1 Dughiar mamɨn aseba Godɨn Nguibamɨn uari akuvazɨ,

God uan dabirabir danganim gaperagha

men faragha ghua, akam me gasa kamaghɨn me mɨgei.

2 A ghaze,

"Ia paza kotiaba tuisɨgha,

gumazir arazir kurabagh amiba bar me gifonge.

(Ighiam gamua an suiam atugha avughsegha ua ighiam gami.)

3 Ia deragh gumazamizir uarira uarir akurvaghan koghamiba ko, borir afeziaba ariaghirezibar akurvagh.

Ia gumazamizir osɨmtɨziba ateriba ko, onganarazibagh amir gumazamiziba, deragh me damu.

4 Gumazamizir gavgaviba puvatɨziba ko, onganarazibagh amiba,

ia gumazir kurabar dafariba da ua me inigh.

5 ✝"Me nɨghnɨzir aghuitam men itir puvatɨzɨ, me bizitam gɨfozir puvatɨ.

Me mɨtatemɨn nguazir kam garua,

arazir aghuitam gumazamizibar akurvaghasa a gamir puvatɨ.

6 ✝"Kɨ Godɨn Bar Pɨn Itim kamaghɨn mɨgɨa ghaze,

Ia aser muziarir kaba, ia bar nan boriba.

7 Ia gumaziba ariaghiri moghɨn uaghan arɨmɨghiregham.

Ia atrivir igharaziba iri moghɨn uaghan iregham."

8 O God, nɨ dɨkavigh izɨ nguazimɨn gumazamiziba bar me gativagh men araziba tuisɨgh.

Nguazimɨn itir gumazamiziba bar nɨn gumazamiziba.