1 Whasamti Iidwa Ufatiiri Hadhiyi Iidwa, masi malu bꞌi hooy mhiyaa iifiin. Ifagiiriya isuurkinaawwa, whaggi koojaawwa, Yasuuꞌaab tiltiit haay idiirni salal yhiriwna. 2 Baraah "Laakiin Wꞌiidi bꞌi bandꞌiyeet toonaati, toon nidꞌeek uudehay finaayi hoon indi." idiin.

3 Yasuuꞌa Beetaanyaay Siimoon ubhadhiyaayi gawiib mꞌariit tamee, takat winneet alyaat shakwiintiit karoora fiyakee eeta. Tushakwiin nhas naradii shagaamamaati. Batuuh tukaroora tikitꞌa aree tushakwiin Yasuuꞌiib ugirmaay kehii tifif tidꞌi.

4 Beentooy iifiin uudehay yhaseeniit taktakee dehaay, "Tuun tutakat tushakwiin naanhooy tinfiif? 5 Toon tushakwiin mhay shi diinareeb dilbiit miskiinaab tishꞌadhdhiidheet toonaati." idiiniit batooh winneet idaaninna.

6 Yasuuꞌa "Tootakat ishna, naanhooy gallabteena! Batuuh daayiinaayt tiweerheeb. 7 Imiskiina diimaab geebookna eefeena, tehariwni doorka teeshtiimneet toona adgirteena. Laakiin ani diimaab geebookna kadaayan. 8 Batuuh toona tꞌadgirtiniyeet anii dehaay tidꞌi. Shakwiint aniib ubashri kehii tififihoob, umiimashii dehaay whankaay tisoomiirheeb. 9 Oosdik andi hookna: kastooh toon tuduniyaatiib usakana udaayi bhaliimiiniyi mhiinka, beet tutakat saktaneet tuuna hadiidami tindi. Kassaah uudehay batooh shꞌeen." idi.

10 Yahuuda Wꞌiskaaryuuti, Yasuuꞌiib itamna malooyeeb gaalu. Baruuh Yasuuꞌaab kak nuuniyi jillaay Ifagiiriya isuurkina beeti giigiya. 11 Baraah winneet afirhiyaaniit, barooh imhallagaayee naat iyiwnee dehaay waadiyaayaan. Aflaay baruuh Yasuuꞌaab bareeh haay nuuniyeet fursa igwꞌad.

12 Ufatiiri Hadhiyi Iidiit tooyin tꞌawwaliinaatiib, Whasamti Wꞌiidi argin itehariid. Beenhoob Yasuuꞌiib ikwiriyaatay barooh raatiyaana, "Whasamti wꞌiidiit timꞌari naa mhiin dehook nisoomiireet toona hoon harriiwa?" idiin. 13 Aflaay Yasuuꞌa ikwiriyaatayeesooh maloob diigwatiyaayt, "Tumadiina beena! Beentooy tak yami gidir itfayiik timeerna, aree bariiyooh harꞌii sakaana! 14 Baruuh shuumiiniyeeb oogawi kinaay dehaay diina: ‘Seedna raatiini: Whasamti wꞌiidiit mꞌari ikwiriyaatayi geeb hooy tami andiyeet, aniit tushafat naad teefi?’ indi hook. 15 Baruuh ugawi mhakwal wint gurfa farrashamaat aree amaart rhisi hookna indi. Been oomhiin dehoon soomirna!" idi.

16 Ikwiriyaatay imalu tumadiina hadiit idifna, Yasuuꞌa bareeh sooyaab iiktiyeet toonaatiit imriin. Aflaay Whasamti wꞌiidiit mꞌari beentooy isoomirna.

17 Tehimni eetanihoob, Yasuuꞌa itamna malooyi geeb eeya. 18 Baraah tutarabeesaati kehii adehamaa timꞌari tamee, Yasuuꞌa "Oosdik andi hookna, gaal bareesookna hallaay geebu tamiiniib iidlibheeb indi." idi.

19 Baraah winneet gadabiyaaniit gaal gaalnaay Yasuuꞌaab raatiyaana, "Aneeb han?" idiin.

20 Yasuuꞌa igwibi, "Itamna malooyeeb aree gaalu. Hallaay tukoobaatiib hadhiib geebu anmiis. 21 Wꞌaadami Oor bariiyooh kataabt toonaatiit ibakii iiyyi indi. Laakiin idhikw uutak barooh nuuniiniib! Faraay biikaayeek dehaay tehiyis." idi.

22 Baraah tamee, Yasuuꞌa hadhiib yakisiya aree yhamidaayt harꞌii, yhadhi ikitꞌa aree ikwiriyaatayeeh yhii. Malya "Yaksaanaat tamaana, uun baruuh aniib ugaru ikati." idi.

