1 Ishi baci a dana kaci ka̱ va̱ mini maꞋa,

a̱shi a̱ va̱ kpamu a̱shi a mini a ɗa,

Mishi a̱ kushika̱ kanna n kayin, adama uma a̱ va̱ a na irala i le yu unai.

2 Ishi baci a dana mi a kufuɗa n laza n ka̱sukpa̱ uma a̱ va̱ ka̱ta̱ n cinukpa n ele,

ka̱ta̱ m bana n sheɗeku a kakamba,

adama na a iwain ku tono wila̱ u Vuzavaguɗu,

ɗa okpoi ashakanlai a na o tsu doro uma.

3 A ci yaꞋan ta̱ ulinga n elentsu e le a dansa ka uwa,

an uma a na a tsu taɗuku ayaꞋa a utan.

adama a ukuna wa a uwa u le u ɗa u zuwai ɗa okpoi aza u tsura a i ɗika i nampa,

e le tana e yeve mu ba.

4 Ka̱ta̱ vu ushuku n toku nu na yi ɗe ɗevu ba ko toku nu ba.

adama a na ra̱ka̱ aza a modoruko a ɗa u teku tsu na Yakubu wi,

o tsu doronoi ta̱ ka̱ta̱ kpamu a yaꞋin kpanai a uwa.

5 o tsu doro ta̱ a̱ja̱Ꞌa̱ le,

ka̱ta̱ a iwan kudansa kamayun,

ayin tutu a uwa a ɗa le u linga, a dama nanai, i ɗa ɗa i zuwa ɗa okpoi a fuɗai a uwa,

ka̱ta̱ a ka̱na̱ ma yaꞋin mu unushi babu ku kotso, a li uteku tsu na a ku fuɗa a ɗa̱skpa̱ ba.

6 Ka̱ta̱ gangai a ka̱na̱ ma yaꞋin kpanai m a uwa n o odoronsonoi,

a li uteku tsu na a ku namba vuza na wa a ku dana mpa ɗa Vuzavaguɗu.

7 Adama nannai, Vuzavaguɗu MalaꞋimili u dana ta̱.

<<La̱na̱, mpa n ku luwa̱ le ta̱ ka̱ta̱ n kondo le,

adama na mpa mene i na i buwai ma kuyaꞋin adama a uma a̱ va̱ ba?

8 Elentsu e le ayaꞋa a tsukono a ɗa,

a ma dansa mu ukuna wa a uwa,

yaba dem utsu dansa ta̱ ukuna u kasingai n toku ni,

ama a ka̱ɗu ka̱ ni ka̱ta̱ u sheshe kei ka gbani-gbani ufoɓi.

9 Ashe ugan n takacika le adama i li na mpa ba? Vuzavaguɗu u danai,

ashe ugan n yaꞋanka ka̱ ci ka̱ va̱ katsupu

adama icuꞋu yu uduniya i na mpa ba?

10 <<Mpa n kushika̱ ta̱ ka̱ta̱ n yaꞋin kpalu adama nsansa,

ka̱ta̱ kpamu n yaꞋan kpalu adama ubuta̱ u kalina,

adama a na u ɗekpu ta̱ ɗa wokpoi ukuna u gbani, u teku tsu na babu vuza na u ku tono ɗe,

babu tana odoku a pana ma̱shi ma anaka ɗe,

n nnu dem koɓolo n ili kakamba

ra̱ka̱ i suma ɗe.

