1 Hina Godema nodone sia:ma!

Ea gasa bagade hou olelema!

Ea hamobe amo fifi asi gala huluanema olelema!

2 Hina Godema nodone gesami hea:le ima!

Amola liligi noga:idafa Ea hamobe amo adodoma.

3 Nini da Ea fi dunuba:le, hahawane nodoma.

Amola dunu huluane Ema nodone sia:ne gadobe

amo da hahawane nodoma:ma.

4 Hina Gode Ea fidima:ne lala masa,

amola Ema mae yolele nodonanoma!

5,6 Dilia da Gode Ea hawa: hamosu dunu A:ibalaha:me amola Ya:igobe,

Hi ilegele lai, egaga fifi mana.

Dilia da Gode Ea musa: degabo hame ba:su hou hamoi amo dawa:ma,

amola se imunusa: fofada:su Ea hamoi, amo bu dawa:ma.

7 Hina Gode da ninia Gode.

Ea hamoma:ne sia:i, E da osobo bagade fifi asi huluane ilima sia:i.

8 E da Ea Gousa:su sema hamoi

amo eso huluane mae fisili ouligilalumu.

E hamomusa: ilegei da fifi manebe 1,000 bobaligila masunu, ilima dialumu.

9 *E da A:ibalaha:me amola Aisage elama hamomusa: ilegele sia:i,

amo E da gagui dialumu.

10 *Hina Gode da Ya:igobema eso huluane dialoma:ne gousa:su hamoi.

11 E amane ilegele sia:i, "Na da Ga:ina:ne soge dima imunu.

Amo soge da di fawane gaguli esalumu."

12 Gode Ea fi dunu da bagahame galu.

Ilia da Ga:ina:ne soge ganodini ga fi dunu agoane ba:i.

13 Ilia da soge enoga enogaia udigili lafiadalu.

Ilia da fifilai enoga enogaia udigili lafiadalu.

14 *Be Gode da ili gaga:iba:le, eno fi da ili hame banenesi.

Ili gaga:ma:ne, Gode da eno hina bagade dunu ilima amane sisane i,

15 "Na ilegei hawa: hamosu dunu, ilima mae se nabasima.

Na balofede dunuma, mae digili ba:ma!"

16 *Hina Gode da ilia sogega ha: iasi

amola ilia ha:i manu logo hedofai dagoi.

17 *Be E da dunu ea dio amo Yousefe, (e da udigili hawa: hamomusa: bidi lai)

amo ili bisima:ne asunasi.

18 *Ea emo da sia:inega la:gi amola ea galogoa sisiga:le,

ouli gisa:gisu ba:i.

19 E da se nabawane ouesalu amogainini

ea musa: ba:la:lusu liligi da dafawane doaga:i dagoi ba:i.

Hina Gode Ea sia: da ea ba:la:lusu da dafawane olelei.

20 *Amalalu, Idibidi hina bagade (e da fifi asi gala bagohame ouligisu)

ea se iasu diasu logo doasima:ne sia:i.

21 *E da Yousefe amo Idibidi gamane ouligima:ne sia:i.

E da Idibidi soge huluane, ea fawane ouligima:ne sia:i.

Yousefe da eagene dunu amola hina bagade 22 Hina bagade ea sia:beba:le, Yousefe da eagene dunu amola hina bagade

ea fada:i sia:su dunu huluanema ouligi galu.

23 *Amalalu, Ya:igobe da Idibidi sogega asili, ha:ini fi.

24 *Hina Gode da Ea fi dunuma, mano bagohame i.

E da ilima ha lai dunu baligima:ne, gasa bagade Ea fi dunuma i.

25 Hina Gode da hamobeba:le, Idibidi dunu da Gode Ea fi dunuma bagade higasu.

Idibidi dunu da Isala:ili dunuma bagadewane ogogosu.

26 *Amalalu, Gode da Ea ilegei hawa: hamosu dunu Mousese

amola Elane ela asunasi.

27 Ela da Gode Ea gasa bagade hou amola musa: hame ba:su hou

amo Idibidi soge ganodini hamoi.

28 *Gode da Idibidi sogega gasi iasi.

Be Idibidi dunu da Ea hamoma:ne sia:i nabawane hame hamoi.

29 *E da ilia hano huluane maga:me a:i asili,

menabo huluane bogogia:i.

30 *Guama da ilia soge huluane nabalesi.

Hina bagade ea diasu amolawane guamaga nabalesi.

31 *Gode da hamoma:ne sia:beba:le,

gagoba: amola mimini da soge huluane ganodini bagadewane wa:le lafia:su.

32 *E da gibu mae iawane,

mugene amola ha:ha:na fawane ilia sogega iasi.

33 Amoga E da ilia waini efe amola figi ifa

amola ifa huluane gugunufinisi dagoi.

34 *E da hamoma:ne sia:beba:le,

danuba: wa:i osea:i, idimu hamedeidafa, amo ilima asunasi.

35 Ilia da ifalabo amola ha:i manu bugi

amo huluane na dagoi.

36 *E da Idibidi sosogo fi magobo dunu mano huluane fane lelegei.

37 *Amalalu, E da Isala:ili dunu gadili oule asi.

Ilia da silifa amola gouli gisawene gadili asi.

Ilia huluane da dagumui amola gasa bagade ba:i.

38 Idibidi dunu da iliba:le beda:i,

amola ili ahoabeba:le hahawane ba:i.

39 *Gode da Ea fi dunuma mu mobiga dedeboi.

Amola gasia hadigima:ne lalu iasi.

40 *Ilia Ema edegeiba:le, e da ilima aiyei (quail) sio i.

E da Hebeneganini, ili sadima:ne, ha:i manu i.

41 *E da igi da:iya fabeba:le, hano fudagala:le, musa:le sa:ili,

hano bagadewane hafoga:i sogega hano yogo asi.

42 E da musa: Ea hawa: hamosu dunu A:ibalaha:mema hadigi ilegele sia:su,

amo bu dawa:i.

43 Amaiba:le, e da Ea ilegei fi dunu gadili oule asi.

Amola ilia da hahawaneba:le, nodone gesami hea:i amola wele sia:i.

44 *- 45 Ea fi dunu da Ea sema amo noga:le nabawane hamoma:ne,

amola Ea hamoma:ne sia:i amo huluane noga:le fa:no bobogema:ne,

E da eno dunu fi ilia soge samogene, Ea fi dunuma i.

Amola Ea fi dunu da eno dunu ilia bugili nasu soge gesoama:ne,

E da logo doasi. Hina Godema nodoma!