1 Yasuuꞌa masi oobhari daraag oodehay allamtiib badooya. Baliin uudehay ibarooh kwalal winneet guudiyaaniit, Yasuuꞌa falluukaatiib shuumiyaayt batiiyooh tehooyteeb isꞌa aree iyami kehii ingad. Uudehay kassaah iyami daraag iistꞌana. 2 Yasuuꞌa gwidaana mitaalee bareeh allamiya, aree wꞌallamtiyooh bak idi: 3 "Sinaakirna! Dirꞌaateega teeraayooh teeraatiib itfirꞌa. 4 Baruuh iteeraayooh teeraayee, habbaat gwadit salaliib dhibiyaana, aree kilayt eeyaaniit iteera tamiyaan. 5 Weer teera, aweeyi mhiin dhibiya, beentooy shalik haash hooy iifi. Whaash shalikuuyt, iteera willa fuutiitiya. 6 Laakiin tuuyin tifirꞌihoob, tifuuti tilaw, gadam kitbari akay balamta. 7 Weer teera naweeti bitik dhibiya. Tinawi geeb yakiyaaniit iskitna idirna. Aflaay harroob haay yꞌaab kiiki. 8 Laakiin weer teera daayi haashiib dhibiya. Fuutiitiya, yakiyaayt aree harroob haay eeya. Malya tifirꞌaaytuuh mhay tamuun, asagwir tamuun tari sheeb doora guudiya." idi.

9 Malya Yasuuꞌa, "Eemsiiw angwil ibariibka baꞌiimsaw!" idi.

10 Baruuh oodꞌooh ikayihoob, ilinguumiya itamna maloowwa aaraw bariiyooh oodar iifiinwa, aamtaal naan mitiyaayiineeb barooh sakanaayaan. 11 Yasuuꞌa bareeyooh dehaay, "Ukwaasanaayt tehadꞌaayeetiib kwabaast toona attiyeewiyaabaana. Laakiin oodehay eeraw ani naatka mitaalee anfariid. 12 Aan uudehay ishabibna laakiin karhiyaan. Eemsiiwna laakiin kaꞌafhamiyaan. Bak sakiineek, baraah Ukwaasanaay dehaay itꞌigirna aree afoomiin." idi.

13 Malya Yasuuꞌa bareeh raatiya, "Een eemtaal afhamaab kitteena han? Malya eemtaal eeraw kasseeh kak afhami tiyadna? 14 Udirꞌaatkina Ukwaasanaay ibhali teeraayiini. 15 Dehay gali iteera usalaliib dhibiyaab tꞌiiteeba, usalal ibhali hooy teeraameeneeb ikati. Baraah willa tudiigwat eemsiiwna, laakiin uubliis yꞌeetiit Ukwaasanaay ibhali bareeyooh tehooyteeb teeraamaab tafiini. 16 Wari, been iteera liilaawi mhiiniib dhibiyaab tꞌiiteeba. Baraah Ukwaasanaay ibhali eemsiiwna aree gaalhoob afirhaa iyayna. 17 Laakiin wꞌiimaanuuhna gadam kiibari akay shalikt midda toobhaat hangiit. Ukwaasanaay ibhaliyi sabbii gwirhaab tari amaag wara daayiiniyihoob, baraah willa een ibhali ishtiit fidnaab yakeen. 18 Iteera tinaweeti tehooyteeb dhibiyaab, Ukwaasanaay ibhali eemsiiw oodehay ikati. 19 Laakiin udamaani hasakaawwa, oomraayiit taaliiwwa tuduniyaatiit nafirnaywa yꞌeetiit Ukwaasanaay ibhali isakitna. Aflaay firaay haay kaꞌeeyaan. 20 Iteera whaash udaayiinaay dhibiyaab, Ukwaasanaay ibhali eemsiiw aree bareeh agbileen oodehay ikati, aree baraah tawaameen. Wari mhay tamuun, asagwir tamuun, sheeb doora firaay haay yꞌeen." idi.

21 Baruuh bareeyooh dehaay, "Tak lambaat shidhhaniit daabiiti whii kadaasiya, tari nꞌaali whii kadaasiya. Laakiin tulamba mꞌabaki kehii kadaasamti han? 22 Kwabaasna tehayeek itfirꞌa tindi, dhꞌimaana tehayeek han lawi tindi.

23 Eemsiiw angwil ibariibka, baꞌiimsaw!" idi.

24 Baruuh masi "Toona tuteemsiiwneet uginꞌookna hooy dꞌiina! Wꞌabaar haay tiyawneeb, haay tittiyeewiina masi timeeshwiin. 25 Uutak naat ibariibka gwidakaana ittiyiw indi. Laakiin uutak naat baabari, tuuna tꞌibariyeet han bariisooh yakami tindi." idi.

26 Yasuuꞌa masi, "Ukwaasanaayt tehadꞌaayi ootak iteera whaashiib sanbiid tꞌiiteeti. 27 Baruuh whawaadwa oombꞌeewwa diwiiniyeek tari yakiiniyeek han iteera fuutiitiini. Baruuh laakiin iteera kak fuutiityaneeb kiikan. 28 Tuubuur tuukna harroob yakistini. Awwal fuutiitiini, malya hathawt ikati, malya ugirma timmiima gangara ikati. 29 Wharru willa itbashiikwihoob, uwaaki door yꞌaabuuyt minjal yaksiit inwiik." idi.

30 Yasuuꞌa masi, "Ukwaasanaayt tehadꞌaayi kak tꞌiiteeti? Kak eefeen mitaalee aree awsifani? 31 Batuuh isinfaayt habba tꞌiiteetu, toobuutiib itꞌadiint iteeraayt tehabbaateeb hooy diskaat tikati. 32 Beet tehabba teeraamtiniyihoob, fuutiitini, kasseeh tidirꞌaati hindiyeeb hooy winkaat tikati. Wawin lꞌid yaksiit tulꞌandaatiyooh whii aree aakilay igawaayeeh shagaameen." idi.

33 Yasuuꞌa bak eefeen gwida mitaalee oodehay Ukwaasanaay ibhali allamiya, daayiib afhamiineeb ookiik bhaliisamiya. 34 Mitaal anu naat han dehaay kahadiidiya. Laakiin oodꞌooh ikwiriyaatayi geeb iiktiyeeb oodoor naatka dehaay fassari.

35 Beet tooyin himniit, Yasuuꞌa ikwiriyaatayeeh dehaay, "Yakaana oodar ooraaw niibi!" idi. 36 Oodehay yꞌishniit, Yasuuꞌa falluukaatiib haayee haay giigiyaan. Warit falluuka han bariiyooh geeb iifiin. 37 Gaalhoob akra baraam eeya, aree uumooj tufalluuka shuumiya, aflaay tufalluuka yam mateebt tidwil. 38 Yasuuꞌa tufalluukaati niiwaay diwi. Girmaay whiiti kehii bꞌi. Ikwiriyaatay barooh isibꞌarna, "Seedna! Seedna! Aayam iyayna hoon, imshibib hoon kitdiya han?" idiin.

39 Yasuuꞌa ibꞌaraayt ubaraam idnin, oomoojii dehaay, "Tim akaa! Baarigasaa!" idi. Malya ubaraam ingad, aayam aree dhibiyaan. 40 Yasuuꞌa ikwiriyaatayee dehaay, "Naanhooy tireekwna? Masi iimaan kitbariina han?" idi.

41 Baraah winneet irkwiiniit taktak raatiyaana, "Uun aabu? Ubaraamwa aayamwa han barooh isnaakiirna." idiin.