1 ✝O Ikiavɨra Itir God, tinara nɨn Dɨpenimɨn ikiam?

Tinara mɨghsɨar nɨ ua bagha inabazim dapiam?

2 ✝Gumazim, God ifongezɨ moghɨn biziba bar dar gɨn ghua,

arazir aghuiba zurara dagh amua,

egha zurara uan navir averiamɨn aven guizɨn akam gɨnɨghnɨgha guizbangɨra mɨgei,

a nɨn Dɨpenimɨn aven ikiam.

3 ✝Gumazir kam, gumazir igharazibar ziabagh asɨghasɨzir puvatɨ,

egha arazir kurabar uan namakabagh amir puvatɨ,

egha akar kɨnibar pura uan roroabav geir puvatɨ,

gumazir kamnang, a nɨn Dɨpenimɨn aven ikiam.

4 ✝Gumazir kam, akɨrim ragha God gasarazir gumazamiziba, a bar men aghua,

egha gumazamizir Godɨn apengan ikia an atiatiba, a men ziaba fe,

egha uan akar dɨkɨrɨzibar gɨrara ghua bizibagh ami.

Bizir kam osɨmtɨzir ekiam a danɨngtɨ, a nɨghnɨgh suam, a pura bizim.

A guizbangɨra uan akar dɨkɨrɨzir kamɨn gɨn mangam.

Gumazir kamnang, a nɨn Dɨpenimɨn aven ikiam.

5 ✝Gumazir kam uan dagɨaba amadima,

gumazir igharaziba pura da ini,

egha me ua da ikarvazir dughiamɨn, a dagh isɨn ua dagɨataba isir puvatɨ.

Gumazir arazir kuratam gamizir puvatɨzitam kotɨn tughɨv ikɨtɨ,

gumazitam kotiam gifarɨsɨ anepezeper dagɨaba a danɨngtɨ,

a dagɨar kaba inian markɨ.

Gumazir kamaghɨn amim,

a tugh gavgavigh irɨghan kogham.