Devit onger akar kam osiri.

Gumazir onger akar kabar faragha zuim, gumazibav geima, me gitabav sosi.

1 ✝ 4:1 Onger Akaba 17:6; 18:6; 18:18-19 O God, nan Akurvazir Gumazim, nɨ nan akuragha nan apaniba abɨra,

ezɨ kɨ nɨn dei, nɨ nan akuragh.

Fomɨra osɨmtɨzir bar ekiam nan itima, nan navim bar na baseme,

ezɨ nɨ nan akurazɨ osɨmtɨzim datɨrɨghɨn gɨfa.

Nɨ datɨrɨghɨn nan apangkuvigh nan dɨmdiam barakigh.

2 O gumaziba, dughiabar manmaghɨn, ia akar aghumsɨziba na gasɨ nan ziam gasɨghasɨvɨra ikiam?

Egh dughiabar manmaghɨn, ia nguazir kamɨn bizir kɨnibagh ifueghvɨra ikiam?

Ia dughiabar manmaghɨn arazir ifavarim gifueghɨvɨra ikiam?

(Ighiam gamua an suiam atugha avughsegha ua ighiam gami.)

3 ✝ 4:3 Onger Akaba 6:8-9; 50:5; 135:4 Ia akar kam bar deragh a gɨfogh.

Gumazamizir Ikiavɨra Itir Godɨn apengan itiba, God ua baghavɨra me ginaba.

Ezɨ kɨ an diazɨ, a nan azangsɨzim barasi.

4 ✝ 4:4 Onger Akaba 77:6; 119:11; Efesus 4:26 Ia atar uari bagh gan, egh arazir kuratam damuan markɨ.

Ia uan mɨsiabagh ireghɨv ikɨ,

mɨgɨrɨgɨar kam gɨnɨghnɨgh uan akabar kumigh.

(Ighiam gamua an suiam atugha avughsegha ua ighiam gami.)

5 ✝ 4:5 Godɨn Araziba 33:19; Onger Akaba 51:19; 62:8 Ia nɨghnɨzir gavgavim Ikiavɨra Itir Godɨn ikɨva,

ofan a ifongezibar amu.

6 ✝ 4:6 Dɨboboniba 6:26; Jop 7:7; 9:25 Gumazamizir avɨriba bizir aghuibar gan, bar akueghasa ifonge.

O Ikiavɨra Itir God, nɨn guamɨn angazangarim e gisirazɨ moghɨn,

nɨ bar e gifuegh en boroghɨra ikɨ, egh en apangkuvigh en akurvagh.

7 ✝ 4:7 Onger Akaba 97:11-12; 119:14; 119:72 Wit ko wainɨn ovɨziba azenibar aghua bar puvɨra bema, gumaziba da bagha bar akonge.

Ezɨ nɨ na gamizɨ kɨ nɨ bagha bar akongezir arazim, nan navir averiam bar a gizɨvagha,

wit ko wain gifongezir arazim guizbangɨra bar a gafira.

8 ✝ 4:8 Jop 11:19; Onger Akaba 16:9 Kɨ mɨsiamɨn ghua atiatir puvatɨghava akui.

Ikiavɨra Itir God, nɨrara deragha na akumakua nan garima,

kɨ deraghvɨra ikia atiatir puvatɨ.