1 Yasuuꞌa door weer Iyahuudi diini gaw shuumiya. Beentooy tak wꞌayi ayaab iiktiyi iifi. 2 Ifariisi Yasuuꞌiib sabab haay atehimiineeb yhiriwna. Aflaay barooh igwꞌadna, toosab mheeliini han kamheeliya iishbibna! 3 Yasuuꞌa Ootak wꞌayi ayaab iiktiyeenaay dehaay: "Oodehayi suurii gadaa!" idi.

4 Malya Yasuuꞌa bareeh raatiya, "Yhaana! Tusabtiib naan halaalu: tudaayiinaayti sakti han tumaagnaay? Shuuki madar daayiib han, shidhhanooyt?" idi. Laakiin baraah tim ikeen.

5 Een bareeyooh wꞌamꞌakuuraawwa wꞌamaagniyaawwa rhiyanihoob winneet lhamaa ishbib. Malya baruuh ootakii dehaay, "Wꞌayook fidhidha!" idi. Uutak wꞌayooh ifidhidh, aree wꞌayuuh daayiib inꞌir. 6 Beenhoob Ifariisi ifirꞌaniit Yheeroodisaayi geeb immakkaarna, Yasuuꞌaab kak iidirneeb immakkaarna.

7 Yasuuꞌaawwa ikwiriyaatayaahwa oobhar beeti yꞌagarna. Gwida dehay Jaliilee barooh iramna. 8 Baruuh iidꞌeet toona kastooh imaasiwnihoob, gwida dehay Yahuudaaywa, Alguduseewwa, Aduumiyaaywa, Urduni gidehii iifiin yhasheewwa, Tiiroosiiwwa, Siidooniiwwa eeyaan. 9 Uudehay guudiyaanayt bariiyooh kehii biidibaalni jillaay, ikwiriyaatay bariiyooh dehaay falluukaat isoomiirneet toona sooya. 10 Gwida dehay oonaay suurii mheelaabuuyt, aflaay kassaah tilhanay iibriin bariiyooh kakootsamiyaana, bariiyooh tatehatiib yhiriwna. 11 Aajin barooh rhiineebka dehaay asjidiin aree waliikiin, "Baruuk Ukwaasanaay Oorwa." iidna. 12 Laakiin Yasuuꞌa oodehay akra soob sooya. Bariiyooh usakana oodehay eeraw biisooyayneet toona sooya.

13 Yasuuꞌa ribaab reewiyaayt, baliib iyhiriweeb waliikiya. Baraah han bariiyooh dehaay eeyaan. 14 Baruuh tamna maloob hooy waasiya, aree bareeh ilinguuma isim. Bariiyooh geeb daayiini jillaaywa diftiit usakana udaayiib sooyiini jillaaywa bareeh waasiya. 15 Eejin haay mhaliineet takwi aree yhii. 16 Een bareeh aree waasiya: Siimoon tari "Bitrus" simaab iiktiyeebwa, 17 Yaaguub Sabadi oorwa, Yuuhanna Yaaguubiib oosanwa (Een bareeh Buwaanarjis isim, toothiwti ar miyaadi.) 18 Andaraawooswa, Fiilibuswa, Baartulamaawooswa, Mattaawwa, Toomaaswa, Yaaguub Alfaaꞌiyoosi oorwa, Taddaawooswa, Siimoon Kananaayooswa, 19 Yahuuda Wꞌiskaaryuuti malya Yasuuꞌaab itilwa iiktiin.

20 Malya Yasuuꞌa gaw shuumiya. Masi aree gwida dehay beentooy immarraayna. Aflaay Yasuuꞌaawwa ikwiriyaatayaahwa timꞌari haay tamiineet fursa han inawna. 21 Yasuuꞌiib indhiwa een imaasiwnihoob, barooh haaleeyaneeb hiisiyaaniit haay giigiitiib yhariwna.

22 Laakiin whaggi kooja Algudusee yꞌaab, "Barooh Baꞌalsabuul hooy eefi, Baꞌalsabuul eejini suurkinaay baruuh eejin mhaliini." idiin.

23 Aflaay Yasuuꞌa bareeh waliikiyaayt mitaalee bhaliisamiya, "Kak uubliis oobliis mhaliini? 24 Tehadꞌaayi tuukna timꞌadhiidheek, beet tehadꞌaayi kahayaayta. 25 Gaw gaal uukna itꞌadhiidheek, been uugaw kahayaaya. 26 Aree uubliis ugarooyooh amdeeraayiit itꞌadhiidheek, baruuh kahayaaya. Wꞌagiyaayuuh yꞌaab ikati. 27 Akra taki gaw shuumiit, hankaab barooh biihakwiireek, umraayooh maraayiini gaal han kiihaay. Barooh hankwiireek, malya oogaw maraayiini. 28 Oosdik andi hookna, kastuuh udehayiit tumaagnaaywa ukifuuri bhaliiwwa han afoomi iyadna. 29 Laakiin Eeshuuk Imugaddasaayee kanfiirka, door han afoomi kiidi. Baruuh daayima danuubee gwababikina ikati." idi.

30 Baraah "Barooh jin hooy eefeen." diyaabayt, Yasuuꞌa een idi.

31 Malya Yasuuꞌaayt tuundeewwa isanaawwa eeyaaniit barraab ingadna. Nafar gaal dehaay diigwatiyaaniit waliikisiyaan. 32 Uudehay barooh ikwilalniit isꞌana, aree baraah bariiyooh dehaay, "Deetuukwa isanaayaakwa barraab ingadiin, barook yhariwna." idiin.

33 Yasuuꞌa "Deetuuwwa isanaayaawwa aayga?" idi.

34 Malya baliib oodehay barooh kwalal sꞌaab nakamiyaayt, "Aniib isanaawwa tuundeewwa tooy eefeena! 35 Ukwaasana harriiweet toonaatii sakiiniibka aniib oosanwa, aniit tookwaawwa, aniit toondeewwa ikatiin." idi.