1 Yasuuꞌa beentooysii giigiyaayt, tumadiinaatooh beeti yꞌagar. Ikwiriyaatay han barooh iramna. 2 Tuusab eetanihoob, Iyahuudi diini gawiib allamtiib badooya. Uudehay igwida barooh imaasiw winneet ajjabamiyaana, "Uun uutak teen teena naad imri? Taan baruuh attiyeewiyaab ikatiyeet tifagarandi naanaata? Taan timꞌuujisa baruuh ikwasiyeet aree naanaata? 3 Uun baruuh whindiib hashana, Maryami oor kiiki han? Yaaguubwa, Yuusifwa, Yahuudaawwa, Siimooniiwwa oosan kiiki han? Taan gwadoon eefeent teekwa kiikeen han?" idiin. Aflaay baraah barooh iribna.

4 Yasuuꞌa bareeyooh dehaay, "Whaashiyoohwa, udehayoohwa indhiwaayoohwa nuun, inabiya kassooh oomhiin hamooysamaaba." idi. 5 Yasuuꞌa beentooy mꞌuujisaat han iidꞌee dehaay adgiraab kiiki. Shalik dehayi kehii yꞌayeeh daasiya aree bareeh mheeliyaneeb nuun weenaati dꞌuuy adgiraab kiiki. 6 Wꞌiimaaniyoohna naawiib ajjabamiya. Malya Yasuuꞌa gariyaat gaanaatii weet beeti giigiya. Beentooy allami.

7 Yasuuꞌa itamna malu waliikiya, maloob maloob ikwaasiit bareeh diigwatiya. Aree eejin haay iifirꞌaneet hadꞌaayi bareeh yhii.

8 Yasuuꞌa bareeh amir sooya: "Naat gaat han usalaliib baayaksaana! Kwoolay yaksaana nuun! Hadhiib baayaksaana! Shantaat han baayaksaana! Mhallagaab yhabaayeeb baayaksaana! 9 Gidhꞌaat shabna, laakiin malya gamiis baayaksaana! 10 Gaw shuumteenihoob, been oomhiin beerteeneeb hadiit hooy sꞌana! 11 Tugariyaati dehay bareekna eeribneek tari biisinaakiirneek, umhiinoohna hooy giigaana! Whaash iragadaayeesookna han nifishna! Beet tuuna bareeyooh kehii badehaat iikti tindi." idi.

12 Baraah giigiyaana, oodehay Ukwaasanaay dehaay itꞌagiirneet toona sooyaan. 13 Baraah gwida jin ifirꞌana, aree gwida lha dehay saliitii ishaamitna aree bareeh mheeliyaan.

14 Whadꞌa Heeroodis been Yasuuꞌiib usakana imaasiw. Yasuuꞌiib uusim winneet itookkaan. Dehay gali, "Yuuhanna Umoosana tuyatii yakiya, oon usabbii timꞌuujisaati akrir hooy shagaameen." idiin.

15 Wari "Unabi Eelyaabu." idiin.

Masi wari aree, "Suur iifiin Inabiya tꞌiiteeb gaal ikati." idiin.

16 Laakiin Heeroodis een imaasiwihoob, "Yuuhanna ani tꞌala akitꞌeeb tuyatii yakiya!" idi.

17 Heeroodis uukna Yuuhanna itꞌabiikeet toona sooya. Barooh yhaakwiraayt oosjin idꞌi. Toon toona Heeroodiyaasi jillaay idꞌi. Batuuh Heeroodisiib oosan Fiilibusiit takatu, laakiin batooh baruuh dꞌiraa iifi. 18 Yuuhanna suur Heeroodisii dehaay, "Usaniitook takat tindꞌiireet tuuna dehook halaal kiiki." diyaa iifi. 19 Aflaay Heeroodiyaas Yuuhannaab ashoosamtaayt madar tehariw, laakiin adgiraat kitti. 20 Heeroodis Yuuhannaab iriikw aree barooh yhabi. Yuuhanna shibu tak aree mugaddas tak iiktiyeet toona baruuh iktiin. Heeroodis Yuuhanna iideeb ibhaliyeeb naan sakiyeeb igameek han, masi barooh isnaakiireet toona yhariw.

