1 Ɗa Vuzavaguɗu u yaꞋin kadanshi nu mpa, u danai, 2 <<Bana vu dansa ukuna wi ili i nampa a atsuvu a aza Urushelima, vu dana le, Vuzavaguɗu u dana ta̱,

<<N ciɓa ta̱ nu usuɓi u nu a ayin a uɗenga̱ni u nu,

tsu vu cigai mu tsu vuka vu savu,

ɗa vu tonoi mu e meremune

a iɗika i na a̱ ca̱Ꞌi ba.

3 A ayin a nanlo aza a Isaraila o yongo ta̱ ciɗa u Vuzavaguɗu,

o yongo ta̱ wa̱ ni ci ili i kashina i na i gita̱i kugeꞋwe.

Vuza na baci dem u lyaꞋi ili a̱ ka̱tsuma̱ ki ili i kashina yu ugiti i nanlo u ronoko ta̱ ka̱ci ka̱ ni unushi,

wi ta̱ tana a kutakacika,

mpa Vuzavaguɗu, mpa ɗa n dansai.>>

4 Panai kadanshi ka̱ Vuzavaguɗu a̱ɗa̱ kpaꞋa ku Yakubu, a̱ɗa̱ kumaci ki Isaraila ra̱ka̱. 5 Vuzavaguɗu u dana ta̱,

<<Unushi we ene u ɗai ikaya i ɗa̱ i ciya̱i mu n uɗa

ali ɗa a banai daꞋangi nu mpa,

ɗa a̱ ka̱na̱i kutono a̱ma̱li?

Ɗa kpamu okpoi ili kavama?

6 Ele e ece ba, <Teɗai Vuzavaguɗu,

a̱yi na wu uta̱ka̱i tsu a iɗika i Masar,

ɗa u tonoi n a̱tsu e meremune,

a iɗika ya agbata n enle,

a iɗika yu ɗekpu n ka̱yimbi,

a iɗika i na vuza u tsu wala ba,

ubuta̱ u na uma a ci yongo ba?>

7 Ɗa n tuka̱i ɗa̱ a iɗika i maniꞋin,

adama a na i pana uyoꞋo wu umaci wu nɗanga n ili i singai i ni.

Ama a na i ta̱wa̱i ɗa i la̱nga̱sa̱i iɗika i va̱

ɗa i bonokoi ili yi uka̱ni i va̱ yi okpoi ili yu unata.

8 Anan ganu e ece ba, <Teɗai Vuzavaguɗu wi.>

Eyevafada e yeve mu ba,

nguɓi n uma a̱ va̱ a iwain mu,

Eneki a yaꞋin kene n utsura u BaꞋalu,

ɗa a ka̱na̱i kutono a̱ma̱li a na a̱ kuɓa̱nka̱ le ba.

9 <<Adama a nannai mpa Vuzavaguɗu n kubanka ɗa̱ ta̱ a̱ ubuta̱ wa afada,

Vuzavaguɗu ɗa u dansai,

a̱ɗa̱ m muku n ɗa̱ nu ntsukaya n ɗa̱.

10 Pasai a kubana a upashi u Kitimu n ka̱livi yi ene,

ko kpamu i suku a kubana Kedaru, ka̱ta̱ i la̱na̱ mayin,

ka̱ta̱ yi ene ko a ayin a cau a saꞋwa ta̱ kuyaꞋan ili tsu nampa.

11 Uma a saꞋwa ta̱ kusabaꞋa a̱ma̱li?

Ko an wo okpoi ele ili ɗa ba?

Ama uma a̱ va̱ a sabaꞋa ta̱ tsugbayin ci le.

adama a ili i na i gaꞋin ba.

12 Ɗa Vuzavaguɗu u danai, a̱ɗa̱ gaɗi paɗai bini adama a ili i nampa,

ka̱sukpa̱i ikyamba i ɗa̱ i kuwa̱, ka̱ta̱ yo okpo ukuna u gbani.

Vuzavaguɗu u danai

13 Adama na uma a̱ va̱ a yaꞋan ta̱ unushi ure,

a ka̱sukpa̱ mu ta̱,

mpa na mi ka̱shi ka̱ mini ma wuma,

ɗa a maꞋakai ka̱ci ke le ogbodo,

ogbodo a na a ɓatsai a na a kuka̱na̱ mini ba.

