1 Nde Pɔli, Ɲenematɔmɔnin Isa la baaraden, Alla ra mɛn kili kosa n ye kɛ a la talibidenba ri, a ka n bila n dan na kosa n ye Alla la kuma Kibaro Ɲuma lase, n da ɲin sɛbɛ ai ma.

2 Alla ka jama lahidi Isa la ko Kibaro Ɲuma ɲin de la ka fara nabiya kumailu la Kitabu Sɛnimanilu kɔndɔ. 3 A dencɛ la ko le tɛrɛ a ri, mɛn sɔrɔnnin Dawuda bɔnsɔn dɔ faribanku rɔ, 4 Nii Sɛniman ka a yiraka sebaya rɔ ko Alla Dencɛ le a ri, baa an Maari Isa Ɲenematɔmɔnin da wuli ka bɔ saya rɔ. 5 Alla ra an kɛ talibidenbailu ri a la hina rɔ Isa tɔɔ kosɔn kosa siyailu bɛɛ ye a kan mira lemɛniya rɔ. 6 Aile fanan ye wo mɔɔilu tɛma, Alla ka mɛnilu kili ka a kɛ Isa Ɲenematɔmɔnin ta ri.

7 Awa, mɛnilu bɛɛ ye Romu, Alla kaninteilu, a ka mɛnilu kili fanan, ka kɛ a la jama sɛniman di, n da ɲin sɛbɛ ai bɛɛ ma. An Fa Alla ni Maari Isa Ɲenematɔmɔnin ye hina ni jususuma di ai ma.

8 N ye baraka le fɔlɔ bilala Alla yɛ ai bɛɛ la ko rɔ, Isa Ɲenematɔmɔnin baraka rɔ. Ka a masɔrɔn mɔɔilu ye ai la lemɛniya la ko fɔla dunuɲa yɔrɔ bɛɛ rɔ. 9 Alla le n sere ri, n ye mɛn batola a Dencɛ la ko Kibaro Ɲuma lase ko rɔ n jusu bɛɛ rɔ. A ka a lɔn ko n miriya ye ai ko waati bɛɛ 10 n wa kɛ Alla matarala waati si. Sinɛn, n ye Alla matarala, ni a sawo le, a ye fɛrɛ di n ma ka wa ai wara. 11 Ka a masɔrɔn ai yen lɔɔ ye n na kosɛbɛ, kosa Alla la Nii Sɛniman da ko sɛniman mɛn di n ma, n ye wo do latamin ai ma, ai ye fanka sɔrɔn 12 kosa an ye an ɲɔɔn fanka don an na lemɛniya rɔ.

13 N badenmailu, n ye a fɛ ai ye a lɔn, n tɛrɛ ra karan siɲa siyaman, ka wa ai fo kɔni n ma fɛrɛ sɔrɔn. N tɛrɛ ye a fɛ, ka lɛmeniya mɔɔ doilu sɔrɔn ai wara ikomin n ka a sɔrɔn siya gbɛrɛilu tɛma ɲa mɛn ma. 14 N ka kan ka wa Kirɛkiilu ni siya doilu ma, hankilimailu ni hankilidɔɔilu. 15 Wo le rɔ, a lɔɔ ye n na haan, ka Isa la ko Kibaro Ɲuma lase ai le Romukailu fanan ma.

16 N tɛ maloyala Isa la ko Kibaro Ɲuma la, baa Alla la sebaya le wo ri kosa mɔɔ si wa la a la, wo ri kisi, ka damira Judiyailu ma ka wa se siya gbɛrɛilu ma. 17 Isa la ko Kibaro Ɲuma ra telenbaya yiraka, Alla ye mɛn dila mɔɔilu ma. Wo damiranin lemɛniya le ma ka laban lemɛniya ma, ikomin a sɛbɛnin ɲa mɛn ma Kitabu rɔ ko, «Mɔɔ telennin di a la dunuɲaratɛɛ kɛ landaɲa rɔ.»*

