1 Yasuuꞌa oodehay een eemtaal dehaay hadiidiya: "Tak inab yꞌadiit kirraab hooy ikrir, whaayt assaaraatii dehaay deeb ifrik aree gwꞌaadiigaayeet siraayi idꞌir. Malya tudirꞌa wari dirꞌaateegaayee dehaay ikiriit yꞌish iibaabiya. 2 Uwaaki door eeyanihoob, tumꞌadaytii wꞌadhdhooh imiiri jillaay kishiyaab gaal bareeh beeti diigwatiya. 3 Laakiin baraah ukishiya ithabꞌana aree naat anu fidnaab giigisiyaan. 4 Malya tudirꞌaati kina masi weer kishiya bareeyooh dehaay diigwatiya. Oon han laakiin babhooyaana, aree winneet amaag neewiyaan. 5 Tudirꞌaati kina tꞌa han masi kishiyaab mhayaab dehaay diigwatiya, aree been barooh idirna. Baruuh warib gwidaab diigwatiya. Een han galib ithabꞌana, eeraw idaarna.

6 Shaawti gaal nafar uubhaat dehaay imhi. Baruuh aree wꞌoorooh wꞌareeyeebu, malyaab barooh bareeyooh dehaay ifdig, ‘Barooh hamooysi iyadna.’ idi.

7 Laakiin idirꞌaateega barooh rhiyaanihoob, gal irawee dehaay, ‘Uun baruuh kwasaamanaabi. Tudirꞌa hoon kinaami indi, oon barooh han niidirka tudirꞌa iknaayaan kwasaamni.’ imsiyoodaayna. 8 Aflaay barooh yꞌabikna, idirniit tudirꞌaatii barraab igidna.

9 Tudirꞌaati kina yꞌiiniyihoob, naan saki indi? Baruuh idirꞌaateega daartiit, wꞌinab warib iyaaw indi. 10 Oon ooktaab agriiyaab kitteena han? Uuktaab:

‘Wꞌawi been idꞌaariiga iribneeb,

toorkwinti awi ikati.

11 Wꞌankwana toon idꞌi. Beet tuuna aree hineeb igwꞌadeeb ajaayibtu!’ indi." idi.

12 Malya ifagiiriya isuurkinaawwa, whaggi koojaawwa, isuurkinaawwa aan aamtaal bareeyooh dehaay attiyoodiyaab iiktiineet toona ikannihoob, barooh haay yꞌibikni salal yhariwna. Laakiin oodehay irkwiin. Malya barooh yꞌishniit giigiyaan.

13 Baraah Yasuuꞌa bhaliyi sꞌabuuk yhiriwna akay Fariisiib gwadibwa, Heeroodisaayiibwa dehaay ifdigna. 14 Baraah eeyaaniit barooh raatiyaana, "Seedna, baruuk oosdik hadiidtiniya. Gaal taki mirkwaay anu han Ukwaasanaay usalal usidkiib allamtiniyeet toona nikteen. Aflaay Gaysar Iroomaani Imbiraatoor titilba dehaay nifarꞌeet tuuna halaal han kiiki? 15 Dehaay nifarꞌa han kinfirꞌa?" idiin.

Laakiin Yasuuꞌa ibhali naan haay isehiriwneeb ikanaayt, "Naanhooy jarrabteenheeb? Oon udiinaar rhisaanaheeb!" idi. 16 Baraah diinaar gaal rhisiyaan. Baruuh bareeh raatiya, "Aan aafiirwa, uusimwa aaya?" idi.

Baraah, "Gaysariiba." idiin.

17 Malya Yasuuꞌa bareeyooh dehaay, "Gaysariit toona, Gaysar hiina! Ukwaasanaayt toona Ukwaasana hiina!" idi.

Baraah ibhaliyi diguuyiib ajjabamiyaan.

18 Sadduuki iidni dehay, yak kiihaay iid, Yasuuꞌii dehaay eeyaaniit raatiyaan. 19 Baraah "Seedna, hinin Muusa dehoon iktib: ‘Tak sanuuh dꞌiraab, ar baabariib iiyaayyihoob, sanuuh weer tutakat kwasaamiini. Usanii dehaay ar hooy farri.’ diyaabi. 20 Suur asarama sana iifiin. Gaal bareesooh takat idꞌir. Baruuh ar baabari iiya. 21 Uusan umalya tootakat idꞌir, uun han firaay anu iiya. Masi uusan umhaya han bak iki. 22 Isana yꞌasarama kassaah hooy imkattaamna. Gaal han firaay ishaab kiiki. Malyaab tutakat han tiya. 23 Uuyak ikatiyihoob, yꞌasarama kassaah batooh idꞌirneek, naayiitooh takat iikti tindi?" idiin.