23 Yasuuꞌa kaas iyhaayt Ukwaasana yhamid. Aree bareeh yhii. Oontꞌa baraah kassaah hooy gwꞌiyaan.

24 Malya baruuh "Uun baruuh gwida dehayi jillaay eetfiif aniib oobooy ikati, been aniib uubooy Ukwaasanaay ugalad ugayiib ikati. 25 Oosdik andi hookna: Oon amseenee fidnaab, Ukwaasanaayt tehadꞌaayeetiib gayi ha gwꞌaniyeeb ookiik, shaawti haab gwꞌi kaadi." idi.

26 Baraah shiilaat kafiyaan. Malya ifirꞌaniit Oorba Saytuun ibeen.

27 Yasuuꞌa bareeyooh dehaay, "Baraak kassaak iiribheeb tiyadna. Uuktaab:

‘Ushakwa idaar andi,

aree tꞌanu itbarir iyadna.’ indi.

28 Laakiin ani tuyattii yakaniyi harꞌii, suurookna Jaliil beeti iidif andi." idi.

29 Bitrus hadiidiya, "Aaraw kassaah eeribnuuk han, ani iirib hook kaadi." idi.

30 Yasuuꞌa "Oosdik andi hooka, Bitrus, oon whawaad uujiik malu doora baakuukillaayi, baruuk mhay doora ittiwheeb tindiya." idi.

31 Laakiin Bitrus masi akraab hadiidiya, "Ani gwadook ayaayi nuun ittiw hook kaadi." idi. Aaraw han kassaah Bitrus iideet toonaatiit idiin.

32 Baraah "Gitseemaani" ittiyoodi mhiin ibeena, aree Yasuuꞌa ikwiriyaatayeeh dehaay, "Ani siileelaniyeeb ookiik baraakna tooy sꞌana!" idi. 33 Malya baruuh Bitruswa, Yaaguubwa Yuuhannaawwa geebooh haay giigiya. Beenhoob Yasuuꞌa hasakaaywa gwirhaayeebwa daamtiib badooya. 34 Yasuuꞌa bareeyooh dehaay, "Aniib uunfis tooyat idwil, winneet hasiyaayt itab. Baraak tooy sꞌana aree gwꞌadna!" idi.

35 Malya Yasuuꞌa shalikt masaafa hiireeriyaayt, whaashi kehii dhibiya aree siileeliya. Malya "Baabu, adgiramtiniyeek toon toosꞌa hassaa! 36 Baab, barook naatka dehook lamaatu. Oon ookaas hoosu giigsaa! Laakiin ani aharriiweet toona kitti, baruuk harriiweet batiikti." idi.

37 Malya yꞌagaraayt, ikwiriyaatayeeh dehaay eeya aree bareeh diwee rhiya. Baruuh Bitrusii dehaay, "Baruuk diwtiniya han, Siimoon? Gaat sꞌa han tingwꞌiideet toona kaꞌadgirta han? 38 Baraak gwꞌadna, jarrabamtiib bitdaayayni jillaay siileelaana. Aashuuk yhariwna, laakiin ugaru inꞌakw." idi.

39 Yasuuꞌa masi isgiit siileeliya, oontꞌa han baliin ibhali eekna irmid. 40 Baruuh yꞌagarihoob, bareeh masi diwee imri. Bareeh hanꞌaar hooy daayaabuuyt, igwꞌadi talawsiti adgiraab kiikeen. Bariiyooh dehaay naan iidneeb igamna.

41 Yasuuꞌa mhaya door yꞌagaraayt, bareeyooh dehaay, "Masi fiinteena aree diwteena han? Mhatni hookna! Tuusꞌa eeta. Shaawti shibibna! Wꞌaadami Oor tumaagti dehay nuunsi iyadna. 42 Yakaana! Giigni. Shaawti aneeb iidlib indiib uutak yꞌaabi." idi.

43 Yasuuꞌa hadiidee sagi mhiinii Yahuuda iidni tak, itamna malooyee gaal iikti dehaay lawiya. Ifagiiriya isuurkinaawwa whaggi koojaawwa isuurkina aarawwa diigwataab iiktiineeb, gwida dehay gadhꞌamaab bꞌadhdhaabwa kwoolayaabwa yaksaab, bariiyooh geeb iifiin.

44 Oontꞌa uutak utoolana alaamaat bareeh imsꞌabaak, "Ani salaamaniyeeb ootak barooh ikati, abiknaa aree digwagwee fidnaab haay sakaana!" idi. 45 Igidiyeesooh Yasuuꞌaab beeti idwilaayt, Yahuuda "Seedna, dabaaywa!" idiit hooy yhalab. 46 Aanda Yasuuꞌaab yꞌabikniit yhakwirna. 47 Malya Yasuuꞌi daraag ingid eendee gaal bꞌadhdhooh ilꞌib aree ufagiiri oowinnaay kishiya ithꞌa, wꞌangwiil hooy ikitꞌa.

