1 Ia gumazamizir aghuiba, ia Ikiavɨra Itir God ia bagha amizir bizir aghuim bagh bar akongegh.

Arazir kam bar dera:

ia an akam baragha an gɨn zui darasi, ia an ziam fɨ.

2 Ia kulele ko gitan stringɨn 10pla itim mɨsogh,

Ikiavɨra Itir God bagh ighiam damu an ziam fɨ.

3 Ia onger akar igiaba osirigh da bangɨ,

egh deragh gita mɨsoghtɨ an ararem deraghtɨ,

ia bar akongegh pamten dɨm mɨkɨm.

4 E fo, Ikiavɨra Itir Godɨn akam a guizbangɨra iti.

Ezɨ an akam mɨkemezɨ moghɨra, a zurara guizɨn arazibar gɨn ghua ingangariba bar dagh ami.

5 ✝ 33:5 Onger Akaba 11:7; 37:28; 119:64 Ikiavɨra Itir God, a en arazir aghuiba ko guizɨn araziba bar dagh ifonge.

An apangkuvir arazim, nguazimɨn itir gumazamiziba bar me ave.

6 ✝ 33:6 Jenesis 1:14-19; 2:1; Onger Akaba 104:30; Hibru 11:3 Ikiavɨra Itir God fomɨra mɨkemezɨ, aruem ko iakɨnim ko mɨkoveziba,

ko overiamɨn pɨn itir biziba bar otivigha iti.

7 ✝ 33:7 Ua Me Ini 15:8; Josua 3:16; Onger Akaba 78:13 Gumazim dɨpam isa itam guruizɨ moghɨn,

an ongarim isa danganir vamɨran anekufa.

Egha ongarim gamizɨ a bar konegha

nguazimɨn apengan itir danganimɨn vɨn mar iraghu.

8 Ia nguazimɨn itir gumazamiziba,

ia Ikiavɨra Itir Godram atiating an apengan ikɨ.

9 ✝ 33:9 Onger Akaba 148:5 A mɨkemezɨ nguazir kam puram oto.

An Akar Gavgavim mɨkemezɨ, biziba bar nguazir kamɨn otifi.

10 ✝ 33:10 Onger Akaba 2:1-3; Aisaia 8:10; 19:3 Kantrin Igharazibar Gumazamiziba damuasava nɨghnɨzir biziba,

Ikiavɨra Itir God dagh amima da ghua puvarɨsi.

Ikɨzir igharaziba damuasa akabav sozir mɨgɨrɨgɨaba,

an adar tuaviba apɨri.

11 ✝ 33:11 Jop 23:13; Onger Akaba 40:5; Aghuzir Akaba 19:21; Aisaia 55:8 Ikiavɨra Itir God damuasava amir biziba,

da gavgavigh mangɨvɨra ikiam.

A uan navir averiamɨn aven itir nɨghnɨzim giraghan kogham.

An nɨghnɨzim zurara ikɨvɨra ikiam.

12 ✝ 33:12 Godɨn Araziba 7:6; Onger Akaba 28:9; 144:15 Kantrin tam God baghavɨra ikɨtɨ,

Ikiavɨra Itir God deravɨra a damutɨ a bar akongegham.

Kantrin kamɨn gumazamiziba

God ua baghavɨra me ginaba.

13 ✝ 33:13 Jop 28:24; Onger Akaba 11:4; 14:2 Ikiavɨra Itir God uan Nguibamɨn ikia,

nguazimɨn itir gumazamiziba bar men gari.

14 ✝ 33:14 1 Atriviba 8:39; 8:43; Onger Akaba 102:19 A uan Nguibamɨn ikia,

egha nguazimɨn bar deragha en gari.

15 ✝ 33:15 2 Eghaghaniba 16:9; Jop 10:8; Onger Akaba 119:73 A uabɨ nɨghnɨziba ko navir averiabar ingarigha da isa gumazamizibagh arɨki,

egha bizir me amiba a bar dagh fo.

16 ✝ 33:16 Onger Akaba 44:6; 60:11 Atrivim mɨdorozir gumazir avɨriba ikɨtɨ,

me an akuragh mɨdorozim damu an apaniba abɨraghan kogham.

Ezɨ kamaghɨra mɨdorozir gumazim uan gavgavimɨn apaniba abɨraghan kogham.

17 ✝ 33:17 Onger Akaba 20:7; 147:10; Aghuzir Akaba 21:31 Mɨdorozir hoziam mɨdorozir gumazimɨn akuraghtɨ, a uan apaniba abɨraghan kogham.

Apaniba mɨdorozir gumaziba abɨraghtɨ, men hoziaba men akuraghan kogham.

18 ✝ 33:18 Jop 36:7; Onger Akaba 32:8-10; 1 Pita 3:12 Ia oragh! Gumazamizir Ikiavɨra Itir Godɨn atiatia an apengan itiba, an damazim men iti.

Gumazamizir kaba, me nɨghnɨzir gavgavim an apangkuvir arazimɨn iti.

19 ✝ 33:19 Jop 5:20; Onger Akaba 37:19; Aposel 12:11 A deragh gumazamizir kabar gantɨ me angamɨra ikiam.

Mɨtiriam aghamin dughiam otoghtɨ,

a men akuraghtɨ me daghem bagh ovengan kogham.

20 ✝ 33:20 Onger Akaba 62:1; 115:9; Aisaia 8:17 E Ikiavɨra Itir God baghvɨra mɨzuamɨva,

nɨghnɨzir gavgavim an ikɨtɨ an e geghuvam.

A en oramɨn mɨn iti,

ezɨ e an aven modima a en akurvasi.

21 E nɨghnɨzir gavgavim an ziar bar zuezimɨn iti.

Kamaghɨn, e uan navir averiabar aven a bagh bar akongegham.

22 O Ikiavɨra Itir God, e nɨghnɨzir gavgavim nɨn ikiavɨra ikia nɨn akurvazim bagha mɨzuai.

Kamaghɨn amizɨ nɨ en apangkuvigh mamaghɨra ikɨ.