21 Laakiin oontꞌa fursaat lawta. Heeroodis hooy faraay iiktiyeeb uumbꞌi eeya. Aflaay baruuh aduumaat idꞌi. Iwawindeehwa oodheesh idaabtaawwa, Jaliiliib oodehayi suurkinaawwa waliikiya. 22 Heeroodiyaasiit tꞌoor eetaayt tilag. Heeroodiswa yꞌamnaayeehwa han winneet afirhista.

Whadꞌa Heeroodis tꞌootii dehaay, "Toona batuuk harriiweet raatiiheeb aree batooh iyaaw hook andi." idi. 23 Whadꞌa winneet dehaay halafooyaayt waadiyaaya, "Kastooh toona batuuk harriiweet, aniit tehadꞌaayi itarab tindiyeek han iyaaw hook andi." idi.

24 Tꞌoor giigtaayt toondi raatta, "Naan raatani?" tidi.

Tuundi "Yuuhannaab umoosanaay ugirma aharriiw! Dii!" tidi.

25 Tꞌoor willa whadꞌaay dehaay tꞌagaraayt, "Ani Yuuhannaab umoosanaay ugirma koobaatiib hallaay aharriiw!" tidi.

26 Whadꞌa winneet gadabiya. Laakiin yꞌamnaayi suurii halafooya iifi akay, iirbee dehaay adgiraab kiiki. 27 Aflaay whadꞌa igidiyeesooh kajaraayiib diigwatiya. Yuuhanna umoosanaay girma kitꞌiit haay yꞌiiniyeet toona sooya. Uutak giigiyaayt usijniib Yuuhannaayt tꞌala ikitꞌa, 28 aree bariiyooh ugirma koobaatiib haay eeya, malya tꞌooti suurii daasiya. Batuuh aree toondi tehii. 29 Yuuhannaay ikwiriyaatay toon toona imaasiwniit eeyaana. Baraah tukinaaja imiimasha hadiit haay giigiyaaniit ibisna.

30 Ilinguumiya Yasuuꞌii dehaay immarraayna, ishaga idaayaaneebwa, wꞌallamiyaaneebwa barooh sooyaan. 31 Malya gwida dehay yꞌiina aree giigiinayt, mꞌariit haay tamiineet fursa han inawna. Yasuuꞌa ikwiriyaatayeeh dehaay, "Nigiya mhiin beeti oodꞌookna mꞌaana! Middaat fiinaana!" idi.

32 Aflaay baraah tufalluukaatiib nigiya mhiin beeti oodꞌoohna ibeen. 33 Laakiin gwida dehay bareeh giigee rhiyaanihoob, naad iibiineeb ikanna. Kasteeh timadiinaatee uudehay iragadaayee been oomhiin hadiit hiddaab dhaabiyaana, aree bareeyooh suurii oomhiin iktimna. 34 Yasuuꞌa tufalluukaatii tikwiyanihoob, gwida dehay rhiya, aree bareeh dehaay nꞌakwmanaaya. Baraah ooreew ikinaab anuub dehaay tꞌiiteeba. Aflaay bareeh gwidaana allamtiib badooya.

35 Whawaad iidwilihoob, ikwiriyaatay Yasuuꞌii dehaay eeyaaniit, "Uun baruuh mingaayami haashu, hawaad aree yꞌaabu. 36 Oodehay fidnaab gagiigsa, aflaay baraah tigariyaawwa ikwayaay eefeent tidirꞌaawwa bayiit tameeneena dilibti iyaynee dehaay giigsa." idiin.

