɔnnin dabɛn ye. 20 Fitiri waati, a ni a la karanden tan ni fila ka ii sii dɔɔnnin diya.

Isa ka Judasi la janfa ko fɔ

21 Ka ii siini to dɔɔnnin na, Isa ka a fɔ ii yɛ ko: «N di tuɲa fɔ ai yɛ: ai rɔ kelen di n don mɔɔ juuilu bolo.» 22 Karandenilu niilafinda kosɛbɛ kuma wo kosɔn. Ii bɛɛ ka a fɔ a yɛ kelen kelen ko: «Maari, nde le wo ri wa?» 23 Isa ka a fɔ ko: «N ni mɔɔ mɛn da an bolo bila fɛ kelen kɔndɔ, wo le n janfala. 24 Mɔɔ Dencɛ ri faa ikomin a sɛbɛni a la ko rɔ ɲa mɛn ma. Kɔni mɔɔ mɛn ye a donna mɔɔ juuilu bolo, gbalo ye wo tii yɛ. Hali ni wo tii sɔrɔnbali tun tora, wo tun ka fisa a ma paaɔn.» 25 Judasi mɛn kɛtɔ Isa donna mɔɔ juuilu bolo, wo ka a fɔ Isa yɛ ko: «Karanmɔɔ, nde le wo ri wa?» Isa ka a jabi: «I jɛrɛ le kan ten.»

Maari la dɔɔnnin

26 Nba, ka ii to dɔɔnnin na Isa ka buru ta ka baraka bila Alla yɛ. A ka buru rakadikadi, ka a di ii ma ka a fɔ ii yɛ ko: «Ai ye ɲin mira ka a dɔɔn. N fari le ɲin di.» 27 Wo kɔ rɔ, a ka minninfen ta, rɛsɛnji ye a kɔndɔ. A ka baraka bila Alla yɛ, ka ban ka minninfen di ii ma. A ka a fɔ ko: «Ai bɛɛ ye do min a rɔ. 28 N jeli le ɲin di, mɛn ye teriya sidila an tɛma. A bɔnnin mɔɔ siyaman de yɛ sa ii la kojuuilu ri makoto.