48 Yasuuꞌa "Naanhooy wꞌamaagtakiit bꞌadhdhaabwa kwoolayaabwa tiyheeniit anii abuuk tehariwna? 49 Ani diimaab Wꞌankwanaay ugawiib geebookna allami, aree bꞌeeb han abkaayi kitteena. Laakiin aaktab iidneet tuuna ibakii sidik iikti tindi." idi. 50 Malya kassaah barooh yꞌishniit ifoorna.

51 Hankwil gaal halak nuun weena baabariib Yasuuꞌi harꞌii sakiya. Barooh yꞌabiknihoob, 52 baruuh whalakooh yꞌishaayt, rabooba ifoor.

53 Malya Yasuuꞌaab ufagiiri oowin haay ibeen. Malya kassaah ifagiiriya isuurkinaawwa, whaggi koojaawwa, oodehayi suurkinaawwa immarraayna. 54 Been oodoor Bitrus ufagiiri oowinnaay whoosh ookiik sagi mhiinii barooh imooraam. Beentooy igwꞌaadiiga nꞌeet shidhhanaa kwalala, aree baruuh han toonꞌi bareeyooh geeb ifish.

55 Ifagiiriya isuurkinaawwa kassuuh Iyahuudi mijlaswa Yasuuꞌaab haay idiirneet badeha yhiriwna. Laakiin baraah naat han miraab kiikeen. 56 Gwida dehay gwisreet badeha Yasuuꞌiib hadiidiyaan. Laakiin tibadehaataahna gat akaat kiikeen.

57 Malya gwadi yakiyaaniit bariiyooh kehii gwisreet badeha ibidehana: 58 "Hinin oon ootak ‘Ani Ukwaasanaay udiini gaw uudehay shagaamaab ikatiyeeb dhibsiit, dehay shagaamaab biikaayeeb, weer mhayt yinaateeb iidꞌir andi’ diyee nimaasiw." idiin. 59 Laakiin beenhoob han tibadehaataahna gat akaat kiikeen.

60 Malya ufagiiri uuwin oodehayi bitik ingadaayt, Yasuuꞌaab raatiya, "Yasuuꞌa, baruuk naat kitdiya han? Aan aanda kehook ibadehaneet tuuna naanaatu?" idi. 61 Laakiin Yasuuꞌa tim iki aree naat han gwibiyaab kiiki.

Ufagiiri uuwin masi Yasuuꞌii dehaay, "Sooyaa hoon! Baruuk Ukwaasana Ubaarakamaay Oor, Umasiihiiwwa?" idi.

62 Yasuuꞌa "Awooh, aneebu. Wꞌaadami Oor Oongaal Wꞌalyaanaay umaygwadiib sꞌee rhi tiyadna. Barooh bꞌaluukiib tibreetee yꞌee rhi tiyadna." idi.

63 Ufagiiri uuwin winneet hasiyaaytii whalakooh shatatiyaayt, "Naanhooy wari badehi nhariw? 64 Ikifuuri bhali timaasiwna. Naan tiyadna?" idi.

Baraah kassaah barooh atehimiyaan, "Tooyat astehaliini." idiin. 65 Udehayii gali bariiyooh kehii tifiyaana ithabꞌana. Eegwꞌad yhakwirniit yꞌayeesoohna ithabꞌana. Barooh sakanaayaana, "Aaw ithꞌa hook, dehoon sirida?" idiin. Malya ikajar igwꞌaadiiga barooh iyheeniit ithabꞌana.

66 Bitrus oogawi hooshiib nꞌati haayee, ufagiiri oowinnaayt kishiya gaat eeta. 67 Bitrus toonꞌi fishee rhitanihoob, winneet tishibibaayt harꞌii, "Baruuk han Yasuuꞌaab Unaasiraayi geeb tiifiya." tidi.

68 Laakiin Bitrus itwi, "Yaa takatay! Kak tindii? Ibhaliyeek eekna kaꞌafhaman." idi, aree baruuh ugawi dheefa beeti ifirꞌa, aree uujiik kuukillaayi.

69 Tukishiya masi Bitrus tishibibaayt, beentooy ingid oodehay soota, "Uun uutak han bareesooh gaalu." tidi. 70 Bitrus masi itwi.

Shalikt middaati harꞌii, baliin beentooy ingidnee gwadi, "Baruuk han sidik bareesooh gaalwa. Baruuk han Jaliilaayiibwa." idiin.

71 Oon oodoor, Bitrus ateewwa halafooyeewwa, "Oon ootak baraakna tiyadneeb ookna kaakan." idi.

72 Igidiyeesooh uujiik malya door kuukillaayi. Bitrus oon oodoor been Yasuuꞌa, "Uujiik malya door baakuukillaayi, baruuk mhay doora ittiwheeb tindiya." iideeb ibhali shꞌiya. Bitrus barraab ifirꞌa aree winneet waawiya.