1 Adama aza Mowabu.

Ili i na Vuzavaguɗu malaꞋimili, Ka̱shile ka aza Isaraila kadanai i ɗa na.

atakaci adama Nebu, adama ana u na̱mgba̱ ta̱.

e neke ta̱ Kiriyatayim wono, adama na a lyaꞋi a le ta̱ n kuvon,

e neke ta̱ katsura ke le wono, o ɓosoi ka a,

2 Tsugbayin tsa aza Mowabu tsu ba.

Ɗe a Heshibon ta ɗe o foɓusoko ni kagbanigbani.

<Ta̱wa̱i tsu bana tsu la̱nga̱sa̱ ni adama na wokpo uduniya ba.

Ka̱ta̱ a vu Madumana vu paɗa bini,

kotokobi ki ta̱ a ku saɓa wu.

3 <<Ka̱la̱ka̱tsu a ma lapa mu una̱ a Haroniya, a kudana,

<Atakaci, n atakaci a gbangam.>

4 A̱ la̱nga̱sa̱ ta̱ Mowabu,

muku n wawaꞋa n ka̱na̱ ta̱ ma̱shi.

5 Adama a na a kumba ku Luhita

i ta̱ a ku kumba m ma̱shi,

adama a na a ka̱gida̱la̱u ka Horoniya

i ta̱ a kupana atakaci a̱ ma̱shi a kula̱nga̱su.

6 Sumai, adama a wuma u ɗa̱.

sumai an majaki ma kakamba.

7 <<Adama a na i keɗe ta̱ a̱pa̱ a̱ɗa̱ ubuta̱ wu utsura u ɗa̱ n udukuyan u ɗa̱,

a̱ɗa̱ feu i ta̱ a ku pura̱ ɗa̱,

Ka̱ta̱ Kemoshi u bana ugbashi,

koɓolo ni ganu i ni n aza a gbagbaꞋin a̱ ni.

8 Vuza munuka va, wita̱ a ku uwa iɗika kakawu,

babu iɗika i na i ku laꞋaka.

aginda i ta̱ a ku na̱mgba̱,

ka̱ta̱ a̱ra̱Ꞌa̱ a yaꞋan ufa̱di,

tsu na Vuzavaguɗu u dansai.

9 <<Neke aza Mowabu evelyu,

adama ana wita̱ a̱ ku imkpa u suma,

ka̱ta̱ likuci i ni yokpo agali,

tsuna babu ili wuma punu.

10 <<Una̱wiya u ɗa u vuza na wi a kuyaꞋan ulinga u Vuzavaguɗu n ucigi wi ikyamba,

kpamu una̱wiya u ɗa a̱yi na u sa̱nka̱i kotokobi ka̱ni mpasa m munuka.

11 <<Ali ɗe a wuti wu ugiti, Mowabu wi ta̱ ida̱shi i ma̱ta̱na̱,

n ka̱ɗu ka̱ni ida̱shi,

a̱ ɗa̱skpa̱ edele a̱ ni lekeɗi ba,

a saꞋawa ku bankai tsugbashi ba,

adama a nannai ugain u ni u buwa ta̱ koɓolo n na̱yi,

kpamu ma̱gula̱ni ma̱ni ma asa ba.

12 <<Adama nannai, la̱na̱, kanna kita̱ lo a kuta̱wa̱ Vuzavaguɗu u danai, ana n ku suꞋuki n aza a ku va̱ma̱ a na a ku va̱ma̱i, ka̱ta̱ a̱ ɗa̱skpa̱ edele a̱ ni lekeɗi ka̱ta̱ o ɓoso edele a̱ ni mirimiri. 13 Ka̱ta̱ aza Mowabu u pana wono wa aza Kemoshi, u teku tsu na Betelu kpaꞋa ka aza Isaraila ku panai, ele na a zuwai a̱pa̱ ele we ele.

14 <<Yiɗa̱i i zuwai ɗa vu danai, a̱ tsu ali a ɗa,

kpamu aza u utsura u kuvon>?

15 Vuza munuka vu Mowabu n likuci i ni u yawa ta̱,

kpamu a̱ɗenga̱ni uzagbi, a bana ta̱ adama a makiɗaka,

Vuzavaguɗu mogono, a̱yi na a ci ɗeke kula ku ni Vuzavaguɗu malaꞋimili a̱yi ɗa u dansai.

16 Kawuya ka aza Mowabu ka yawa ta̱ ɗevu,

ukpa̱ u ni kpamu u dakaka ta̱ ilaɗi.

