1 Masi Yasuuꞌa "Oosdik andi hookna, oon oomhiin ingadiin oodehayii gali ayaab baakay, Ukwaasanaayt tehadꞌaayi yꞌakrireesooh rhi iyadna." idi.

2 Yasuuꞌa asagwit yinaati harꞌii, Bitruswa, Yuuhannaawwa, Yaaguubwa iyhaayt, oodꞌooh ikeeniit oorba reewiyaan. Beentooy bareeyooh suurii aafiir gayyaramyaan. 3 Yhalakaayaah utalawiit buubiyaan. Een bareeh tꞌiiteena eeraanaayt tuduniyaatiib tuukna kitehaay. 4 Beentooy aree Muusaawwa Eelyaawwa bareeyooh dehaay lawiyaan. Baraah Yasuuꞌaab hadiidsamiyaan.

5 Bitrus Yasuuꞌii dehaay, "Seednaay! Oon oomhiin daanayeet tuuna daayiitu. Mhay gawa niidꞌir, gaal bariiyook dehaay, weer Muusaay dehaay, weer aree Eelyaay dehaay." idi. 6 Bareeh winneet mirkwaay dehaay dhibaa iifi akay Bitrus naan iideeb kiikan.

7 Malya bꞌaluuk eeyaayt, bareeh ikwibis. Oon ubꞌaluukii hiss eeya: "Uun baruuh wꞌooru ani areeyaniyeebu. Barooh sinaakirna!" idi.

8 Ikwiriyaatay gaalhoob nakamiyaanihoob, Yasuuꞌaab nuun weer rhaab kiikeen.

9 Baraah oorbaay itgidehaneeb oodoor, Yasuuꞌa bareeyooh dehaay, "Wꞌaadami Oor tuyattii yakiiniyeeb ookiik beet toona gaal han baasooyaana." idi. 10 Ikwiriyaatay toon toona idibiin tak han sooyaab kiikeen. Laakiin taktak raatiyaana, "Tuyattii yakiiniyeeb ookiik." indiyeeb naabhaliya imsiyoodaayna.

11 Baraah Yasuuꞌaab raatiyaana, "Whaggi kooja awwal unabi Eelya ibakii yꞌiiniyeet toonaati naanhooy iyadna?" idiin.

12 Yasuuꞌa igwibi "Oosdik andi hookna, Eelya awwal yꞌiini, malya naatka ishiishboobi. Uuktaab laakiin, ‘Wꞌaadami Oor ibakii winneet lhamiini, uudehay barooh eeribna.’ Naanhooy diyaabu?" idi. 13 Laakiin ani andi hookna, Eelya yꞌaabu. Baraah abiiyeehna yhiriwneet toona idꞌiin. Beet tuuna ooktaabiib bariiyooh kataabtu.

14 Ikwiriyaatay eeraw hadiit yꞌagarnihoob, gwida dehaywa whaggi koojaawwa ammarariyaa bareeh amgwassaaree rhiyaan. 15 Uudehay kassaah Yasuuꞌaab rhiyaanihoob, winneet imhaniit isgaribna. Malya barooh salaamiini jillaay dhaabee dehaay eeyaan.

16 Yasuuꞌa bareeh raatiya, "Naanaatiib bareeh timgwassiirna?" idi.

17 Oodehayii tak gaal igwibi: "Seednaay! Wꞌooru haay yꞌan hook. Barooh jin hooy daayaaba! Aajin ibhali yhabiin. 18 Aajin hooy daayeenihoob, whaashiib dhibseen. Uuyaf hibibt eetfiif, teekwiri ishoothathꞌi, malyaab balamiini. Ikwiriyaatayaak wꞌoor eejin hooy ifarꞌaneet toona hooy ahariw. Laakiin baraah adgiraab kiikeen." idi.

19 Yasuuꞌa "Baraakna amseeneeb uudehay wꞌiimaan baabariin! Ani naadoor hadiit geebookna daayani? Naadoor hadiit bareekna atfayiik? Yhaa! Wꞌoorook haay mꞌaa!" idi.

20 Aflaay wꞌoor haay eeyaan. Aajin Yasuuꞌaab rhiyaanihoob, willa wꞌoor katatisiyaan. Wꞌoor whaashi kehii dhibiyaayt irgas. Hibibt ifaf.

21 Yasuuꞌa wꞌoori baaba raatiya, "Wꞌooruuk nhoobeeka bak lhaabu?" idi.

Uutak "Wꞌadhimuumii bak lhaabu. 22 Aajin diimaab barooh madar yhariwna. Door yameeb, door nꞌeetiib eegidna. Adgirtinyeek, dehoon nꞌakwmanaaya, shama hoon!" idi.

