1 ✝O gumazir ekiam, nɨ manmaghsua uabɨ fa, arazir kurar nɨ Godɨn gumazamizibagh amiziba bagha bar akonge?

Godɨn apangkuvim men ikia mamaghɨra iti.

2 ✝Nɨn mɨzem resan mɨn bar ghumigha ifavaribagh ami da otifi.

Dughiabar zurara nɨ gumazamizibagh asɨghasɨghasa mɨgei.

3 Nɨ arazir aghuim bar an aghuagha arazir kuram baghavɨra ifonge.

Nɨ guizɨn akam gifongezir puvatɨgha, ifarasa bar ifonge.

(Ighiam gamua an suiam atugha avughsegha ua ighiam gami.)

4 Nɨ ifarir gumazim!

Nɨ uan akamɨn gumazamizibagh asɨghasɨghasa bar ifonge.

5 Nɨ orakigh, God bar nɨ gasɨghasightɨ nɨ ikuvigh kamaghɨra ikiam.

A nɨn dɨpenimɨn nɨn suiragh nɨ batuegh bar nɨ agɨvaghtɨ,

nɨ ua nguazir kamɨn ikian kogham.

(Ighiam gamua an suiam atugha avughsegha ua ighiam gami.)

6 Godɨn gumazamiziba kamaghɨn nɨn ganigh atiatingam.

Me nɨn ingarɨva akɨ kamaghɨn mɨkɨmam,

7 ✝"Ia gumazir kamɨn gan! Gumazir kam God a geghuv egh deragh an ganan an aghua.

A uan dagɨaba ko bizir avɨribagh nɨghnɨgha ghaze,

an arazir kuraba an akuraghtɨ a deragh ikiam."

8 Ezɨ kɨ, olivɨn tememɨn mɨn Godɨn Dɨpenimɨn aven tughav ikia deravɨrama aghui.

Kɨ nɨghnɨzir gavgavim an apangkuvir arazimɨn ikɨ mamaghɨra ikiam.

9 O God, nɨ nan akurazɨ kɨ zurara nɨ mɨnabɨvɨra ikiam.

Kɨ gumazamizibar damazibar nɨn ziam fɨ kamagh mɨkɨm suam,

"God arazir bar aghuimɨn na gami."