1,2 Hina Gode malei agolo sogebi amogai Ea moilale fi.

Amo moilale fibi da Isala:ili soge amo ganodini moilai dialebe amo baligimu

amola E da Yeluselemema bagadewane asigisa.

3 Gode Ea Moilai Bai Bagade fi!

Noga:idafa liligi E da dilima sia:be amo nabima.

4 "Na da fifi asi gala, amo da Na sia: nababe amo dedena dasea,

Na da Idibidi amola Ba:bilone ela dedemu.

Amola Na da Filisidia, Daia amola Idioubia

amo Yelusaleme soge fifilai ilima gilisili idimu."

5 Saione Goumi ea hou olelema:ne, ilia da amane sia:mu,

‘Fifi asi gala da amogai dialumu da defea.

Amola Hina Bagadedafa da Saione amoga gasa imunu.’

6 Hina Gode da fifi asi gala huluane dedesa sa:ili,

ili huluane Yelusaleme fidafa hamoi dagoi dedene legemu.

7 Ilia da gosa:le iaha amola amane gesami hea:sa,

"Saione amo ganodini da hahawane dogolegesu hou huluane ea bai diala."