14 <<Isaraila kagbashi kaꞋa? Ko a matsai ta̱ a tsugbashi?

To yiɗa̱i i zuwai ɗa vo okpoi ucanuku u gbani?

15 Kawu u yaꞋan ta̱ yura̱ adama a̱ ni,

a yaꞋan ta̱ yura̱ ka̱u.

Adama na a̱ la̱nga̱sa̱ ta̱ iɗika i ni.

Likuci i ni yo okpo ta̱ agali, babu ili punu.

16 E ta nannai, aza a Memfisu koɓolo n aza a Tafanesu,

a puna ta̱ kaci ka̱ nu.

17 A̱ɗa̱ ɗa i ronokoi ka̱ci ka̱ ɗa̱ ili i nampa ba?

Ana i ka̱sukpa̱i Vuzavaguɗu Ka̱shile ka̱ ɗa̱,

a ayin a na u tonoi n a̱ɗa̱ a uye wu nwalu?

18 Gogo na yiɗa̱i i ciya̱i an i banai a Masar

adama na i soꞋo mini mo kuɗolu ma̱ Nilu?

Ko yiɗa̱i kpamu i ciya̱i a na i banai a Asiriya,

adama a na i soꞋo mini mo kuɗolu ku Yufiretu?

19 Mpa Vuzavaguɗu MalaꞋimili Ka̱shile n dansai. Asuvawuya a̱ ɗa̱ a ɗa i a kutakacika ɗa̱,

ka̱ta̱ unambi wu usuɓi u ɗa̱ u foro ɗa̱.

ka̱ta̱ i yeve a na kagbanigbani ka kpamu n okono,

a̱ɗa̱ i ka̱sukpa̱i kutono Vuzavaguɗu Ka̱shile ka̱ ɗa̱,

yi n wovon u va̱ a̱ a̱ɗu a̱ ɗa̱ ba, mpa Vuzavaguɗu MalaꞋimili Ka̱shile mpa ɗa n dansai.

20 <<Adama a na ali ɗe m megeshe ɗa n koɗoi kaburakpatsu ka maɗanga ka̱ ɗa̱,

ɗa mu utuka̱i ɗa̱ ubuta̱ wa atakaci,

ama ɗa i danai, <A̱tsu tsa kutono wu ba!>

Mayun, yi o kutono a̱ma̱li

a uɓon wa aginda dem,

n ubuta̱ u ulu a nɗanga feu.

21 N nannai dem, ɗa n shikpa̱i nu ci itacishi i singai,

i na i tsu okpo ili yu usuɓi.

Nini ɗai ɗa i bonoi i zuwakai mu kucina̱,

ɗa yo okpoi itacishi i gbanigbani?

22 Ko a na i za̱Ꞌi ka̱ci ka̱ ɗa̱ m ma̱zuma̱u ma singai

ko a na i sumba̱i m ma̱zuma̱u ma̱ a̱bunda̱i,

kalana ku unushi ka̱ ɗa̱ ka buwa ta̱ wa̱ va̱, mpa Vuzavaguɗu mpa ɗa n dansai.

23 Niniɗai i kudana, <Mi n unata ba,

mpa n tono ka̱ma̱li ka BaꞋalu ba>?

La̱na̱ biꞋi urotu u na vu walai a̱ ka̱ra̱Ꞌa,

Yevei i na i yaꞋin ɗe,

yi ta̱ tsu maku ma karakuma ma na mi a kubana m mo bonoi,

24 tsu majaki ma kakamba mana ma kiwanai n kakamba,

ma na ma cikalai mazama,

Yayi vuza na u kusa̱nka̱ yi?

U yotso vuza vu na wi a̱ kula̱nsa̱ yi u takacika ba,

adama a na o wotoi u mazama u ni u ɗa a̱ kuciya̱ yi.

25 A̱ɗa̱ Isaraila ka̱ta̱ i ka̱sukpa̱ ene a̱ ɗa̱ babu ataka ba,

ka̱ta̱ i ka̱sukpa̱ igboroli i ɗa̱ i ɗekpei ba.

