1 A̱ɗa̱ aza a Bayami, sumai adama a na i laꞋaka n wuma u ɗa̱,

sumai i ka̱sukpa̱ Urushelima.

Ka̱ta̱ i lika̱ ishiyaun a Tekowa,

ka̱ta̱ i ɗengusa̱ urotu a Betu-hakeremu,

adama a na ma̱da̱ka̱ ma̱ uta̱ ta̱ uɓon ugaɗi u ka̱na̱ ta̱ uye a kuta̱wa̱.

koɓolo n atakaci a̱bunda̱i.

2 Avu ka̱ɗu ka̱va̱ Urushelima,

avu ɗa ubuta̱ u singai u kaguɓa,

ama mi ta̱ a ku una wu.

3 Nguɓi mi ta̱ a̱ ku uta̱ koɓolo n ushiga wu nlala u le adama a̱ ni,

ka̱ta̱ a̱ shikpa̱ a̱pa̱m e le wa̱ ni,

ka̱ta̱ a lina, yaba dem n ubuta̱ u ni.

4 <<Foɓuso kuvon adama a̱ ni,

ɗa̱nga̱i, adama a na ci shilika̱ n ele kanna a kaci.

ili ya atakaci i ɗa wa̱ tsu, adama a na kanna ka ka̱ yikpa̱ ta̱,

ubuta̱ kpamu a̱ yimba̱na̱.

5 Ɗa̱nga̱i, adama a na tsu bankai kuvon n kayin

ka̱ta̱ tsu la̱nga̱sa̱ nshilya n ni.>>

6 Adama a na Vuzavaguɗu MalaꞋimili u dana ta̱.

<<Kapai nɗanga n ni i taɗuku a iɗika,

ɗa̱ngusa̱ nshilya n kayala adama a Urushelima.

mayun ɗa a takacika likuci i nampa,

adama a na ko koyoku i punu n kaꞋa ba, sai modoruko.

7 Uteku tsu na kayinva ka̱ tsuwa̱ mini ma̱ ni,

ta feu u tsuwa̱ ka gbani-gbani ka̱ ni nannai,

uma a pana ta̱ arabali a̱ vishili, n munuka ma̱ ni

kanna lakam mi ta̱ e kene untsu a̱ ni e kelime ka̱ va̱.

8 Pana odoki a̱ va̱, avu Urushelima,

ta lo ma kuta̱wa̱ ma̱ shirikpa̱ka̱ ɗa̱ adama a unata u ɗa̱,

ta lo ma kuta̱wa̱ mo bonoko ɗa̱ agali,

iɗika i na yi ko vuza.>>

9 Vuzavaguɗu MalaꞋimili u dana ta̱,

<<I ta̱ a kuɗaya kagimi ka aza a Isaraila a na a buwai

tsu na a tsu ɗaya kashina ki itacishi,

u ba̱ra̱kpa̱ kukiye ku ni

a acaka.>>

10 U yayi ma kuyaꞋan kadanshi ka̱ta̱ m ɓarangu,

adama a na a pana?

Adama a na atsuvu e le a kpanduku ta̱,

a tsu pana ba,

kadanshi ka Vuzavaguɗu ko okpo ta̱ ili yi ishikushi we le,

ka buwa le ili i mali kpamu ba.

11 Adama a nannai, mi ta̱ tukpa n wupa u Vuzavaguɗu,

moꞋuta̱ n kuka̱na̱ uɗa.

<<Tsuwa̱n ta̱ u ɗa a̱ muku n na mi a uye,

n ubuta̱ u koɓolo ka a̱ɗa̱nga̱ni feu.

I ta̱ e kureme ali n amaci,

aza gba̱ra̱gba̱ra̱ nu nkoshi ra̱ka̱.

12 I ta̱ e kuneke aza a yoku i uwa i le,

n ashina le koɓolo n amaci e le,

adama nampa mi ta̱ a kuba̱rukpa̱ ekiye a̱va̱,

n yaꞋin tsurala n aza a ida̱shi i likuci,>>

mpa Vuzavaguɗu mpa ɗa n dansai.

13 <<Ili i na i gita̱i a vuza kenu, ali a kubana a vuzagbayin,

yaba dem wi ta̱ a mali ma kalya,

i na i gita̱i a eneki ali kubana u anan ganu,

yaba dem kayaꞋin ka uwa kaꞋa.

14 O potsotongu ta̱ untsu a uma a̱va̱ gaɗi-gaɗi,

ka̱ta̱ a ka̱na̱ kudana,<Ma̱ta̱na̱, ma̱ta̱na̱,>

kpamu babu ma̱ta̱na̱.

15 A yaꞋan ta̱ ili i wono, ɗa kpamu a yaꞋin ili yi unata.

A̱ a̱, a pana wono ba, ko kenu.

ele e yeve uteku tsu na a̱ ku za̱lika̱ aci ba.

