1 Malya Yasuuꞌa been oomhiin hooy giigiya. Urduni gidehiiwwa Yahuudaay whaashwa hadiit idif. Masi barooh gwida dehay dehaay eeyaan. Yasuuꞌa suureetooh tꞌa han oodehay agriisiya.

2 Fariisi gwadi Yasuuꞌii dehaay eeyaaniit barooh jarrabiyaana, "Tak takatooh fandiigeet tuuna halaalu?" idiin.

3 Yasuuꞌa "Muusa naan waseeya hookna?" idi.

4 Baraah "Muusa ‘Tak takatooh fandiigeek, fadageet waragt dehaay kantiib.’ idi." idiin.

5 Yasuuꞌa "Bareekna iginꞌaayaakna akraaba akay Muusa toon tuwasi dehookna iktib. 6 Laakiin Ukwaasana tuduniya akhligiyaneekka kwaabwa rabaabwa ikwaasiit akhligiya. 7 Toon toonaati sabbii, uutak ifarooyeeh ishtiit takat indꞌiir, 8 aree uutakwa tutakatwa gaal bashar ikatiin. Maloob kiiꞌakeena, gaal bashar ikatiin. 9 Shaawti Ukwaasana simarriyaab ikatiyeet toona Wꞌaadami kiisiisag." idi.

10 Oogaw shuumyaanihoob, ikwiriyaatay beet tuuna naan tiiktiyeeb Yasuuꞌaab raatiyaan. 11 Baruuh "Tak takatooh fidigtiit, weenaati dꞌar jikuun ikati. 12 Aree fiduugiit takooh fidagtiit weer safamtiniyeek, batuuh jikuun shagaamta." idi.

13 Dehay gali Yasuuꞌa yꞌayeeh kehii daasiit isidehirni jillaay dabalooya ar bariiyooh dehaay haay eeyaan. Laakiin ikwiriyaatay bareeh idaaninna. 14 Yasuuꞌa een rhiyanihoob yhasi, "Yꞌar aneeb beeti hassaana, baaꞌafiina! Uudehay een yꞌar tꞌiiteeb Ukwaasanaayt tehadꞌaayeeti kina ikatiin. 15 Oosdik andi hookna, Ukwaasanaayt tehadꞌaayi unisrikiit agbili bitdiineek, door han shuumi kitdiina." idi. 16 Yasuuꞌa inisrikaayeeb yhalab, yꞌayeeh kehii daasiyaayt bareeh idehar.

17 Yasuuꞌa usalal abkee, tak dehaay dhaabiya, bariiyooh suurii ignafaayt, "Seedna udaayi! Naan sakaniyeek umidhhan udaayim amarri?" idi.

18 Yasuuꞌa igwibi, "Udaayi naanhooy tindiyaheeb? Ukwaasana oongaal nuun daayi kiihaay. 19 Baruuk tiwasi tikteena: ‘Baadira, baajikina, baagwihara, gwisreet badeha baabideha, baatilisa, baabookwa deetookwa hamooysa!’ iyadna." idi.

20 Uutak "Seedna, teen tiwasi kasteeh ani dabalu oor iiktiyi door haay shagaami." idi.

21 Yasuuꞌa ootak ishbib aree barooh dꞌam hooy imri. Malya "Gaana masi hook nakwistu, tibariyeena kastooh daalbaat, malyaab imhallaga oodehay yhamraab hiiyya! Baruuk tibreeteeb miraay imaar tindiya. Malya mꞌaa, ramaheeb!" idi.

22 Uutak een ibhali imaasiwihoob, winneet gaba takuuyt, akraab gadabaa giigiya.

23 Yasuuꞌa nakamiyaayt ikwiriyaatayeeh dehaay, "Oodehay igabaab Ukwaasanaayt tehadꞌaayeeti shuumti dehaay akraabi." idi.

24 Ikwiriyaatay een ibhaliyeeb ajjabamiyaan. Laakiin Yasuuꞌa masi, "Yꞌaraanay! Oomraay aamaneen oodehay, Ukwaasanaayt tehadꞌaayeeti shuumti kak dehaay akraabu! 25 Gaba tak Ukwaasanaayt tehadꞌaayeeti shuumtiika, kaam kansuubeetiit tilꞌiitii whassiti laamakaabi." idi.

26 Baraah masi ajjabamiyaana, aree baraah taktakee dehaay, "Aflaay aaw adgiriit iidhhan indi?" idiin.

27 Yasuuꞌa masi bareeh ishbibaayt, "Naat gat Ukwaasana baakaay uudehay biiꞌadgirayneet eefeena, laakiin Ukwaasanaay dehaay naatka laamaati." idi.

