1 Wo rɔ, an da telen Alla ɲakɔrɔ lemɛniya baraka rɔ, bɛn da kɛ an ni Alla tɛma an Maari Isa Ɲenematɔmɔnin baraka rɔ. 2 A ra an nana a la hina rɔ lemɛniya fɛ an ye mɛn dɔ ten. An sɛwanin de Alla la gbiliya ko jii la. 3 Wo gbansan tɛ, kɔni an sɛwanin fanan an na tɔrɔyailu la ka a masɔrɔn an ka a lɔn ko tɔrɔya le tunadiya lanala. 4 Tunadiya ye kɛɲa bɛrɛ lanala. Kɛɲa bɛrɛ ye jii lanala. 5 Wo jii tɛ an majuuwaya, ka a masɔrɔn Alla ra a la kaninteya la an jusu rɔ a la Nii Sɛniman baraka rɔ, a ra mɛn di an ma.

6 Ka a masɔrɔn fanka tɛrɛ tɛ an na waati mɛn na, Ɲenematɔmɔnin faara Alla lɔnbaliilu la ko la a la waati latɛɛnin dɔ. 7 Foyida mɔɔ si tɛrɛ tɛ sɔn faala mɔɔ telennin na ko rɔ, kɔni tumadɔ, mɔɔ do ri susu faala mɔɔ ɲuma la ko rɔ. 8 Kɔni Alla ka a la kaninteya yiraka an na wo ɲa le ma, an tɛrɛ ye kojuukɛlailu ri waati mɛn na, Ɲenematɔmɔnin faara an yɛ. 9 Sisɛn ni an da telen Alla ɲakɔrɔ Isa jeli fɛ, a tɛna kaɲala an kisila Alla la mɔnɛ ma a baraka rɔ! 10 Ni an tɛrɛ ye Alla juuya la waati mɛn na, an ni Alla tɛmala rabɛnda a Dencɛ la saya fɛ, ni an tɛmala rabɛnda wo rɔ, a kaɲa kun ti ye wo rɔ an nakisi la a Dencɛ nii baraka rɔ. 11 Kɔni a bɛɛ tɛ wo ri, an sɛwanin Alla la an Maari Isa Ɲenematɔmɔnin na ko rɔ mɛn da bɛn nadon an ni Alla tɛma sinɛn.

12 Wo le rɔ, julumun nara dunuɲa rɔ mɔɔ kelen pe le fɛ, saya fanan nara julumun fɛ. Wo le rɔ, saya ra na mɔɔ bɛɛ ma, ka a masɔrɔn mɔɔ bɛɛ ra julumun kɛ. 13 Julumun tɛrɛ ye dunuɲa rɔ sani sariya ye na, adon ni sariya ti ye, julumun fanan ti jatela. 14 Kɔni ka damira an benba Adama la waati ma haan ka wa se Musa la waati ma, saya ye mansaya kɛla mɔɔ bɛɛ kun na, hali mɛnilu ma an benba Adama la julumun su kɛ mɛn ka julumun ta Alla la jamarili fɛ. An benba Adama kɛnin tɛrɛ mɔɔ natɔ misali le ri. 15 Kɔni Alla la sɔli munuɲanin tɛ Adama hakɛ na. Hali mɔɔ siyaman da saya masɔrɔn ale kelen hakɛ fɛ, Alla la hina ni a la sɔli ka bon wo ri pon, a ka mɛn siyaman ba di mɔɔ siyaman ma mɔɔ kelen pe baraka rɔ, Isa Ɲenematɔmɔnin. 16 Alla la sɔli kɛnin tɛ ikomin mɔɔ kelen na hakɛ fanan. Baa hakɛ kelen kiti ra a kɛ adamadenilu ra jalaki, kɔni Alla la sɔli nanin hakɛ siyaman kɛ kɔ le rɔ, ka telenbaya lana. 17 Baa ni saya ra fanka sɔrɔn mɔɔ kelen na hakɛ fɛ, wo mɔɔ kelen na ko rɔ, wo mɔɔilu fanan ti kaɲa fanka sɔrɔnna Isa Ɲenematɔmɔnin kelen na dunuɲaratɛɛ fɛ, mɛnilu ye Alla la hina ba sɔrɔnna a ni a la sɔlifen mɛn kɛnin telen di?

18 Wo le rɔ, bɛɛ ye jalakila ɲa mɛn ma hakɛ kelen fɛ, kɛwali telennin kelen ɲin fanan di kɛ telen di wo ɲa ma mɛn ye ɲenemaya lanala mɔɔilu bɛɛ ma. 19 Baa mɔɔ siyaman kɛnin julumuntiilu ri ɲa mɛn ma mɔɔ kelen na kuma mirabaliya fɛ, mɔɔ siyaman fanan di telen wo ɲa ma Alla ɲakɔrɔ mɔɔ kelen na kuma mira baraka rɔ.

20 Sariya ra na kosa hakɛilu ye siyaya, kɔni julumun bonyanin yɔrɔ mɛn na, Alla la hina fanan da wara ye. 21 Wo le rɔ, julumun mansaya kɛnin ɲa mɛn ma saya rɔ, Alla la hina fanan ye mansaya kɛla telenbaya rɔ wo ɲa le ma, a ka an nadon ɲenemaya banbali rɔ, an Maari Isa Ɲenematɔmɔnin baraka rɔ.