Adama nannai i ta̱ a kuyikpa̱ a ka̱tsuma̱ ka aza a na a̱ yikpa̱i,

a makyan mana baci n takacikai le i ta̱ kuyaꞋan uvakangi,>>

mpa Vuzavaguɗu mpa ɗa n dansai.

16 Vuzavaguɗu u dana ta̱,

<<Shamgbai a nsanji ma uye i la̱na̱,

ka̱ta̱ ye ece uye u kuku,

ubuta̱ u na uye usingai wi, ka̱ta̱ i tono uɗa,

adama a na i ciya̱ wuvuki a̱ɗu a̱ɗa̱.

Ama ɗa a danai <A̱tsu ci o kutono u ɗa ba.>

17 Ɗa n zuwakai ɗa̱ aza kindi, ɗa n danai le,

<zuwai atsuvu, i pana ciliki tsu vi vishiyaun.>

Ama ɗa a danai, <A̱ tsu ci a kuzuwa atsuvu tsu pana ba.>

18 Adama a nannai panai, a̱ɗa̱ uduniya,

ka̱ta̱ a̱ɗa̱ uma i yeve i na ya kuta̱wa̱ ya kuciya̱ a̱ɗa̱.

19 Panai, a̱ɗa̱ aduniyan, la̱na̱i, mpa mi ta̱ a kutuka̱ n uma a nampa n atakaci,

adama a katsupu ka ili gbani-gbani i na a yaꞋin,

adama a na a iwan ta̱ kupana kadanshi ka̱va̱.

kpamu ɗa a iwain ku tono wila̱ uva̱.

20 Teɗai ugaꞋin wi ili ma̱gula̱ni i na yi uta̱i a̱ likuci i Sheba,

ko kpamu nkungu ma uyoꞋo a̱ likuci i daꞋin?

KuneꞋe ku kusongu ku ɗa̱ mi a kisa ba,

alyuka a̱ɗa̱ kpamu n ciga ba.

21 Adama nannai, Vuzavaguɗu u dana ta̱

<La̱na̱, mpa n kuzuwa ka ta̱ uma a nampa,

ili ma̱ta̱ɗa̱ i na ya kuzuwa le a̱ yikpa̱,

kesheku n maku ma̱ ni,

toku n ka̱ja̱Ꞌa̱ ka̱ ni i ta̱ a ku kuwa̱ koɓolo.> >>

22 Vuzavaguɗu u dana ta̱,<<La̱na̱, uduniyan u yoku u ɗa lo a̱ kuta̱wa̱ a iɗika yi uɓon u gaɗi,

uduniyan u gbayin u yoku u ɗa u ɗa̱nga̱i a uteku wa aduniyan adama a kuvon.

23 A ɗika ta̱ utan koɓolo nsara,

uma agbanigbani aɗa i n asuvayali ba,

yura̱ i le yi ta̱ adanshi yura̱ i mala i ɗa,

i ta̱ gaɗi vo odoku,

ufoɓushi an aza a na o foɓushi kuvon,

adama a̱ nu avu Sihiyona.>>

24 Tsu pana ta̱ arabali e le,

ɗa ikyamba i tsu i kuwa̱i,

atakaci a ka̱na̱ tsu ta̱,

n mɓa̱la̱ tsu vuka va̱ a̱ga̱nda̱.

25 Ka̱ta̱ tsu uta̱ a kubana ashina ba,

ka̱ta̱ tsu wala uye wa nwalu ba,

adama a na vurala va vita̱ n kotokobi,

wovon kpamu u ka̱na̱ ta̱ ubuta̱ dem.

26 A̱ɗa̱ uma a̱va̱, ukai aminya a kpalu,

ka̱ta̱ i puɗa̱la̱ ka̱ci ka̱ɗa̱ n kokomo,

shika̱i wuya wuya tsu na a tsu shika̱ adama a maku mete,

na̱mgbi ka̱tsuma̱ ka̱u,

adama a na babu uyevi ɗa vuza munuka,

u kuta̱wa̱ ɗa̱.

27 <<Avu Irimiya n bonoko wu ta̱ vuza vu na u kukondo uma a̱va̱,

adama a na vu yeve usuɓi u uma a̱va̱.

28 Ele ra̱ka̱ aza ugbamukaci aɗa,

a̱ kuka̱ra̱sa̱ n a dansai kavama,

i ta̱ n utsura an vuyum vishili n vu lima̱.

dem vu le uma a kavama aɗa.

29 A̱ fa̱la̱i akina ka̱u,

adama na utuka̱ dalma,

na lo dem atakaci a gbani aɗa,

adama a na utuka̱ aza agbanigbani a̱ ka̱tsuma̱ ka uma a̱ va̱ ba.

30 E ci ɗeke le ta̱ azurufa agbanigbani,

adama a na mpa Vuzavaguɗu iwan le ta̱.>>