1 Vuzavaguɗu u dana ta̱,<<A̱ɗa̱ aza Isaraila,

yi baci a kukpatala ka̱ta̱ i bono wa̱ va̱.

yi baci a kutakpa ili yi unata i ɗa̱ kelime ka̱ va̱,

ka̱ta̱ kpamu i doku i ciɓa n i ɗa ba,

2 kpamu ɗa baci i kucinai, <N Vuzavaguɗu vu wuma,>

n kamayun, n kasingai koɓolo n usuɓi,

nannai, iɗika yi uduniya ra̱ka̱ i ku zuwakpanai ta̱ una̱singai adama a̱ ni,

ka̱ta̱ a̱ ciya̱ tsugbayin wa̱ ni.>>

3 Adama na Vuzavaguɗu u dana ta̱ aza Yahuda n aza Urushelima:

<<Kpa̱ra̱i a̱pula̱ka̱ a̱ ɗa̱,

ka̱ta̱ i yaꞋin vica̱Ꞌa̱ a̱ ubuta̱ wa awana ba.

4 Ciɗatangi ka̱ci ka̱ ɗa̱ u Vuzavaguɗu,

takpai unata wa̱ a̱ɗu a̱ ɗa̱,

a̱ɗa̱ aza Yahuda n Urushelima.

talo wupa u va̱ wa̱ ɗa̱nga̱ wa̱ɗa̱ tsa akina,

ka̱ta̱ u kula̱ tsu na vuza u kufuɗa kukima̱ ba,

adama a kagbanigbani ka̱ ɗa̱.>>

5 Dansai a Yahuda ka̱ta̱ i salaka aza a Urushelima, i dana.

<<I lika̱ ishiyaun a̱ ka̱tsuma̱ ki iɗika dem

Lapai una̱ ka̱u, ka̱ta̱ i dana,

<Ɓolongi ubuta̱ ute, ka̱ta̱ tsu suma a kubana

asuvu a̱ likuci yi ukanji.>

6 Ɗengusa̱ urotu a kubana Sihiyona,

Sumai, adama a wuma u ɗa̱, ka̱ta̱ i shamgba ba,

adama a na mi ta̱ a̱ kutuka̱ n atakaci a uɓon gaɗi,

m munuka ma̱ a̱bunda̱i.

7 Kawu wu uta̱ ta̱ a̱ kura̱ ku ni,

vuza munuka vu iɗika kakau u foɓuso ta̱ kuta̱,

wu uta̱ ta̱ u ka̱sukpa̱ ta̱ ubuta̱ u ni

adama a na u la̱nga̱sa̱ iɗika i ɗa̱

likuci i ɗa̱ yi ta̱ o kokpo agali

babu vuza.

8 Adama nannai ukai akashi a kpalu,

yaꞋin kpalu n i shika̱i,

adama na wupa u gbangam u Vuzavaguɗu

wi a kukpatala ku ka̱sukpa̱ tsu ba.>>

9 Vuzavaguɗu u dana ta̱<<A kanna ka nanlo. Ngono n aza a gbagbaꞋin i ta̱ a kunamba utsura wa a̱ɗu. Ka̱ta̱ anan ganu a dagaza, ka̱ta̱ eneki tamkpamu a yaꞋan mereve.>> 10 Ɗa n danai, <<Vuzavaguɗu Ka̱shile mayun vu doro ta̱ uma a nampa n Urushelima, ana vu danai, <Wi ta̱ a kugaꞋan ɗa̱,> wannai ɗai tana otokobi ka gbatya ɗe eɗeku e le.>>

11 A ayin a nanlo, i ta̱ a kudana uma a nampa n aza a Urushelima,<<Wunla̱i u gbani-gbani wi ta̱ a̱ kuta̱ a iɗika ka̱ta̱ u lapa uma a̱ va̱, ba adama a na u yelekpe le ko u bonoko le ciɗa ba, 12 wunla̱i u gbangam tsu nampa wi ta̱ a kuta̱ wa̱ va̱. Gogo na mpa ɗa vuza na u kukiɗaka le afada.>>

13 La̱na̱ biꞋi, wi ta̱ a̱ kuta̱wa̱ an keleshu.

Ekeke odoku a̱ ni an kabatalikpau,

odoku e le a laꞋa ta̱ mashangi ilaɗi,

ili ya atakaci i ɗa wa̱ a̱tsu, adama a na o kotso ta̱ n a̱tsu.

14 Avu Urushelima takpa kagbanigbani ka na ki a̱ ka̱ɗu ka̱ nu,

adama a na vi ciya̱ wishi.

Ali wannai ɗai va kulyaꞋa kelime n kusheshe kagbanigbani ko yongo

a̱ ka̱ɗu ka̱ nu?

15 Adama a na ka̱la̱ka̱tsu kuta̱ ta̱ u Dan,

ɗa ka dansai ukuna u wuya u na wi a̱ kuta̱ a kusan ku Ifiraimu.