17 YaꞋin kpalu adama a̱ ni, a̱ɗa̱ na yi ɗevu n a̱yi,

n a̱ɗa̱ ra̱ka̱ na i yevei kula ku ni,

danai ni, <Uteku tsu na kalangu ku utsura ko koɗoi,

Kalangu ka tsugbayin?>

18 Cipa̱ a gaɗi vu ida̱shi i tsugbayin tsu nu,

ka̱ta̱ vu da̱sa̱ngu o kubuta̱ ki iɗika,

a̱ɗa̱ kumaci ka aza Dibon,

Adama a na vuza munuka vu Mowabu u ta̱wa̱ ta̱ adama e le,

u la̱nga̱sa̱ ɗe katsura ka̱ ɗa̱.

19 Shamgbai uye ka̱ta̱ yinda,

a̱ɗa̱ kumaci ka aza Arowa.

ecei, aza a na a lakai ɗa a sumai,

ecei le, <I na i gita̱i?>

20 E neke ta̱ Mowabu wono, adama a na u koɗo ta̱,

ɗengusa̱i a̱la̱ka̱tsu ka̱ta̱ i shika̱ adama a̱ ni.

Danai aza a Aruno,

an unai Mowabu.

21 <<Afada a̱ ka̱na̱ ta̱ likuci i na yi a i ɗika e keteshe, wa ta Holon n Jahaza koɓolo m Mefatu, 22 n Dibon n Nebo koɓolo n Beth-dibalathaim, 23 n Kiriyatu n Betu-gamulu m Betu-meyo, 24 n Keriyotu m Bozura koɓolo n likuci yi iɗika i Mowabu ra̱ka̱, i na yi daꞋin ni i ɗevu. 25 Kavana ka Mowabu ko koɗo ta̱, kpamu kavangatsu ka ni ko koɗo ta̱, i na Vuzavaguɗu u dansai.

26 <<Zuwai ni u soꞋo ma̱ra̱ ma maka yi, adama a na u shamgba ta̱ tsura n Vuzavaguɗu, adama na Mowabu u da̱sa̱ a shama a̱ ni, ka̱ta̱ uma o zoꞋoso yi. 27 Ashe aza Isaraila okpo wu ili yi zoꞋoshi ba? An aza a̱ ka̱na̱i koɓolo n oboki, ɗa wa kokpo wu a ayin a na baci de dem vu yaꞋin kadanshi ke le ka̱ta̱ vu gba̱ɗa̱ kaci ka̱ nu adama a̱ra̱ɗi?

28 <<Ɗa̱skpa̱i likuci, ka̱ta̱ i bono i da̱sa̱ngu atali,

a̱ɗa̱ kumaci ka a zana a Mowabu.

okpoi uteku tsu moɗoi n na mi okowo a tsukinda,

a ka̱kina̱ ka kungu.

29 Tsu pana ta̱ ukuna wa a̱ra̱ɗi wa aza Mowabu,

wi ta̱ n a̱ra̱ɗi kau

n pana ta̱ kpamu ukuna wu ugbamukaci u ni, n a̱ra̱ɗi a̱ ni, n ukuna u kugoyi u ni,

n ukuna wu usuɗukpi u ka̱ɗu ka̱ ni.

30 Mpa Vuzavaguɗu n yeve ta̱ ugbamukaci wa aza Mowabu,

a̱ra̱ɗi a̱ ni ukuna u gbani u ɗa, ulinga u ni kpamu feu ukuna u gbani u ɗa.

31 Adama a nannai mi ta̱ a ku lapa una̱ adama a Mowabu,

mita̱ a̱ kushika̱ adama a Mowabu ra̱ka̱,

adama aza Kiri-haresetu a ɗa n na̱mgbi ka̱tsuma̱.

32 Mi ta̱ a̱ kushiꞋika̱ ɗa̱ u laꞋa ma̱shi ma aza Jaza,

avu vi ta̱ tsu maɗanga mi itacishi ma Sibima.

Acaka a̱ nu a kungba ta̱ ali a pasa ta̱ malaꞋa,

u yawa ta̱ malaꞋa ma Jaza,

ama ɗa vuza munuka u kumbai,

umaci wu nɗanga u lyushi u ɗa̱.

