1 <<Ɗa baci vuza u lokoi vuka vi ni,

ɗa vuka va vu ka̱sukpa̱i ni

ɗa vu banai vo oloi vali vi yoku,

wi ta̱ kpamu a kufuɗa kudoku kubonoko yi?

Nannai va wa kuzuwa iɗika yo okpo n unata ba?

Vi yaꞋan ta̱ cishakanlai n ncigi n a̱bunda̱i,

niniɗai kpamu gogo na vi a kuciga kubono wa̱ va̱?

Mpa Vuzavaguɗu mpa ɗa n dansai,

2 Ɗengusa̱ a̱shi a̱ nu gaɗi avu Isaraila, vu la̱na̱ aginda a na i babu mita̱ vu ene.

Te ɗai vu kpa̱ɗa̱i kuvaku kuyaꞋin cishakanlai?

A uye wu nwalu, ta ɗe vi ci shamgba a kuvana ncigi nu,

an vuza va aza a Araba a kakamba.

Vu la̱nga̱sa̱ ta̱ iɗika ya

n tsugbani tsu nu.

3 Adama a nannai i ɗaɗa i zuwai ɗa a̱ kpa̱ɗa̱i kuyoꞋo mini ma̱ Ka̱shile,

kpamu o doku o yoꞋo mini ma̱ lyushi ba.

Ama n nannai dem ɗa vu lyaꞋi kelime n cishakanlai,

vu kpa̱ɗa̱i kupana wono.

4 Gogo na ɗa vi a kudana,

<Avu ɗa esheku a̱ va̱, vu ciga mu ta̱ ali mpa biꞋi maku,

5 mayun, va kulyaꞋa kelime n kuyaꞋan wupa a makyan dem ba?>

Mayun wupa u nu wi ta̱ a kuzuwaka uteku

Ta vi yaꞋin kadanshi nannai,

Ama vi yaꞋan ta̱ ɗe kagbanigbani ka na va kuyaꞋan dem.>>

6 A ayin a na mogono Josiya wi o tsugono ɗa Vuzavaguɗu u danai mu, <<Vu ene ta̱ ili i wasasa i na Isaraila u yaꞋin? Tsu na u kumbai gaɗi vu nsansa n nlulu a nɗanga ra̱ka̱ a kuyaꞋan tsugbani? 7 Mpa nsheshe ta̱, <Ayin a na baci de dem u kotsoi iyaꞋanshi i nampa ra̱ka̱ wi ta̱ o kubono,> ama ɗa u kpa̱ɗa̱i kubono, kpamu toku ni Yahuda n unambi wu usuɓi u ni we ene ta̱. 8 Yahuda ta na we ene ta̱ tsugbani tsu na Isaraila u yaꞋin, ɗa n lokoi ni, n nekei ni katagarda ku uloki. Ama dem n nannai, a̱yi toku ni nanlo Yahuda u pana wovon ba, ɗa u lyaꞋi kelime n kuyaꞋan tsugbani ci ni. 9 Adama a na we ene ta̱ tsugbani a̱ ubuta̱ u ni ili i gbani i ɗa, ɗa u la̱nga̱sa̱i iɗika ya. U ka̱na̱i kuyaꞋan tsugbani n atali nu nɗanga. 10 Ko n nanai dem toku ni Yahuda u bono wa̱ va̱ n ka̱ɗu kete ba, ama n kagbanigbani, mpa Vuzavaguɗu mpa ɗa n dansai.>>

11 Ɗa Vuzavaguɗu u danai mu, <<Ko a na wo okpoi Isaraila u ka̱sukpa̱ ta̱ kutono mu, dem n nannai u ɗika ta̱ unushi u ni, u yawa u Yahuda ba. 12 Bana vu dansa akaka a nampa a uɓon wa aza a gaɗi, vu dana le,

<< <Bono avu Isaraila vu babu usuɓi, mpa Vuzavaguɗu n dansa ta̱,

Mpa n doku n yaꞋan wupa n a̱vu kpamu ba,

adama a na mpa vuza va asuvayali ɗa, mpa Vuzavaguɗu n dansa ta̱,

Mpa n kulyaꞋa kelime n kuyaꞋan wupa n a̱vu ali babu uteku ba.