18 Alla ye a la mɔnɛ yirakala ka bɔ harijeene rɔ, mɔɔilu la Alla lɔnbaliya ni ii la telenbaliya bɛɛ kanma, mɛnilu ye tuɲa dokonna ii la telenbaliya fɛ, 19 baa mɔɔilu ri se mɛn lɔnna Alla la ko rɔ, wo ra lagbɛ ii ma, baa Alla ra a lagbɛ ii ma. 20 Baa kɛbi dunuɲa danda, Alla kɛɲa mɛnilu tɛrɛ tɛ yenna ɲa la, mɛn ye a la habadan fanka ni a la Allaya ri, woilu ye ragbɛla kosɛbɛ, baa mɔɔilu ye ii famunna a la dalifen fɛ. Wo le rɔ, ii ti se ii jɛrɛ kun makala. 21 Hali ii ra Alla lɔn, ii ma a gbiliya ikomin Alla, wala ka baraka bila a yɛ. Kɔni ii ra kɛ fuu ii la miriyailu rɔ. Ii jusu hankilitanilu ra ii bila dibi rɔ. 22 Ii ra ii jɛrɛ jate hankilimailu ri, kɔni ii ra kɛ kɔmɔɔilu ri. 23 Ii ra Alla ɲenema la gbiliya falen jooilu la mɛnilu ladannin mɔɔilu ni kɔnɔilu ni soboilu ni gbankanbandɔilu munuɲa la.

24 Wo le rɔ, Alla ra ii labila ii la kɔsɔ koilu rɔ ii jusuilu kunfannin mɛnilu fɛ, ka to ii ɲɔɔn fari lafɛyala. 25 Ii ra Alla la tuɲa falen wuya la, ka baara dalifenilu yɛ, ka ii bato, sani ii ye Dannin Maari bato, baraka ye mɛn yɛ haan habadan. Amina.

26 Wo koilu rɔ, Alla ra ii labila ii la malobaliya kunfan koilu rɔ. Ka a masɔrɔn hali ii musoilu fanan da ii ban ii dan ɲa rɔ, ka laɲɔɔya ɲɔɔn gbɛrɛilu kɛ mɛnilu tɛ ii dan ɲa rɔ. 27 Cɛɛilu fanan ye wo ɲa le ma, ka ii ban musoilu la laɲɔɔya ma, ka ii ɲɔɔn nakunfan. Cɛɛ ni cɛɛ ye ii ɲɔɔn namaloya ka laɲɔɔya kɛ, ka ii la kojuu sara sɔrɔn.

28 Fanan ii ra ii ban Alla lɔnna, a ra ii labila ii la hankili dɔɔya rɔ, ka to ko dahabaliilu kɛla, mɛn ma kan ka kɛ. 29 Ii fanin telenbaliya ni kojuu ni wasabaliya ni juuya su bɛɛ la. Ii fanin keleya ni mɔɔ faa ko ni bɛnbaliya ni janfanteya ni lagboyaɲɛ la. Ii ra kɛ mɔɔ mafɔlailu ri, 30 a ni mɔɔ tɔɔ tiɲanninnailu ni Alla juuilu ni mɔɔ fankɔrɔtanninilu ni wasolailu ni jɛrɛdabailu ri, ii ye kojuu kewuya kurailu labɔla, ii ti ii sɔrɔnbailu kumakan bonyala. 31 Hankilidɔɔilu ni landaɲabaliilu ni jusutanilu ni kininkininbaliilu le ii ri. 32 Hali, ii ka Alla la sariya telennin lɔn, ko mɔɔ mɛnilu ye ko ɲinilu kɛla, woilu ka kan de ka faa, ii tɛ wo koilu le dɔrɔn kɛla, kɔni a duman ii yɛ fanan ko mɔɔ gbɛrɛilu fanan ye woilu kɛ.