37 Laakiin Yasuuꞌa bareeyooh dehaay, "Baraakna mꞌariit hiina, tamsaana!" idi.

Baraah bariiyooh dehaay, "Diftiit, malu shi diinaree hadhiib dilibtiit bareeh tamsinay han?" idiin.

38 Yasuuꞌa bareeh raatiya, "Naaka hadhi tibariina? Giigaanaat shibibna." idi.

Ilinguumiya ishbibniit, "Ay hadhiiwwa malu aashoowwa nibari." idiin.

39 Malya Yasuuꞌa bareeyooh dehaay, "Oodehay jamꞌaab-jamꞌaab kwaasnaat oosiyaam isootaayi kehii soosꞌana!" idi. 40 Aflaay baraah ay tamuun ay tamuun, sheeb - sheeb ikeeniit isꞌana. 41 Yasuuꞌa yhadhi yꞌaywa, yꞌaashu imaloowwa yakisiya, teebri ishbibaayt baarakiya. Malya yhadhi irfit idꞌiit bareeh yhii. Oodehayii dehaay yꞌadhidhneet toona hooy yhariw. Masi yꞌaashu imalu han kasseeh bareeyooh dehaay yꞌadhidh. 42 Kassaah uudehay tamiyaaniit gabiyaan. 43 Malya ikwiriyaatay yhadhiiwwa yꞌaashooyi gaafiiwwa tamna malu biileeb itibniit yakisiyaan. 44 Yhadhi tamiyaan eendi adad ay alfa iiktiin.

45 Igidiyeesooh Yasuuꞌa ikwiriyaatayeeh tufalluuka reewisiya aree bariiyooh hankaay Beetsaydaab iyami daraag ooraawiib tiifiit beeti giigisiya. Oodehay giigisiyeeb ookiik yhagit. 46 Bareeh giigisiyaayt harꞌii, baruuh siileelti jillaay ribaab reewiya.

47 Tehimni eetani door tufalluuka oobhari bitik tiifi. Baruuh aree oodꞌooh whaashiib iifi. 48 Yasuuꞌa ikwiriyaatay iyami bitik kak akraab imgwarhaneeb rhiya. Baraah winneet gallabamiyaana aree ubaraam whiireer yhabi. Yasuuꞌa karuumaab iyami kehii hiireeree bareeyooh dehaay eeya. Bareeh hasamtiib idwil. 49 Laakiin ikwiriyaatay Yasuuꞌa oobhari kehii hiireeriyeet toona rhiyaanihoob, barooh whiinaayt hiisiyaaniit aadhiyaan. 50 Kassaah barooh rhiyaanihoob winneet irkwiin.

Willa baruuh bareeyooh dehaay, "Ariknaa! Uun aneebu. Baarakwiina!" idi. 51 Yasuuꞌa bareeyooh geeb tufalluuka yꞌamihoob, ubaraam ingad. Baraah han winneet ajjabamiyaan. 52 Iginꞌaayaah assamaa iifiinayt, yhadhiyeeb tikeet timꞌuujisa afhamaab kiikeen.

53 Baraah oobhari dar ooraaw beeti ikitꞌanihoob, Ganneesaareet iidni haashiib hooy tikwiyaan. Tufalluuka beentooy yhakwirna. 54 Tufalluukaatii willa tikwiyaanihoob, uudehay Yasuuꞌaab ikanna. 55 Uudehay kasseeh yhasheeb dhadhaabiyaan. Malya yꞌamshaayeehna bꞌadhaayi kehii yakisiyaaniit baruuh hooy eefi iidni mhiinka haay yꞌiin. 56 Kasseeh baruuh iibiyeeb yhash timadiina tari tigariyaateeb, uudehay yꞌamshaayeehna yaksiit isuugaayi mhiinaneeb daasiin. Baraah Yasuuꞌa whalakiitooh shinki tehasiinyeet toona hooy yhariwna. Aree Yasuuꞌiib whalakiit shinki tehiyaan kassaah inꞌirna.