13 Ili ite koci i ɗaɗa, a̱ɗa̱ de ushuki n unushi u ɗa̱,

I yeve a na i nusakai Vuzavaguɗu Ka̱shile ka̱ ɗa̱,

i vakangi tsugbayin tsu ɗa̱ a̱ ubuta̱ wo omoci n ululu a nɗanga dem,

ɗa i iwain kutono kadanshi ka̱ va̱, mpa Vuzavaguɗu mpa ɗa n dansai,

14 Bonoi, a̱ɗa̱ uma a babu usuɓi,

adama a na mpa ɗa Ka̱shile ka̱ ɗa̱,

N kuɗika ta̱ vuma vu te a ka̱tsuma̱ ka̱ likuci, n uma e re a̱ ka̱tsuma̱ ka kpaꞋa dem,

Ka̱ta̱ n tuka̱ na a Sihiyona.

15 << <Ka̱ta̱ n neke ɗa̱ nguɓi, n na n kuneke ɗa̱ kuyeve n ugboji. 16 Ka̱ta̱ ayin a na baci i yimkpai n ka̱bunda̱i a iɗika ya, ka̱ta̱ i kpa̱ɗa̱ kudoku kuyaꞋan kadanshi ka <<Akpati vu uzuwakpani vu Vuzavaguɗu.>> Yi o kudoku kuciɓa n vu ɗa ba, ko tana i cikala kudoku kuyaꞋan vi yoku ba. 17 A ayin a nanlo a ɗa e kuɗeke Urushelima kakuba ko tsugono ka Vuzavaguɗu, Ka̱ta̱ uduniyan ra̱ka̱ u ɓolongu e kelime ka Vuzavaguɗu a Urushelima adama a kula ku va̱, ka̱ta̱ a̱ kpa̱ɗa̱ kudoku kutono ucigi u gbani-gbani wa̱ a̱ɗu e le. 18 A ayin a nanlo ka̱ta̱ kpaꞋa ku Yahuda ku ɓolongu ka̱ci ke le m kpaꞋa ki Isaraila, ka̱ta̱ a̱ uta̱ a iɗika yi uɓon ugaɗi koɓolo, ka̱ta̱ a bana a iɗika yi uka̱ni i na n nekei ikaya i le.

19 << <Ɗa n danai,

Nini ɗai mpa n kuɗika ɗa̱ yo okpo a̱ ka̱tsuma̱ ka̱ muku n va̱,

adama a na n neke ɗa̱ iɗika i singai,

ili yi uka̱ni i singai i na i laꞋi a aduniyan ra̱ka̱.

N sheshe ta̱ ya kuɗeke mu ta̱, Dada vu va,

kpamu yi a kukpatala i ka̱sukpa̱ kutono mu kpamu ba.

20 Mayun, uteku tsu na vuka vu gbani-gbani vu tsu ka̱sukpa̱ vali ni,

ta feu vu ka̱sukpa̱i mu nannai avu Isaraila, mpa Vuzavaguɗu mpa ɗa n dansai.> >>

21 A pana ta̱ a̱la̱ka̱tsu a̱ ma̱shi a nsansa,

a̱ ma̱shi n o folonoi aza a Isaraila,

adama a na a ka̱sukpa̱ ta̱ uye u le,

a cinukpa ta̱ n Vuzavaguɗu n Ka̱shile ke le.

22 <<Bonoi a̱ɗa̱ muku m gbani-gbani,

mpa n kupotsotongu ta̱ unambi wu usuɓi u ɗa̱,>>

<<La̱na̱, ci ta̱ a̱ kuta̱wa̱ wa̱ nu,

adama a na avu ɗa Vuzavaguɗu Ka̱shile ka̱ tsu.

23 Mayun, kutono ka̱ a̱ma̱li a gaɗi vu nsasan ili i gbani i ɗa,

kucikpa ku na ci a kuyaꞋan a aginda modoruko maꞋa.

Mayun, u Vuzavaguɗu Ka̱shile ka̱ tsu kaꞋa koci,

aza Isaraila a̱ kuciya̱ wishi.

24 <<Adama a na kutono ka̱ a̱ma̱li BaꞋalu kukotso tsu ta̱ ili i na ikaya i tsu i takacikai adama a̱ tsu, ali a̱ tsu muku, kukotso tsu ta̱ ushiga wu nlala n wu nraɗika n wa anaka m muku n tsu nkere n olobo.

25 Ka̱sukpa̱ tsu vaku n wono u tsu, ka̱ta̱ unambi wu usuɓi u tsu u pala tsu. Adama na tsu nusaka ta̱ Vuzavaguɗu Ka̱shile ka̱ tsu, a̱tsu n ikaya i tsu, ali a̱tsu muku a̱ kuta̱wa̱ anana, tsu tono kadanshi ka Vuzavaguɗu Ka̱shile ka̱ tsu ba.>>