Devit God ko mɨgeir mɨgɨrɨgɨaba osiri.

1 O Ikiavɨra Itir God, kɨ uabɨra uabɨn akurvaghamin gavgaviba puvatɨ.

Kamaghɨn, nɨ na baragh.

2 Kɨ nɨn ingangarir gumazim, kɨ nɨghnɨzir gavgavim nɨn ikia, nɨn gɨn zui.

Kamaghɨn amizɨ, nɨ ua nan akuragh na inightɨ, kɨ ovengan kogham.

3 O Ekiam, Kɨ dɨmagariba ko aruebar nɨn dei,

kamaghɨn, nɨ nan apangkufigh.

4 Ekiam, kɨ nɨn ingangarir gumazim.

Kɨ uan navir averiamɨn aven nɨ baghavɨra iti.

Kamaghɨn, nɨ na damightɨ nan navim bar akongegh.

5 ✝ 86:5 Nehemia 9:17; Onger Akaba 25:8; Joel 2:13; Jona 4:2 O Ekiam, nɨ bar dera,

egha gumazibar arazir kuraba gɨn amadi.

Egha nɨ ko mɨgeir gumazamiziba,

nɨ apangkuvir ekiam men ikia, men azangsɨziba barasi.

6 O Ikiavɨra Itir God, nɨ nan azangsɨzim deragh a baregh

nan akuragh.

7 ✝ 86:7 Onger Akaba 17:6; 50:15; 77:2 Kɨ fo, nɨ na baregh nan akurvagham.

Kamaghɨn, kɨ osɨmtɨzim itir dughiam, kɨ uabɨn akurvaghasa nɨn dei.

8 ✝ 86:8 Godɨn Araziba 3:24; 2 Samuel 7:22; Jeremaia 10:6 O Ekiam, nɨ iti moghɨn ua godɨn tam itir puvatɨ.

Tav nɨ ingari moghɨn ingari puvatɨ.

9 ✝ 86:9 Onger Akaba 66:4; Aisaia 66:23; Akar Mogomem 15:4 O Ekiam, ikɨzibar gumazamizir nɨ ingariziba bar izɨ,

nɨn ziar ekiam bagh teviba apɨrigh, nɨn ziam fam.

10 ✝ 86:10 Onger Akaba 72:18; Aisaia 44:6-8; Mak 12:29 Nɨ bar uabɨra mirakelɨn bar aghuibagh ami,

Nɨ uabɨra God.

11 ✝ 86:11 Onger Akaba 25:5; Jeremaia 32:39 Ikiavɨra Itir God, arazir kɨ gɨn mangasa nɨ ifongeziba,

nɨ deravɨra dar nan sure damigh.

Eghtɨ kɨ darara nɨghnɨgh,

zurara dar gɨn mangɨ nɨn ziam fam.

12 O Ekiam, nan God, kɨ uan navimɨn aven nɨ mɨnabɨva,

nɨn ziar ekiam zurarama a fasa.

13 Nɨ zurara bar nan apangkufi.

Kamaghɨn, nɨ ua na inizɨ, kɨ Gumazamizir Oveaghuezibar Nguibamɨn ghuzir puvatɨ.

14 O God, akaba batozir gumazir maba datɨrɨghɨn iza na ko mɨsoghasa.

Gumazir kurar kaba nɨn akabar gɨn zuir puvatɨgha,

uari akuvagha na mɨsueghtɨ kɨ aremeghasa.

15 O Ekiam, apangkuvir arazim ko, akurvazir arazim bar nɨ gizɨvazɨ nɨ zuamɨrama atarir puvatɨ.

Nɨ bar en apangkuvigha, deravɨra uan akamɨn gɨn ghua egha nɨghnɨzim giraghɨrazir puvatɨ.

16 Nɨ uamategh na bagh izɨ egh nan apangkufigh.

Kɨ nɨn ingangarir gumazim, nan amebam uaghan nɨn ingangarir amizim, a na bate.

Kamaghɨn, nɨ nan akuragh gavgavim na danɨng.

17 O Ikiavɨra Itir God, Nɨ bizitam damightɨ an otogh, nan akaghtɨ kɨ fogh suam, nɨ bar na gifonge.

Eghtɨ nan apaniba uaghan ganigh fogham, nɨ nan akuragha gavgavim na ganɨngi.

Kamaghɨn, me uan arazir kurar me amizir kam gɨnɨghnɨgh,

bar aghumsigham.