1 Ia Ikiavɨra Itir Godɨn ziam fɨ!

Ia Godɨn Nguibamɨn bar pɨn iti darasi,

ia an ziam fɨ.

2 Ia enselba, ia bar moghɨrama an ziam fɨ!

Godɨn Nguibamɨn itir mɨdorozir enselba uaghan an ziam fɨ.

3 Aruem ko iakɨnim, gua uaghan an ziam fɨ!

Mɨkovezir angazangarir gavgaviba itiba, ia uaghan an ziam fɨ.

4 Godɨn Nguibar bar pɨn itim, nɨ uaghan an ziam fɨ!

Dɨpar overiamɨn pɨn itiba, ia uaghan an ziam fɨ.

5 Ikiavɨra Itir God mɨkemezɨ bizir kaba otifi!

Kamaghɨn me bar an ziam fɨ.

6 ✝ 148:6 Jop 38:33; Jeremaia 33:20; 33:25 A uabɨ mɨkemezɨ me uan danganibarama, otivigha iti.

Me dar ikɨ kamaghɨra ikɨva,

an akabar gɨn mangam.

7 Ia nguazimɨn itir biziba bar,

ia Ikiavɨra Itir Godɨn ziam fɨ.

Ia bizir kabanang.

Ongarir konimɨn aven itir kuruzir ekiaba ko osiriba ko

8 onɨmariba ko dagɨabar mɨn garir amozir ofɨzir ekiaba ko amoziba ko mɨgharir pɨziba ko

amɨnir ekiar an Akar Gavgavibar gɨn zuiba,

ia bar Ikiavɨra Itir Godɨn ziam fɨ.

9 Ia mɨghsɨar ekiaba ko mɨghsɨar doziba,

ko temer ovɨziba itiba ko sidan temeba ko,

10 ruarim ko nguibamɨn asɨziba bar moghɨra ko goaba ko kuaraziba,

ia bar moghɨra Ikiavɨra Itir Godɨn ziam fɨ.

11 Ia nguazir kamɨn itir atriviba,

ko kantriba ko gavmanɨn gumaziba ko gumazir dapaniba ko

12 gumazir igiaba ko amizir igiaba ko gumazir ghuriba ko boriba,

ia bar Ikiavɨra Itir Godɨn ziam fɨ.

13 Bar guizbangɨra, Ikiavɨra Itir God, an ziam bar ekevegha gumazamizibar ziaba bar dagh afira,

egha an ziar ekiam bar pɨn ikia nguazim ko overiam gafira.

Kamaghɨn amizɨ, biziba bar moghɨra an ziam fɨ.