Onger Akaba 6

Gumazim osɨmtɨzim ikia uabɨn akurvaghasa God ko mɨgei

Devit onger akar kam osiri.

Gumazir onger akar kamɨn faragha zuim, gita gikararang ongasa me mɨkeme.

1 ✝ 6:1 Onger Akaba 38:1; Jeremaia 10:24 O Ikiavɨra Itir God, nɨ adarim ikɨ

pamten na mɨkɨman markɨ.

Nɨn navim ikuvightɨ,

nɨ ivezir kuram na danɨngan markɨ.

2 ✝ 6:2 Onger Akaba 41:4; Hosea 6:1 O Ikiavɨra Itir God, kɨ bar osemegha ua gavgaviba puvatɨ,

ezɨ nɨ nan apangkufigh.

Nan gavgaviba bar gɨfa,

eghtɨ nɨ gavgavir igiam na danɨngightɨ kɨ ua deragham.

3 ✝ 6:3 Onger Akaba 90:13 O Ikiavɨra Itir God, nan navim osɨmtɨzir ekiam a itaragha ghuaghiri.

Ezɨ dughiaba manmaghɨn,

osɨmtɨzir ekiar kam nan navir averiamɨn ikɨvɨra ikiam?

4 O Ikiavɨra Itir God, nɨ iragh izɨ

nan akuragh ua na inigh.

Nɨn apangkuvim zurara ikia mamaghɨra iti,

nɨ uan apangkuvim ginɨrɨgh nan akuraghtɨ

kɨ ovengan kogham.

5 ✝ 6:5 Onger Akaba 88:11; 118:17; Aisaia 38:18 Gumazamizir oveaghueziba,

me ua nɨ gɨnɨghnɨzir puvatɨ.

Gumazamizir Oveaghuezibar Nguibamɨn,

tina ua nɨn ziam fam?

6 Kɨ dia ghuavti, nan gavgaviba bar gɨfa.

Nan temeriba zurara dɨmagaribar nan mɨsiam giri,

kɨ ara ghuav itima,

nan dapanir aghoghonim bar kumkumi.

7 ✝ 6:7 Jop 17:7; Onger Akaba 38:10; Azir Akam 5:17 Nan apanir avɨriba iti,

kamaghɨn amizɨ, kɨ dughiabar aziavɨra iti.

Nan damazimning nan bezɨ,

kɨ deragha bizibar garir puvatɨ.

8 ✝ 6:8 Onger Akaba 119:115; Matyu 7:23; Luk 13:27 Ikiavɨra Itir God nan azirakam baregha gɨfa,

kamaghɨn, ia gumazir arazir kurabagh amiba,

na gitagh.

9 Kɨ uabɨn akurvaghasa Ikiavɨra Itir God ko mɨgeima,

a na baregha gɨfa.

Kɨ a ko mɨgeir mɨgɨrɨgɨaba, a da baregha gɨfa.

10 Nan apaniba osɨmtɨzir ekiam inigh,

bar aghumsɨgh atiatigham.

Me zuamɨra na ategh onganigh arɨ

tintinibar mangegham.