Onger Akaba 7

Gumazim osɨmtɨzim ikia God ko mɨgei

Benjaminɨn adarazir gumazir mam an ziam Kus, an arazir mam gamizɨ, Devit a basemegha onger akar kam osiri.

A God ko mɨgɨa a bange.

1 ✝ 7:1 Onger Akaba 31:1; 31:15; 71:1 O Ikiavɨra Itir God, nɨ nan God,

kɨ nɨ bagha iza nɨn uabɨ apazagha uan apanibar modo.

Nɨ nan akuraghtɨ, nan apanir nan agɨntɨziba na mɨsueghtɨ,

kɨ aremeghan kogham.

2 Puvatɨghtɨma, laion gumazim gasɨghasɨzi moghɨn,

me na gasɨghasɨgh nan mɨkarzim abɨghɨrarigham.

Me na gekuigh mangɨghtɨ,

gumazir nan akuragh na iniamiba puvatɨgham.

3 O Ikiavɨra Itir God, nɨ nan God, kɨ arazir kuram damigham,

o gumazir igharazitam gasɨghasigham,

4 ✝ 7:4 Onger Akaba 109:4-5 o kɨ uan namakam gifaragh puram akatam a gasam,

o kɨ arazir kuramɨn pura uan apanim damightɨ,

5 nɨ nan apanibar amamangatɨghtɨ, me nan agɨragh nan suiragh.

Egh na dɨkabɨragh magɨrɨ nan mɨkarzim bar a gasɨghasɨgh,

anetɨghtɨ a pura nguazim girɨghɨv ikɨ.

(Ighiam gamua an suiam atugha avughsegha ua ighiam gami.)

6 ✝ 7:6 Onger Akaba 35:23; 94:2; 138:7 O Ikiavɨra Itir God,

nɨ anɨngaghegh dɨkavighasa kɨ ifonge.

Apaniba bar anɨngaghegha na mɨsosi,

nɨ izɨ nan akuragh.

O nan God, nɨ gumazibar araziba tuisɨghamin dughiam amɨsefe,

kamaghɨn nɨ dɨkavigh izɨ nan akuragh.

7 ✝ 7:7 Onger Akaba 22:27 Nɨ bar ikɨziba akuvaghtɨ, me nɨ okarigh.

Egh nɨ uan atrivir dabirabir pɨn itim daperagh

bar me gativagh men gan.

8 ✝ 7:8 Onger Akaba 26:1; 43:1; 98:9 O Ikiavɨra Itir God, nɨ gumazamizibar araziba tuisɨsi.

Nɨ fo, kɨ guizɨn arazir aghuibara ami.

Kamaghɨn amizɨ, nɨ nan araziba tuisɨghamin dughiamɨn nan akuragh.

9 ✝ 7:9 Onger Akaba 34:21; 40:2; 94:23; Akar Mogomem 2:23 O God, nɨ bar Godɨn aghuimra.

Nɨ gumazamiziba bar men navir averiaba ko nɨghnɨziba tuisɨsi.

Nɨ gumazamizir kurabar arazir kuraba bar ada gɨfagh.

Egh nɨn damazimɨn derazir gumazamiziba,

nɨ me damutɨ, me tugh gavgafigh.

10 ✝ 7:10 Onger Akaba 18:2; 18:30; 97:10-11 God nan oramɨn mɨn,

na geghuva nan garir gumazim.

Gumazamizir an akam baragha an gɨn zuiba,

a men akurvagha ua me isi.

11 ✝ 7:11 Onger Akaba 50:6; 90:9 God guizɨn arazimra gumazamizibar araziba tuisɨsi.

Gumazamizir arazir kurabagh amiba,

a zurara me dɨkabɨra ivezir kuram me ganɨdi.

12 ✝ 7:12 Godɨn Araziba 32:41-42; Onger Akaba 64:7 Gumazim uan navim giraghan koghtɨ,

God uan mɨdorozir sabam amɨnam.

Egh a uan barir pim dafagh mɨdorozim bagh mɨzuam ikiam.

13 ✝ 7:13 Onger Akaba 18:14; 45:5 A gumazir kurar kabav sueghtɨ me aremeghasa

uan mɨdorozir biziba akɨrigha gɨfa.

An afuzir aviba itiba men akuighav iti.

14 ✝ 7:14 Jop 15:35; Aisaia 59:4; Jems 1:15 E gari, gumazir kuram arazir kuram damuasa uan nɨghnɨzim akɨrigha gɨfa.

A zurara ifarava, osɨmtɨzir kabagh amima da otivavɨra iti.

15 ✝ 7:15 Onger Akaba 57:6 A gumazir igharaziba mozir torir kamɨn magɨrasa, me bagh a gɨkui.

Egha a uabɨ mozir torir a kuizir kam giraghu.

16 ✝ 7:16 Onger Akaba 140:9-11 Kamaghɨra, osɨmtɨzir an amizim, anarɨram avaragham.

Akam adariba ko, mɨdorozir a igharaz darazi damuasava amiba,

da raghɨrɨgh anarɨram asɨghasɨgham.

17 Ikiavɨra Itir God a bar guizbangɨra dera,

kamaghɨn kɨ bar a mɨnabagham.

Kɨ Godɨn Bar Pɨn Itimɨn ziam fɨva,

a bagh ighiaba bangam.