33 UyoꞋo n ma̱za̱nga̱ u kotso ta̱

a iɗika ya aza a usuɓi i Mowabu,

n sa̱nka̱ ta̱ kupisha ma̱kya̱n an nɗanga n kupisha ma̱kya̱n,

babu vuza na u doku u dengei le m ma̱za̱nga̱,

kacaꞋa ka kacaꞋa ka̱ ma̱za̱nga̱ ka ba.

34 <<I na i ɗikai ya aza Heshibon a li a kubana a aza Elila, sapu na u banai dangi n Jahazu uma a kupana a̱la̱ka̱tsu a̱ ma̱shi e le, n i na i ɗikai Zowa a kubana Horoniya n Egalatu-shelishiya. Adama a na kuɗolu ku Nimiri feu ku ɗekpe ta̱. 35 Ka̱ta̱ n zuwaka aza Mowabu uteku u na o kudoku e neke a̱ma̱li e le alyuka o kusongu a̱ isa̱ e le ba, mpa Vuzavaguɗu mpa ɗa n dansai. 36 <<Adama nannai ka̱ɗu ka̱va̱ kita̱ a̱ ma̱shi adama a Mowabu an vushari, ka̱ɗu ka̱va̱ kpamu kita̱ a̱ ma̱shi adama aza Kiri-haresetu. Adama na uciyi u le u na a̱ ciya̱i u kotso ta̱.

37 <<Adama a na kaci dem o gbonduwo ɗe, ntsa̱ka̱ feu a puna ɗe. A ɗana sa ta̱ ekiye e le ra̱ka̱, ɗa kpamu a ukai ntogu n kpalu. 38 A i uwa ya aza Mowabu ra̱ka̱ n ubuta̱ wi ida̱shi babu i na va ke ene sai ma̱shi, adama a na n ɓoso ta̱ Mowabu an ma̱diki ma a na uma odoku a cikalai ba, mpa Vuzavaguɗu mpa ɗa n dansai. 39 Tsu na u ɓosoi. N tsu na a lapai una̱. N tsu na Mowabu u kpatalai kucina̱ ku ni adama o wono. Ɗa Mowabu wokpoi ili yi izoshi n ili i wovon wa aza a na i u ka̱ra̱Ꞌi n a̱yi ra̱ka̱.>>

40 Adama a na Vuzavaguɗu u dana ta̱,

<<La̱na̱, vuza yoku wi ta̱ a ku imkpa n ilaɗi ka̱u an mashangi,

ka̱ta̱ u u bapa evelyu a̱ ni adam aza Mowabu,

41 I ta̱ a kulyaꞋa likuci ya

ka̱ta̱ isa ubuta̱ u katsura ke le.

a̱ɗu ovonshi aza Mowabu a kanna ka nanlo

i ta̱ o kokpo an ka̱ɗu ka vuka va a̱ga̱nda̱ a limata.

42 I ta̱ a ku una Mowabu, ka̱ta̱ wokpo babu vuza,

adama a na u goyo ta̱ Vuzavaguɗu.

43 Wovon n kpenle n maza

mita̱ a̱ kelime ka̱ nu, oꞋwo a̱ɗa̱ aza Mowabu.

mpa vuzavaguɗu mpa ɗa n danai.

44 A̱yi na u sumai adama wovon

wi ta̱ a̱ kuyikpa̱ e kpenle,

ka̱ta̱ a̱yi na u kumbai a̱ ku uta̱ e kpenle ka,

waza a maza.

adama a na mi ta̱ a̱ ku utuka̱ ni ili i na mpa wa aza Mowabu,

a̱ ka̱ya̱ ka atakaci ke ele,

Vuzavaguɗu ɗa u dansai.

45 <<A suvu a̱ kulu ku Heshibon

aza a na a lakai, i ta̱ a kushamgba babu u tsura,

adama a na akina a̱ ka̱na̱ ta̱ Heshibon,

nlentsu ma akina mu uta̱ ta̱ a kpaꞋa ku Sihon,

ɗa ku songi kuca̱n ku Mowabu,

oroliko a̱ muku n tumulutu.

46 Ili ya atakaci i ɗa wa̱ a̱ɗa̱ aza Mowabu.

aza Kemoshi a̱ na̱mgba̱ ta̱,

adama a na a̱ pura̱ ta̱ muku n ɗa̱ a banka tsu gbashi

n nkere ɗa̱ feu a kubanka tsugbashi.

47 Dem n nannai mi ta̱ o kubonosoko n uciyi u Mowabu

a ayin e kelime, Vuzavaguɗu ɗa u dansai,>>

na va ɗaɗa afada a Mowabu.