Ama ɗa i danai, <Nannai va u gaꞋan ba,

adama a na n ciga ta̱ omoci a̱ a̱ma̱li,

ele ɗa kpamu n kutono.>

26 <<Tsu na koboki ka tsu pana wono ayin a na baci e remei ni,

nannai ɗa kpaꞋa ki Isaraila ka kupana wono,

ele nu ngono n le, koɓolo n aza gbagbaꞋin e le,

anan ganu koɓolo n eneki e le dem,

27 ele na a tsu dana maɗanga,<Avu ɗa eshekpu a̱ tsu.>

katali tamkpamu, <Avu ɗa vu matsai tsu,>

Adama na a̱ shirikpa̱ka̱ mu ta̱ kucina̱,

e neke mu a̱shi e le ba.

Ama ayin a na baci atakaci a̱ ciya̱i le ka̱ta̱ a dana,

<Ɗa̱nga̱ vu wawa tsu!>

28 Ama teɗai a̱ma̱li a̱ ɗa̱ a,

a na i yaꞋankai ka̱ci ka̱ ɗa̱ ka?

Ka̱sukpa̱i le a̱ ɗa̱nga̱, i baci a kufuɗa a kisa ɗa̱,

a ayin atakaci a̱ ɗa̱,

adama na tsu na ka̱bunda̱i ka likuci i ɗa̱ yi,

ta a̱ma̱li a̱ ɗa̱ i nannai, a̱ɗa̱ aza Yahuda.

29 <<Yiɗa̱i i zuwai ɗa yi a kuyaꞋanka mu ugbamukaci?

Yevei a na ra̱ka̱ vu ɗa̱ ɗa i nusakai mu.

Mpa Vuzavaguɗu n dansai,

30 Gbani ɗa n takacikai uma a̱ ɗa̱,

ele a sabaꞋa ba,

otokobi a̱ ɗa̱ a ɗa a unai eneki a̱ ɗa̱,

otokobi a̱ ɗa̱ a lyaꞋa ta̱ eneki a̱ ɗa̱ dem

tsu kawu na vi n kambulu.

31 A̱ɗa̱ uma o gogo na a nampa, panai kadanshi ka na mpa Vuzavaguɗu mi a kudansa.

Mpa mo okpo ta̱ tsu kakamba wa aza a Isaraila ɗa?

Ko ci iɗika i ka̱bunda̱i ka gbayin?

Adama a nannai, yiɗa̱i i zuwai ɗa uma a̱ va̱ i a kudana,

<A̱tsu ci ta̱ ba̱ri,

ci o kudoku kuta̱wa̱ wa̱ nu kpamu ba>?

32 Mekere mi ta̱ a kucinukpa n vudolu vi singai vi ni,

ko kpamu vuka vu savu vu cinukpa m motogu mo tsuzogu ma̱ ni?

Dem n nannai uma a̱ va̱ a cinukpa ta̱ nu mpa,

ayin n a̱bunda̱i.

33 <<Ama ɗa i yevei tsu na,

i kuzagba ncigi n ɗa̱!

ali n a̱ma̱ci a gbani-gbani,

ɗa i piꞋisakai le uye u ɗa̱.

34 Ɗa kpamu a cinai a nyaga n ɗa̱

mpasa ma aza unambi n aza a babu unushi,

i cina le feu tana a uboki a kpaꞋa kuɗa̱ ba,

ko n nannai dem,

35 ɗa i danai, <Mpa mi n unushi ba,

mayun wupa u ni u buwa a kaci ka̱ va̱ ba.>

Ama mpa n kuyaꞋanka ɗa̱ ta̱ afada,

adama a na i dana ta̱, <Mpa n yaꞋan unushi ba.>

36 Yiɗa̱i i zuwai ɗa vu kpa̱ɗa̱i kushamgba mejege,

a kusabaꞋasuka nwalu u nu?

Vi ta̱ o kokpo n wono adama aza a Masar,

uteku tsu na vu yaꞋin wono a ekiye aza a Siriya.

37 Vi ta̱ feu a̱ kuka̱sukpa̱ ubuta̱ u nanlo,

n ekiye a̱ nu a kaci,

adama a na Vuzavaguɗu u iwan ta̱ aza a na i nekei katsura,

yi kpamu a̱ kuciya̱ uɓa̱nki we le ba.