1 ✝O God, nɨ nan apangkufigh.

Gumaziba zurara na mɨsogha nan agɨntɨsi.

Me dughiabar zurara arazir kurabar na gami.

2 Nan apanir kaba kamaghɨn ami,

me mɨzaraghara na ko mɨsogh mangɨ guaratɨghɨn gɨvagham.

Gumazir bar avɨriba uari fa nan apanim gami.

3 ✝O God, kɨ atiatir dughiabar,

kɨ nɨghnɨzir gavgavim nɨn ikɨvɨra ikiam.

4 ✝Kɨ Godɨn akam fa, egha nɨghnɨzir gavgavim Godɨn ikia atiatir puvatɨ.

Gumazir kɨnitam, arazir manatamɨn na damuam? Puvatɨ.

5 Dughiaba bar, bizir kɨ amiba nan apaniba dagh asɨghasɨsi.

Egha zurara na gasɨghasɨghasa tuaviba buri.

6 Me na mɨsueghtɨ kɨ aremeghasa uari akuva,

nan tuaviba isa mogav ikia, nan daroribar nan akuvamadi.

7 O God, nɨ men arazir kurar me amir kaba bagh arazitam men akagh.

Nɨ uan anɨngagharim akagh egh gumazir kaba bar me agɨfagh.

8 Nɨ na gɨfo, kɨ osɨmtɨziba aterava ara iti.

Nɨ nan temerir irir kaba,

nɨ bar ada mengegha uan akɨnafarimɨn ada osiri.

9 ✝O God, kɨ kamaghɨn fo, nɨ na baghavɨra iti.

Egh kɨ nɨn dɨmamin dughiamɨn, nɨ nan apanibar amightɨ me aregham.

10 Kɨ Godɨn akam gɨnɨghnɨgha a fe.

Guizbangɨra, kɨ Ikiavɨra Itir Godɨn mɨgɨrɨgɨaba pɨrafam.

11 ✝Kɨ nɨghnɨzir gavgavim Godɨn iti,

kamaghɨn, kɨ bizitamɨn atiatir puvatɨ.

Gumazir kɨnitam arazir manatamɨn na damuam? Puvatɨ.

12,13 O God, bizir kɨ fomɨra damuasa nɨ ko akam akɨrizim, kɨ a damuam.

Nɨ nan akurazɨ kɨ ovengezir puvatɨ.

Nɨ nan akurazɨ kɨ asaghpora irɨzir puvatɨ.

Kamaghɨn amizɨ, kɨ dughiabar zurara nɨ ko daru,

nɨn angazangarimɨn aven daru mangɨvɨra ikɨ ovegham.

Egh bizir nɨ amizir kaba bagh nɨ mɨnabɨva

ofa isɨ nɨ danɨngam.