16 Dana uduniyan an wi lo a kuta̱wa̱,

Dana aza a Urushelima,

<<Aza a na i a̱ kutuka̱ yi n kuvon ka, i ta̱ a̱ kuta̱ a iɗika i daꞋin,

ka̱ta̱ a ka̱na̱ ku yaꞋanka aza a Yahuda kacaꞋa.

17 Ka̱ta̱ a kanza Yahuza a̱ kuka̱ra̱Ꞌa̱ an ka̱pula̱ka̱,

adama a na u yaꞋanka mu ta̱ ugbamukaci,

Vuzavaguɗu ɗa u dansai.

18 Ukuna u ɗa̱ u ɗa n kawuya

u ronokoi ɗa̱ atakaci a nampa.

Na ɗa ukoci u ɗa̱, kpamu wi ta̱ o kokpo n okono,

a ɗa uwa ta̱ ali a̱ ka̱ɗu.>>

19 Atakaci a̱ va̱, atakaci a̱ va̱, mpa n sheɗeku ta̱ a ka̱tsuma̱ ka atakaci.

Kai! ka̱ɗu ka̱ va̱ ki ta̱ a̱ kumuɗa̱.

Ka̱ɗu ka̱ va̱ ki ta̱ a kulapa n a̱bunda̱i,

mpa n kufuɗa kupaɗa bini ba,

adama a na m pana ta̱ ciliki ci vishiyaun,

m pana ta̱ izumgbi i kuvon

20 Atakaci o kutono atakaci,

likuci ya ra̱ka̱ yo okpo ta̱ una̱mgbi.

nva̱li n va̱ dem n yaꞋan ta̱ una̱mgbi

akashi a̱ utsutsu a̱ va̱ feu nannai.

21 ali wannai ɗai ma kushamgba a kinda eleje o kuvon?

N ciliki ci ishiyaun?

22 <<Adama a na uma a̱ va̱ alau a ɗa,

kpamu e yeve mu ba.

muku n kavama n ɗa,

Ele i n kuyeve ba.

<E yeve ta̱ kuyaꞋan kawuya.>

Ama e yeve tsu na a kuyaꞋan kasingai ba.>>

23 Ana n la̱na̱i aduniyan, ɗa me enei a ɗa babu ili, a ɗa lekeɗi,

gaɗi kpamu, ɗa me enei babu kutashi.

24 Ana n la̱na̱i nsansa, ɗa me enei n ɗa a̱ kugba̱ɗa̱sa̱,

aginda kpamu a kubana n o bonoi.

25 Ana n la̱na̱i, ɗa me enei ko vuma te u buwa lo ba,

nnu kpamu feu n suma ɗe.

26 Ana n la̱na̱i iɗika i singai, ɗa me enei i ɗa ra̱ka̱ yo okpoi ɗe akamba,

ɗa likuci ra̱ka̱ yo okpoi agali

e kelime ka Vuzavaguɗu adama a wupa u ni.

27 Ili na Vuzavaguɗu u danai i ɗaɗa na.

<<Iɗika ra̱ka̱ yi ta̱ o kokpo agali, ama mi a ku una i ɗa ra̱ka̱-ra̱ka̱ ba.

28 <<Adama a ili i nampa uduniya wi ta̱ a kuyaꞋan kpalu,

ka̱ta̱ gaɗi u lima̱na̱,

adama a na n yaꞋan ta̱ kadanshi, ta tana ka ki nannai,

N sheshe ta̱ ɗe i na ma kuyaꞋan, mi tana o kubono n kucina̱ ba.>>

29 Nu upani u kacaꞋa ko odoku n ka atain

ka̱ta̱ likuci ra̱ka̱ i suma,

Aza o yoku i ta̱ a kuꞋuwa a̱ a̱ra̱Ꞌa̱, ka̱ta̱ aza o yoku kpamu a kumba a nsansa,

ka̱ta̱ likuci ra̱ka̱ i ɓoso,

babu vuza na wi o kuyongo punu.

30 Ama avu, agali,

yi ɗa̱i i zuwai ɗa vu ukai ucanuku u singai mayin nannai,

ali ɗa vu kalai ka̱ci ka̱ nu n ucanuku wa azanariya,

ali ɗa vu dakakai kushinuku a̱ta̱nza̱ri a̱ a̱shi a̱ nu?

Gbani ɗa vu lapulai ka̱ci ka̱ nu,

ncigi n nu n goyo wu ta̱,

ita̱ a̱ kula̱nsa̱ wuma u nu.

31 M pana ta̱ malapa mu una̱ tsu vuka va̱ a̱ga̱nda̱ a limata,

a ciꞋinki tsu vuka va̱ a̱ga̱nda̱ a maku ma iyain,

ma̱shi ma nkere n Sihiyona a kuꞋinka n utsura,

U ba̱rukpa̱i ekiye a̱ ni a̱ ma̱shi n u danai,

<<Ɓoɓou, mi ta̱ a̱ kuꞋuwa e kelime ka aza a̱ ma̱ga̱la̱ka̱.>>