Onger Akaba 142

Gumazir mam uabɨn akurvaghasa God ko mɨgei

Devit dagɨar torimɨn aven ikia, ighiar kam osiri.

Me onger akar kam kamagh a dɨbori, Maskil.

1 ✝ 142:1 1 Samuel 22:1; 24:3 Kɨ uabɨn akurvaghasa Ikiavɨra Itir Godɨn dei.

Kɨ an apangkuvim bagha pamten a gaghorava a mɨgei.

2 Na bativir araziba ko osɨmtɨziba

kɨ bar dar gun a mɨgei.

3 ✝ 142:3 Onger Akaba 77:3; 140:5; 143:4 Tuavir kɨ mangamim, nan apaniba nan suighasa azuazir mam gura,

ezɨ nan navim osemezɨ, kɨ ghaze, kɨ ikuvigham.

Nɨrara, kɨ mangamin tuavim

nɨ a gɨfo.

4 ✝ 142:4 Onger Akaba 88:8; 88:18 Kɨ uabɨn boroghɨn gari, gumazir nan akurvaghamiba puvatɨ.

Ezɨ gumazir nan gan na geghuvamiba puvatɨ.

Kɨ mongamin danganiba puvatɨ.

5 O Ikiavɨra Itir God, nɨ nan akurvaghasa kɨ nɨn dei.

Nɨrara nɨ nan eghuvir gumazim.

Kɨ kamaghɨn ifonge,

kɨ angamɨra ikiavɨra itir dughiam,

nɨrara na ko ikiam.

6 Gumaziba arazir kurabar na gamua egha bar gavgafi,

ezɨ kɨ me abɨnasava amuava avenge.

Nan navim bar oseme.

Kamaghɨn, kɨ uabɨn akurvaghasa nɨn dei,

nɨ na barakigh.

7 ✝ 142:7 Onger Akaba 13:6; 143:11; 146:7 Nɨ osɨmtɨzir kamɨn aven uam na inightɨ,

kɨ an fɨrighɨrɨgh egh deravɨra ikiam.

Nɨ bar deravɨra na gami.

Kamaghɨn, gumazamiziba uari akuvagh ikɨtɨ,

kɨ men tongɨn nɨn ziam fam.