23 Yasuuꞌa ootakii dehaay, "Adgirtiniyeek naanhooy tindiya? Wꞌiimaan ibariib ootak naatka dehaay laamaati." idi.

24 Wꞌoori baaba gaalhoob aadhiya, "Ani iimaan abari, gwidaka iimaan aharriiw, hooy shamaheeb!" idi.

25 Been oodoor Yasuuꞌa oodehay willa ammarriyee rhiya, aree eejin idaanin, "Aajin baraak yꞌangwilaya, igilluusiya! Ani sooyani hookna! Willa hooy firꞌana! Shaawti dehaay baaꞌagaarna!" idi.

26 Aajin wꞌoor whaashi kehii dhibisiyaaniit irgisna. Malya hooy ifirꞌana. Laakiin wꞌoor ayaana itꞌi, aree uudehay igwida, "Wꞌoor iiya." idiin. 27 Laakiin Yasuuꞌa bariiyooh wꞌayi yꞌabikaayt isingad. Aree wꞌoor iragadaayeesooh ingad.

28 Yasuuꞌa oogaw shuumiyani harꞌii, ikwiriyaatay oodꞌoohna iiktiinihoob, barooh raatiyaana, "Hinin eejni mhalti naanhooy adgiraab kinki?" idiin.

29 Yasuuꞌa igwibi, "Een eejni jinis siileelt nuun weena kitfirꞌa." idi.

30 Been oomhiin hooy giigiyaan, Jaliilee hasamiyaan. Yasuuꞌa baraah iifiineeb oomhiin uudehay iikanneet toona hariwaab kiiki. 31 Yasuuꞌa ikwiriyaatay agriisi. Baruuh breeyooh dehaay, "Wꞌaadami Oor dehayi ayeeb nuunami indi. Barooh idaar iyadna, mhay bꞌeeyi harꞌii yaki indi." idi. 32 Laakiin ikwiriyaatay een ibhaliyeeh naan haay isehiriweeb afhamaab kiikeen. Bariiyooh raatti irkwiin.

33 Baraah Kafarnaahuum ibeen. Baraah gaw shuumiyaani harꞌii, Yasuuꞌa bareeh raatiya, "Usalaliib naan timsiyoodaayna?" idi. 34 Laakiin bareeyooh aaw winkaab iiktiyeeb usalaliib imgwassaarnayt, ikwiriyaatay tim ikeen.

35 Yasuuꞌa thathamiya aree Ikwiriyaatay Itamna Malu waliikiya, "Uutak oodehayi daba ikatiyeet toona harriiw, ibakii wꞌagiya ikati, aree kasseeyooh shagaamana ikati." idi.

36 Baruuh dis oor yakisiyaayt bareeyooh bitik isingad. Wꞌoori ayi yꞌabikaayt, bareeyooh dehaay, 37 "Oon wꞌoor aniib oosmii agbiliiniib, aneeb han agbiliini. Aneeb agbiliiniib, aneeb kaꞌagbiliya laakiin aneeb diigwatiyaab agbiliini." idi.

38 Yuuhanna Yasuuꞌii dehaay, "Seednaay! Oosmiisook eejin iifirꞌa tak rhinaneek, baruuh hinee kiiki akay beet toona nhabi." idi.

39 Yasuuꞌa "Baahabiina! Aniib oosmii mꞌuujisaat shagaamiiniib, malya maagnaayt aniib kahadiidiya. 40 Baaꞌashooshamayuun, geeboon daayiini. 41 Oosdik andi hookna, baraak Umasiihiibaana akay, gaal aniib oosmii yam gwꞌasiinyuukna, wꞌijrooh kiinaw." idi Yasuuꞌa.

42 Yasuuꞌa "Een aniib yꞌaraw idabalooya, aneeb aamaneen, maagnaayt sakistiika, tꞌalaatiyooh riyaati awi hakwiriit, ubhariib dhibiiniyeek dehaay hanyiis. 43 Wꞌayuuk maagnaaytiib saksiiniyuuk, hook kitꞌa. Malu ayi barii baayaayt toonꞌi jahannam daatiniyeenaatiika, gaal ayi barii umidhhan marriyeek dehook hanyiis. 44 Dꞌoobwa nꞌeet baayaaytwa eefeen. 45 Uragaduuk maagnaaytiib saksiiniyuuk hook kitꞌa. Malu ragada barii jahannam daatiniyeenaatiika, gaal ragadii umidhhan marriyeek dehook hanyiis. 46 Dꞌoobwa nꞌeet baayaaytwa eefeen. 47 Ugwꞌaduuk maagnaayt haay shanbiibuuk, hook thawsa. Malu gwꞌadee jahannam daatiniyeenaatiika, Ukwaasanaayt tehadꞌaayi gaal gwꞌadii shuumtiniyeek dehook hanyiis. 48 Dꞌoobwa nꞌeet baayaaytwa eefeen. 49 Gaalka tuunꞌi umiilak dꞌamsi tindi.

50 Umiilak daayiibu. Laakiin uudꞌam hooy giigiiniyeek, kak uudꞌam malya dehaay itꞌagiir? Dꞌam dꞌiina, taktakee dehaay shiboobna, umꞌasgiib kwiriina!" idi.