24 Yasuuꞌa bareeyooh dehaay, "Baraak kwidhiib teefeena, Ukwaasanaay akrir kitkanna, tari baraak eektab kitkanna. 25 Uudehay yꞌaya yakeenihoob, kiidꞌirna tari kiisidꞌirna. Baraah tibreeteeb imalak tꞌiiteeb ikatiin. 26 Aree yꞌayaab shaawti eedhhanneet toona, Muusaay ooktaabiib whindi oodisnaay mitaaleeb Ukwaasana uukna hadiidiya, ‘Ani Ibraahiimiib Ukwaasana, Isehaagiib Ukwaasana, Yaaguubiib Ukwaasana akati.’ diyaabi. 27 Ukwaasana oodehay yꞌayaanaayi Kwaasana kiiki. Laakiin oodehay idhhaniinaayi Kwaasana ikati. Baraakna winneet kwidhiib teefeena." idi.

28 Whaggi koojaayee gaal eeyaayt bareeh bhaliisamee imaasiw. Yasuuꞌaab daayiib gwibiyee rhiya, aree barooh raatiya, "Seednaay! Kasteeh tiwaseeteeb keetaat hooy daayikaatu?" idi.

29 Yasuuꞌa igwibi, "Tiwaseeteeb hooy daayikaat toon tikati: ‘Sinaakira yaa Israaꞌiil! Wꞌankwana Ukwaasanaayuun, Wꞌankwana gaal ikati. 30 Wꞌankwana Ukwaasanaayook kassooh uginꞌiisookwa, kassooh unfiseesookwa, kassooh ugirmaayiisookwa, kassooh utaadiisookwa areeya!’ tindi. 31 Tuwasi tumalya aree, ‘Ushawwook ugarooyiitook areeya!’ tindi. Toon tuwasi toonaatiika daayikaat kitehaay." idi.

32 Masi been whaggi kooja, "Seedna, baruuk daayi bhali tidiya, sidiku Ukwaasana gaalu. Barooh nuun weer kiihaay. 33 Wꞌankwana Ukwaasanaayook kassooh uginꞌiisookwa, kastooh tufhamaatiisookwa, kassooh utaadiisookwa areeya. Masi ushawwook ugarooyiitook areeya. Taan tiwasi kasteeh hinin nifarꞌeet tikaraama tꞌatoolwaatwa umiyaawiiwwa daayiikaata." idi.

34 Malya Yasuuꞌa ootak daayiib hadiidee rhiyanihoob, baruuh bariiyooh dehaay, "Baruuk Ukwaasanaayt tehadꞌaayeetii sagiib kittaa!" idi. Aree beet tooyintii gaal han ashꞌaraa masi weena barooh raataab kiiki.

35 Yasuuꞌa Wꞌankwanaay gawiib allamee, baruuh raatiya, "Whaggi kooja naanhooy Umasiihi Daawidi ooru iyadna? 36 Daawid uukna Eeshuuk Imugaddasaayee hadiidee bak sooya:

‘Wꞌankwana, Wꞌankwanaayu dehaay:

Yꞌashooyeek

iragadaayeek whii akwasiyeeb ookiik

umaygwadu sꞌaa!’ diyaabu.

37 Aflaay Daawid uukna ‘Wꞌankwana’ waliikiiniyeek, kak baruuh oorooh ikati?" idi.

Uudehay igwida barooh winneet afirhaa isnaakirna.

38 Yasuuꞌa allamee, baruuh "Whaggi kooja hooy digwagwna. Baraah gwimad halakaayee hiireereena, aree usuugiib salaamameeneet toona areeyeena. 39 Iyahuudi diini gawaayeeb timiisꞌanii tidaayikaat yhariwna, aree tꞌaduumaateeb hamooysama mhiinan yhariwna. 40 Tꞌibraatfaatki italisna aree igawaayeehna eesliibna. Oodehayi rarhistiib toosileel isgwamiidna. Bak tꞌiiteeb aanda winneet jasaami iyadna." idi.

41 Yasuuꞌa Wꞌankwanaay oogawiib tikaraamaati sanduuki fiireeb isꞌa. Wꞌankwanaay oogawiib, oodehay mhallagaab usanduukiib tuusee rhiya. Gwida gaba dehay gwida mhallaga gidee rhiya. 42 Laakiin takat miskiint ibraatfaatkiit eetaayt, usanduukiib maloot neekala, gaal santiim yꞌiint daasta.

43 Yasuuꞌa ikwiriyaatayeeh waliikiyaayt, "Oosdik andi hookna, tuun tutakat tumiskiin tꞌibraatfaatki kassooh udehayiika gwidaka mhallaga daasta. 44 Aan baraah kassaah imhallagaayeetooh shawaay ifirꞌana. Tuun laakiin tutiibriyi kastooh tifirꞌa." idi.