11 N kubonoko ta̱ Urushelima kotomo ka agali,

ubuta̱ u kalina wa nsheꞋe n kakamba,

ka̱ta̱ kpamu m bonoko Yahuda lekeɗi,

babu vuza.>>

12 Ya yi vuza na wi n ugboji u na wi a kuyeve ili i na mpa? Vuza na Ka̱shile ka yaꞋin kai kadanshi adama na u dana uma kaꞋa? Yiɗa̱i i zuwai ɗa o bonokoi iɗika ya agali an kagbata, tsu na babu vuza na u ku tono punu? 13 Ɗa Vuzavaguɗu u danai. <<Adama na a̱ ka̱sukpa̱ ta̱ wila̱ u va̱ u na n zuwakai le, kpamu ɗa a iwain ku tono kadanshi ka̱ va̱ ko kpamu a iwain ku yaꞋin u linga n kaꞋa, 14 ama ɗa a yaꞋin ugbamukaci ɗa o tonoi ucigi wa a̱ɗu e le a ka̱ni kutono ka̱ma̱li ka Balu, uteku tsu na eshekpu e le i yotsongi le. 15 Adama nannai, ɗa Vuzavaguɗu MalaꞋimili Ka̱shile ki Isaraila ka dana. La̱na̱, mpa n ku lyaꞋatangu ta̱ uma a na mpa n ilikulyaꞋa ya okono m mini mo tsukono o soꞋo. 16 N kuwacuwa le ta̱ a iɗika yu uduniya e le ko ikaya e le i yevei ba, ka̱ta̱ n zuwa una le n otokobi.>>

17 Vuzavaguɗu malaꞋimili u dana ta̱.

<<YaꞋin cico, ka̱ta̱ i ɗeke a̱ma̱ci a na e yevei ma̱shi ma kpalu a̱ ta̱wa̱,

su uki e ɗeke a̱ma̱ci a na a fuɗai a̱ ta̱wa̱,

18 Ɗa̱skpa̱i a dakaka a̱ ɗa̱ngusa̱ a̱la̱ka̱tsu a̱ ma̱shi e le tsu pana,

adama na a̱shi a̱ tsu o ɗoro n kujilya,

ka̱ta̱ igapalyawu i tsu i ɗoro mini.

19 Adama na uma a pana ta̱ eɗeku a uma a̱ ma̱shi a Sihiyona,

a kudana, <La̱na̱, uteku tsu na tsu na̱mgba̱i,

Tsokpoi ta̱ i li wono,

adama na o loko tsu ta̱ tsu ka̱sukpa̱i iɗika ya,

adama na a la̱nga̱sa̱ ta̱ ubuta̱ wi ida̱shi i tsu.> >>

20 Ɗa Irimiya u danai, a̱ɗa̱ amaci panai kadanshi ka Vuzavaguɗu

ka̱ta̱ i ka̱sukpa̱ atsuvu a̱ɗa̱ ushuku n kadanshi ku una̱u u ni,

yotsongi nkere n ɗa̱ ma̱shi ma kpalu,

ka̱ta̱ yaba dem feu u yotsongu toku ni vishipa vu kpalu.

21 Adama na ukpa̱ u uwa ta̱ atusu i iwa i tsu,

uwa ta̱ a efeku a̱ tsu,

a ku una muku uye ugbain,

a̱ ɗenga̱ni kpamu an nsanji n likuci.

22 Vuzavaguɗu u dana ta̱, <<Dansa,

<Even ikyamba a uma i ta̱ a ku ka̱na̱ ku yikpa̱sa̱,

tsa a̱wiya̱n e keteshe,

ci ishina i na aza makapa a kapai,

ka̱ta̱ a namba vuza na u ku ɓolongu le.> >>

23 Vuzavaguɗu u dana ta̱, <<Ka̱ta̱ vuza vu ugboji u lapa a̱pa̱ adama ugboji u ni ba, ka̱ta̱ kpamu vuza vu tsura u lapa a̱pa̱ adama u tsura u ni ba, ka̱ta̱ kpamu vuza vu ciyi u lapa a̱pa̱ adama u ciyi u ni ba, 24 ama ka̱sukpa̱ yaba dem na u ku lapa a̱pa̱ u lapa adama ili i na mpa, an u ciya̱i kuyeve ɗa u yevei mu an mpa ɗa Vuzavaguɗu na u tsu yaꞋin kasingai, n kamayun n ku usuɓi u duniya. Adama na i ɗa ɗa i ci neke mu yoꞋo, mpa, Vuzavaguɗu mpa ɗa n dansai.>>

25 Vuzaguɗu dana ta̱, <<La̱na̱, kanna ki ta̱ lo a kuta̱wa̱, kana n ku takacika aza na i nu ukiɗi wa avaja i kyamba koci. 26 Wa ta, aza Masar, n aza Yahuda, n aza Edom olobo a Amuno, n aza Moba koɓolo n aza na i ida̱shi agbata, aza na a tsu puna a̱nji e le an ca̱Ꞌa̱n, adama na uduniya u na mpa ra̱ka̱ aza ofoto a ɗa, koɓolo n aza Isaraila ra̱ka̱ aza unambi wa avaja u ɗa, a̱ a̱ɗu.>>