1 Baruuh Wꞌankwanaay ugawii firꞌee, ikwiriyaatayeesooh gaal bariiyooh dehaay, "Seedna shibiba! Aan yꞌawi kak daawriiba! Igawa kak daawriiba!" idi.

2 Yasuuꞌa "Een igawa iwawin kasseeh rhiteena? Awi gaal han ooraawi kehii ituuꞌish kiidi, kassaah dhibi iyadna." idi.

3 Yasuuꞌa Oorba Saytuuni mooyiib Wꞌankwanaay ugawi fiireeb iistꞌa. Bitruswa, Yaaguubwa, Yuuhannaawwa, Andaraawooswa barooh oodꞌooh sakanaayaan. 4 Baraah "Baliit taana naadoor iikti iyadna, sooyaa hoon? Baliit taana kastaah idawilnihoob aree naat alaama iikti iyadna?" idiin.

5 Yasuuꞌa bareeyooh dehaay, "Daayiib shibibna! Gaal han biitaliis hookna! 6 Gwida aniib oosmii yꞌeen. Baraah ‘Ani barooh akati’ iyadna. Gwida dehay italisna. 7 Finaabwa, finaay habarwa teemsiiwnihoob, baarakwiina. Baliit taana ibakii door gaal ikatiin. Laakiin tꞌaakhari masi eetni. 8 Haashka haash weer imuuthꞌa indi, whadꞌaaka whadꞌa ooraaw iithꞌa indi. Hargwiitwa, buutiit mibꞌeestwa iikti iyadna. Taan taana kastaah oofraayiit tilhanayti hankaay badooyeen ikatiin.

9 Digwagwna! Uudehay aabiktiit hookna, tumhakama sallameen hookna. Iyahuudi diini gawaayeeb jasaayeen hookna. Ani sabbii aree yhaakmaawwa yhadꞌaayi suuriiwwa tingadiina. Usakana Udaayiib raatamamteena. 10 Laakiin tꞌaakhari baaꞌakaay, awwal usakana udaayi ibakii kasseeh idehayaayee dehaay soomamiini. 11 Baraakna abaktiit tumhakama beeti galeelamteenihoob, naan tiyadneeb whankaay baahasiikna! Bareekna kitteena laakiin Aashuuk Imugaddasa hadiideen. Been oodoor toona tusoomamteeneet toobhaat diina!

12 San oosan tiltiit isuudir indi, ubaaba yꞌareeh isuudir indi, yꞌar ifarooyeeh imgwishish iyadna aree isuudir iyadna. 13 Anii sabbii uudehay kassuuh iirib hookna indi. Laakiin wꞌagiya ookiik wꞌiimaanooh kaleewiiniib iidhhan indi.

14 Yint gaat baaꞌastehalay mhiin shingiraana rhiteenihoob, (Toon batooh agriyeen baliin ibakii beet toona afhamaana), Yahuudaay daateeneek eerba beeti dhaabaana! 15 Beet tooyin ugawi kehii eefeeb ugawiib tikwiit, naat han kayakisiya. 16 Tidirꞌaateeb daateeneek, yhalakaayeekna miyaayii dehaay baaꞌagarna. 17 Baliin eembꞌi tinakwalayaawwa, yꞌareet dꞌooranaawwa idhikwna. 18 Beet tuuna oowiyaay door bitꞌakaayi jillaay siileelaana! 19 Ukwaasana toobuur idꞌiyeekka oontꞌa ookiik, een igwirhaayeeka amagkaab daayaab kiikeen. Masi han daayi kiidiin. 20 Baliit teeyina Wꞌankwana shalikt kwaasaab biikaayeek, gaal tak han kiidhhan. Laakiin Wꞌankwana oodehay iwaasaab iiktiyi jillaay, teen teeyina nakasht ikwasi. 21 Beenhoob gaal han, ‘Umasiihi tooy eefi!’ indiyuukna, tari ‘Umasiihi beentooy eefi!’ indiyuukna, baaꞌaamanaana! 22 Gwisri masiihiiwwa, gwisri nabiyaawwa laween. Gwisreet alaamaatwa mꞌuujisaatwa iikwasi iyadna. Kaꞌadgiriyaan nuun Wꞌankwana waasaab ikatiyeeb italisneet toona jarrabeen. 23 Aflaay digwagwna. Ani baliit teena kasteeh whankaay sooyan hookna.

24 Baliit teeyina, baliin igwirhaayi harꞌii,

tuuyin thibnami tindi,

aree tuutrig unuurooh buubsi kitdi.

25 Yhayikw tibreetee dhadhibi iyadna. Tibreeteeb eefeent taana digami iyadna.

26 Been oodoor uudehay Wꞌaadami Oor bꞌaluukiib winneet akrireewwa matuuniiwwa yꞌee rhi iyadna. 27 Aree baruuh imalakeeh fadhigtee teejha hadiit iifdig indi, udehayooh iwaasamaab tubuuti agiyaay tibreeteeti agiya hadiit iidbil iyadna." idi.

28 Yasuuꞌa "Utiini hindii een eemtaal kanna: Aalꞌid yidhꞌatiit taarat itfarꞌanihoob, tehibi tidwileet toona tikteenna. 29 Baraakna han taan taana akee rhiteenihoob, uudoor dawilu, udheefa katim ikatiyeet toona kanna! 30 Oosdik andi hookna: Uun uutaas taan taana kastaah ikatiineeb hadiit iiyyi kiidiin. 31 Tuubuutwa, taabreewwa iyaayiin. Laakiin aniib ibhali door han iiyyi kiidiin." idi.

32 Yasuuꞌa "Been oombꞌi tari beet toosꞌa gaal han kiikan. Imalak kiikanna, Wꞌoor kiikan, been oombꞌi Ubaaba uubhaat ikteen. 33 Aflaay digwagwna. Uudoor nhoob iikti indiyeeb kitkanna akay, whawaad seharna. 34 Beet tuuna ootak ugawooh ikishiyaayeeh ammaniyaayt iibaabiyaab tꞌiiteeti. Ikishiya gaalka naat isꞌabik, aree gaal idheefa isigwꞌad, ‘Whawaad dehaay sehara.’ idiit waseeya.

35 Shaawti baraakna han seharana! Ugawi kina naadoor itꞌagiireeb kitkanna. Baruuh whawaad yꞌiiniyeeb, whawaadi tarabeeb yꞌiiniyeeb, karuumaab yꞌiiniyeeb, aawiit yꞌiiniyeeb kitkanna. 36 Baruuh gaalhoob yꞌiiniyeek, diwee biimari hookna. 37 Een ibhali bareeyookna dehaay andiyeeb, kassooh oodehayii dehaay andi, ‘Gwꞌadna!’ andi." idi.