28 Bitrus bariiyooh dehaay, "Hinin barook neetriimi jillaay naatka ningad nidꞌi!" idi.

29 Yasuuꞌa igwibi, "Oosdik andi hookna, usakana udaayiinaay jillaaywa anii jillaaywa, ugawooh tari isanaayeeh tari tikwaateeh tari ifarooyeeh tari yꞌareeh tari dirꞌaatooh inꞌiish gaal, 30 oon udamaaniib sheeb doora gwidakaana rayiimi indi. Gawaabwa, sanaabwa, kwaatwa, arwa deetwa, dirꞌaatwa imaar indi. Door han amaag itweeri. Laakiin tꞌaakharaatiib umidhhan udaayim imaar indi. 31 Laakiin oontꞌa suurii eefeen uudehay gwida, wꞌagiyaay daayi iyadna, uudehay oontꞌa wꞌagiyaay eefeen aree suurii daayi iyadna." idi.

32 Baraah Algudus iibiin. Yasuuꞌa dabaama iifi. Ikwiriyaatay winneet isgaribna, bareeh iitram uudehay han irkwiin. Malya Yasuuꞌa ikwiriyaatay itamna malu eebhat iyhaayt barooh naan dehaay iikti tindiyeeb sooya. 33 Yasuuꞌa "Oontꞌa Algudus beeti giignay. Wꞌaadami Oor ifagiiriya isuurkinaawwa, whaggi koojaawwa sallamami indi. Barooh yat haakamiit oodehay igirbaab nuunsi iyadna. 34 Haay kashi iyadna, malyaab amaag waraayiit, kehii tatfi iyadna. Barooh thaabꞌiit iidir iyadna. Laakiin mhayt yinaati harꞌii, tooyatii yaki indi." idi.

35 Yaaguubwa Yuuhannaawwa Sabadiib yꞌar Yasuuꞌii dehaay eeyaaniit, "Seednaay! Hook nhariweenaaka dehoon tankwiikweet toona nisehariiw." idiin.

36 Yasuuꞌa "Naan dehookna atankwiikweet toona tehariwna?" idi.

37 Baraah "Umatuuniyook door, hinin gaal maygwadiyook ooraaw tarhagwadiyook soosꞌa hoon!" idiin.

38 Yasuuꞌa bareeyooh dehaay, "Baraak toona turaatteeneet kitkanna. Ani gwꞌaniyeeb ookaas gwꞌiteena? Tari ani atoomsaab akatiyeet tꞌatoomsooy atoomsaabaana?" idi.

39 Baraah "Awooh adgirnay!" idiin.

Yasuuꞌa bareeyooh dehaay, "Baraak ani gwꞌaniyeeb ookaas gwꞌiteena, ani atoomsaab akatiyeet tꞌatoomsooy titoomiisna, 40 laakiin oodar umaygwadiinaay tari oodar utarhagwadiinaay dehaay isoosꞌi aneeb kaaki. Baliin imhiinan Ukwaasana oodehay iwaasaab ikatiyeenaayee dehaay soomraabi." idi.

41 Ikwiriyaatay itamin aaraw een ibhali imaasiwnihoob, Yuuhannaawwa Yaaguubi geebwa winneet yhaseen. 42 Yasuuꞌa bareeh waliikiyaayt, "Baliin Ijintiili haakma ikatiin bareeyooh kehii ankwanaameen. Isuurkinaayaahna iwawin aree bareeyooh kehii hadꞌaameen. 43 Laakiin baraakna bak kitteena. Bareesookna umatuun harriiwka ibakii shagaamanaayookna ikati. 44 Eesuur harriiwka ibakii kasseeyooh kishiya ikati. 45 Wꞌaadami Oor han uudehay bariiyooh dehaay shagaameeni jillaay yꞌaab kiiki. Laakiin baruuh oodehay shagaamiiniyee dehaaywa bareeyooh jillaay ishuukeeh nuuniiniyee dehaaywa yꞌaabi." idi.

46 Malya baraah Ariihaab iktimna. Yasuuꞌaawwa ikwiriyaataywa, gwida dehaywa tumadiinaatii firꞌee, tak hamashay Bartiimaaꞌiyoos (Timaaꞌiyoosi oor) iidneeb, nꞌaliigaab usalaliib oodehay iinꞌal iifi. 47 Yasuuꞌa Unaasiraayi yꞌaabi diyee imaasiwihoob, tageega hissii waliikiya, "Yasuuꞌa, Daawidi oor, arhamaaheeb!" idi.

48 Gwida dehay barooh idaaninna aree, "Tim akaa!" idiin. Laakiin baruuh winneet masi waliikiya, "Daawidi oor, arhamaaheeb!" idi.

49 Yasuuꞌa ingadaayt, "Ootak waliikaana!" idi.

Aflaay baraah ootak whamashay waliikiyaana, "Abshir, yakaa! Baruuh waliikiini hook." idiin. 50 Uutak whalakooh igidaayt fafaree Yasuuꞌii dehaay eeya.

51 Yasuuꞌa barooh raatiya, "Naan harriiwa? Naan dehook atankwiikw?" idi.

Uutak whamashay, "Seednaay! Ani rhitiib aharriiw." idi.

52 Yasuuꞌa ootakii dehaay, "Aflaay giigaa! Wꞌiimaanuuk mheeliya hook." idi.

Ootak willa aagwꞌad rhiyaana, aree usalaliib Yasuuꞌaab iram.